Вожмаськыса вожояськизы

Удмурт Дунне
By Удмурт Дунне 14 января, 2013 16:22

Вожмаськыса вожояськизы

vozhoИжысь Тодосчиослэн юртазы, Пӧртмаськонлы но Вуж Выль арлы сӥзьыса, бадӟым ужрад ортчиз.

— Пӧртмаськонлы сӥзем ужрадмы туэ ньылетӥзэ ортчиз ини, — вера ужрадэз радъясьёс пӧлысь одӥгез Раиса Корепанова. — Арлы быдэ татчы тросгес но тросгес адямиос кыстӥсько. Калыкез шулдыртыны пӧртэм коллективъёсты ӧтчаськомы. Ужрадамы шулдыр мылкыд сётӥзы Ижысь «Ӟардон» но «Тюрагай» калык ансамбльёс, Дэри ёросысь Ягулысь «Ягдор», Пероггуртысь «Кильтырнаос», Дэри черкогуртысь «Вуюись» коллективъёс.

Ми асьмеос ик сценарий гожтӥськом, Нимысьтыз дӥсяськыса лыктэмъёслы кузьымъёс луо. Пӧртмаськон, маскаръяськон но тунаськон сям-йылолъёс котькуд гуртын ас сяменызы утиськыса возисько. Соин ик ваньмызлэн лыктэмъёслэн асьсэлэсь тодэмзэс адӟытэмзы но возьматэмзы потэ.

Пӧртмаськонын ӧз чалмылэ кичабонъёс, серекъянъёс, эктон-кырӟанъёс но шулдыръяськонъёс.
— Уг луы ни татысь озьы гинэ ӵыдыны, — ас мылкыдзэ кисьтэ Дэри ёросысь СтароБор гуртысь Лидия Чернова. — Газетысь ялонэз адӟи но, малпасько, одно ик мыно. Тазьы ветлон понна юри удмурт дэрем вуртытӥ. Поездэ пуксьыса, эсьмаса, огнам удмуртъёс доры кошкисько. Ӟуч гуртын улӥсько бере, туж мӧзмисько мон. Дото шумпотӥсько, тазьы ветлыны быгатӥсько на ай шуыса.

— Нош ми кыӵе лӧптэмын! — итӥське Пероггуртысь «Кильтырнаос» ансамбльысь Мария Ешманова. — 13 кузя ветлӥськом коллективамы, огезлэн но лыктытэк кылемез ӧз поты. Нош кӧня пӧртэм тунаськонъёсты сьӧрамы вайимы. Ваньзэ возьматыса но ум вуэ, дыр. Митэк но трос татын калык. Егит дыръя мар но ум дауртӥське вал. Бызёмы-а, ум-а шуыса, кӧня уйёсы тунаськыса поталлямы. Берыктэм шубаосын коркась коркаетӥ пӧртмаськыса ветлылӥмы. Нокин но уг улля вал, ай киямы кыӵе ке гинэ но, сютэм аръёс ке но вал, сиён сётыса келяллязы. Пӧртмаськыса ветлон — со уродзэ, аламзэ келян вакыт ук.

— Пӧртмаськонмы умой пӧрмиз, — вера ужрадэз кичӧлтӥсь тодосчи Альберт Разин. — Но тросгес мед пыриськозы вылэм егитъёс. Удмуртъёслэн шулдыръяськемзылы паймисько: ымтыр но аракы юытэк, мылысь-кыдысь шулдыръясько. Шумпотоно, ужась калык утьыса возе вашкалаосмылэсь сям-йылолъёссэ. Тросэз адямиос асьсэды господаос кадь возё. Нош господаос шулдыръяськыны уг быгато.

Тани басьтом туала сюанэз. Отын медъям муртъёс ужало. Нош сюанчиос пуко. Егитъёслы дискотека мед луоз, отын одно ик юон. Кузебай Герд но, Трофим Борисов но пӧртмаськонэз, шайтан уллянэз, нуны сюанэз, маскаръяськонэз, йыр-пыд сётонэз эскеризы, асьмелы соосты вунэтоно ӧвӧл. Пусъеме потэ: зэмос удмуртъёс туж йӧноесь, ужаны быгатӥсесь, соос одӥг вамышсэс но малпатэк уг лэсьто, одӥг кылзэс но малпатэк уг верало. Цивилизация адмиез сӧре, керетӥсь, керӟегъяськись, вылтӥяськись каре. Гуртысь егитъёс доры бадӟым городъёсысь со сямъёс вуо ук. Соин ик егитъёс асьме пытьы кузя мед мынозы вылэм.

— Арысь аре калык трос люкаське бере, — вера городысь удмуртъёслэн азьветлӥсьсы Пётр Бобров, — азьланяз малпаськомы филармоние куриськыны. Жаляса верано, ӧвӧл асьмелэн, удмуртъёслэн, огинэ люкаськон интымы. Со сярысь кивалтӥсьёслы малпаськыны кулэ ни вал, дыр.

— Ярам ай, Тодосчиослэн юртсы вань, — итӥське тодосчи, профессор Иван Рысин. — Но шулдыръяськыны ӟоскытгес луэ ини. Нош кутскем ужез аналтыны уг яра ни, культурамы тазьы ке но мед азинскоз.

Любовь Тихонова

Туспуктӥз Леонид Гонин

Удмурт Дунне
By Удмурт Дунне 14 января, 2013 16:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<