Мисс пальпотӥсь

Удмурт Дунне
By Удмурт Дунне 26 февраля, 2013 11:58

Мисс пальпотӥсь

Настя Петрова

Настя Петрова

Кин луоз фин-угор чеберай?

«Фин-угор студентъёслэн чеберайзы» ӵошатскон ортчоз туэ южтолэзе Саранск карын. Конкурсэ фин-угор шаеръёсысь вузъёс гинэ пыриськыны быгато.

Ӵошатскон кыкетӥ ползэ гинэ радъяське ай. Саранскысь эрзя но мокша бускельёсмы уж борды куаж-куаж басьтӥськизы: ужрадлэн данэз пумен будэ. Кылем арын вормисез луиз Саранскысь Татьяна Дудникова, туэ

Кузонысь со «Поволжьеысь Татьяна» нимен бертӥз на.
Удмурт кун университетын кастинг (быръён) ортчиз. Университетлэсь данзэ утёз удмурт кылосбур факультетын 4-тӥ курсын дышетскись Анастасия Петрова. Настя Италмас луэ студсоветлэн тӧроез, пӧртэм ужрадъёсы мыло-кыдо пыриське. Ушъяськыны быгатэ «Мисс Удмуртлык» ӵошатсконын вормеменыз, «Чеберай-2010» вожвылъяськонын синэз мальдытэменыз. Соку ӧз вормы… удмурт кылэз тодымтэеныз сэрен. Табере нылаш анай кылыныз чылкыт вераське.

Кылем арын фин-угор чеберай луон понна вожвылъяськонэ удмурт кылэз тодӥсьтэм нылмурт сюриз. Социальной коммуникациосъя факультетын дышетскись Светлана Борцовалы кылэз тодымтэез вормыны люкетӥз.

Гужем Настя Петрова Кузонын ортчись Дунне универсиадае пыриськоз. Али студенткалэн пӧсь вакытэз кутске. Саранскын 21-тӥ южтолэзе ортчоно вожвылъяськонлы Настялы видео-визитка дасяно, удмурт эпосысь яке мадёсысь героиняен тодматоно, калык сюан дэремез но «Масторава» сузьетысь дӥсьёсты возьматоно, талантэныз но визьмыныз паймытоно. Нылашлы Внеучебной ужъёсъя управлениысь Юлия Воробьёва но егит, капчи мылкыдо командаез юртто.

— Оскисько, Настялэн одно ик пӧрмоз! — шуэ ӵош дышетскись эшез Вова Вахрушев. — Мон Италмасэз кемалась тодӥсько ини. Со быгатэ ассэ калык азьын зэмос чеберай кадь возьматыны. Настяен туж данъяськисько.
УдГУ-ысь кастинге вуэмъёс пӧлын висъяськизы мукет нылашъёс но. Вуоно географ Катя Тимерханова фин кылын Yesterday кырӟанэз кырӟаз. Социальной коммуникациосъя факультетын тодон-валан басьтӥсь Альбина Григорьева быгатыса гармошкаен шудӥз. Нылъёслы дӥсьтон ӧзгес тырмы. Настя кузь куко луэменыз гинэ ӧз висъяськы, капчи мылкыдо но лэчыт визьмо луэмзэ возьматӥз. Кыӵе быгатонлыкъёсыд вань шуыса юамлы шуге-леке ӧз вуы, меӵкытӥз:
— Профессионал кадь пальпотӥсько.

Шара сямо нылашез одно ик вите вормон, ми оскиськом!

Елена Петрова

Удмурт Дунне
By Удмурт Дунне 26 февраля, 2013 11:58