12 миллион манет кулэ на…

Удмурт Дунне
By Удмурт Дунне 15 февраля, 2013 17:49

12 миллион манет кулэ на…

bb21-тӥ феврале «Брангурт песянайёс» коллектив Ижын нырысьсэ бадӟым концерт сётоз.

Чеберлыкъя кивалтӥсьсы Ольга Туктарева верамъя, сцена вылэ потон азязы ӧжытак куалекъяло.
Быдэс дуннелы тодмо луэм песянайёсмы трос учкисьёслы, валамон, дышемын ни. Соос мыло-кыдо пото Москваысь, Санкт-Петербургысь, Екатеринбургысь но мукет бадӟым городъёсысь сценаос вылэ. Но таиз концерт соос понна уката дуно: залэ люкаськозы тужгес матысь учкисьёссы. Тодо: аспал адямиоссы уката зол шумпото соослэн вормонъёссы понна, уката зол куректо, мазы ке уг пӧрмы ке. Соин ик туж оско: концертсы дыръя котькуд учкисьлэсь сюлэмзэ вырӟытыны, ӟеч мылкыд кузьманы быгатозы.

Кыӵе кырӟанъёсты «Брангуртысь песянайёс» Ижын быдэстозы — верамзы уг поты на, ваньмыз, пе, малпамтэ шорысь мед луоз. Та нуналъёсы соос пресс-конференция ортчытӥзы. Шараязы созэ гинэ: 224 мурт пыриськоз концертэ. Ваньзы — матысь эшъёссы, пӧлазы нылпиос, вордскем гуртысьтызы кырӟаны-вераны усточиос. Вуозы палэнысь куноос но. Асьсэлэн, песянайёслэн, дӥсьёссы ӵыжак-вылесь луозы, та понна тау каро Пичи Пурга ёросысь Вуж Мӧнья гуртысь киужъёсъя юртысь кибашлыослы но Суредан искусствоосъя музейысь реставраторлы Татьяна Москвиналы.

— Концертамы пыриськисьёс гонорартэк ужаны соглаш луизы, — шуо песянайёс. — Асьмеос но вань поттэм коньдонмес сётом черкмес пуктонэ. Ма карод, манетэн-манетэн бичано луиськом. Бадӟым тау ӟеч адямиослы: куд-огез, огшоры конвертэ поныса но, уксё келяло. Тросэз берпуметӥзэ сётыны дасесь, но таӵеослэсь уксёзэс басьтэммы уг поты, тау шуиськом ни концертамы, билет басьтыса, лыктэмзы понна. Иське, коньдонзэс сотэк но сётӥзы ни.

Дун-чылкыт Тройчалэн храмез Брангуртын пуктэмын вал 1895-тӥ арын. Но кылем даурысь 30-тӥ аръёсы сое куашкатӥзы. Сое выльысь ӝутон — песянайёслэн тужгес бадӟым малпанзы, осконзы. Соин ик соос, жадёнэз валатэк, гастрольёсы потало. Черклы ог 6 миллион манет кошкиз ни. Солэн борддорез ӝутэмын. Но липет улэ пыртоно, пушсэ чебертоно на. Озьы эшшо ог 12 миллион манет кулэ на. Черкын нырысетӥ служба ортчыны кулэ туэ июнь толэзе.

— Но ӧз пӧрмы, коньдон люканы ӧм быгатэ ке, дас арзэ но концертъёсын ветлом на, талэсь ум кышкаське, — ӝот-ӝот вера Галина Конева.

Бен, песянайёслэн малпанзы быдэсмиз ке, гуртысьтызы потаны уг малпало ни. Черкын кырӟалом, шуо. Эшшо выль клубазы концертъёс сётъялозы — соосты кылзыны-учкыны мылкыд карисьёс асьсэос доразы мед ветлозы, пе. Песянайёс кунооссэс перепечен-табанен утялтыны но дасесь. Концертъёссы но дунтэк луозы, шуо.

Элина Кумачёва
Туспуктэмез: udmfoto.ru

Уд тодӥське, мар кузьманы матысь адямидылы? Брангуртысь песянайёс ӵекто: пӧртэм буёло шортлэсь мунё лэсьтэ.

Мунё лэсьтон сярысь малпанзы песянайёслэн йыразы шуак чилектэм, пичи дырзэс тодазы вайыкузы. Шудонъёс ӧй вал бере, соосты асьсэос лэсьтылӥзы. Озьы пичи дырысь мунёзы салам интые коть луоз, малпазы. Шуд, азинсконъёс сӥзьыса, кӧнязэ ке кузьмазы но. Тау каронъёс вуылыны кутскизы! Шуо, милям мунёосмы, пе, удалтон ваё.
— Одӥгзэ мунёмес кузьмамы вал Ижысь соку-соку гинэ кутскись модельлы Настя Ивановалы, — тодаз вае Ольга Туктарева. — Ми соин ӵош одӥг журналлы фотосессия ортчытӥм. Алигес Настяез нош ик пумитамы аэропортысь. Туж тау кариз: оло, мунёдылы луыса но, пе, топ-модель луи, али ужасько Италиын…
Табере песянайёслэн ваньмон дырзы кылдэ гинэ, соку ик кузьымъёс дасяны кутско. Мунёос лэсьто аэропортын но, вокзалын но, самолётын но, катанчи  сьӧрын но… Туж, пе, потэ: шудо адямиос пӧлазы тросгес мед луозы.
— Мунёосмес дасяськом Ижын ортчоно концертмылы но, — шуо песянайёс, — юрттӥськисьёсмылы кузьмалом.
Со мунёосты лэсьтыны чик но секыт вылымтэ. Та нуналъёсы песянайёс мастер-класс ортчытӥзы.
Со понна кулэ луозы одӥг яке кык буёлэн шорт, качы.
1. Шортэз 13 пол котыртоно ньыль чиньыос котыр — пӧрме кульчо.Та луоз мунёлэн мугорыз.
2. Ог 50 сантиметр кузьда шорт вандоно (мунёез чыртые ошон понна со кулэ), поттоно кульчо пыр.
3. Кульчолэсь огпалзэ вандоно — со луоз мунёлэн дэремез.
4. Дасяно эшшо одӥг кульчо, кык пал пумзэ но керттылоно. Мунёлэн киосыз дасесь.
5. Нырысетӥ кульчоез кыклы люконо, вискытӥзы киосты поттоно.
6. Мунёлэсь мугорзэ эшшо кык интыетӥ керттоно йыр но кус лэсьтон вылысь.

Удмурт Дунне
By Удмурт Дунне 15 февраля, 2013 17:49