Владимир Соловьёв: Льӧль малпанъёсын уг улӥськы

Удмурт Дунне
By Удмурт Дунне Январь 11, 2013 10:33
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Владимир Соловьёв:  Льӧль малпанъёсын   уг улӥськы

Егитъёсын ужанъя министерствоын

50 арессэ пусйиз егитъёсын ужанъя министр Владимир Соловьёв. Кыӵе мылкыдыз солэн туннэ?

— Мон уг шӧдӥськы арлыдме, — веранзэ мытэ Владимир Михайлович. — Зэмзэ верано ке, вордӥськем нуналме ноку нимысьтыз пусъеме ӧвӧл. Пичи дыръям гуртын со пумысен праздник лэсьтон сяме пыӵамын ӧй вал уго. Соин ик ӝӧк сьӧрын шулдыръяськыны дышытэк кыли. Оло, соин но вордӥськем нунал мылкыдме сура-пожа гинэ. Ма, со нуналэ тыныд ӟечсэ гинэ сӥзё. Нош мон асме тодӥсько ук, валасько: верам кылъёссы пӧлысь 20 процентэз гинэ зэмлыко, мукетъёсыз — юромо та нуналлы дасям чебересь кылъёс. Зэм, телефонме уг кысӥськы. Но та нунал вамен выжыны ӝоггес луысал ке, лул вылам капчигес луысал, дыр.

— Но асьтэ азьын ке но кыӵе ке йылпумъянъёс лэсьтӥськоды, дыр, ук?

— Ӝыны даур мышке кылемын — малпаськытэк уг луы. Зэм, ӧй пукы гожъяса, мар мон лэсьтӥ, татчыозь кӧня кило груз ӝутӥ, кӧня иськем ортчи. Но оглом учконо ке, мон шудо адями, мынам ваньмыз вань. Семьяе, нылъёсы шумпотто. Бадӟымез нылы кылем арын бызиз. Ӝоген нуныкай кузьмалозы, вылды. Апайёсы тазалыксы вылэ уг ӝожтӥсько. Тятяе быдэс ай. Жаль, анае ӧвӧл ни. Но ӵыжы-выжыосы ванен шудо ни мон.

Собере, мон льӧль малпанъёсын уг улӥськы. Адями маке сярысь малпа ке, сое возьманы, солы дасяськыны кутске. Нош улонын ӵемысь мылпотэмъя гинэ уг луы. Та мылкыдэз куашкатэ. Соин ик туннэ нуналэн улыны капчигес. Зэм, квартирае понна кредитме но тыреме потэ ни вал, 15 аръем машинаме но воштысал. Но со ваньмыз ваньбурен герњаськемын, со адямиез шудо уг кары. Туннэ монэ бурдъя семьяе. Туж кельше уже.

Семьяен

— Егитъёсын ужанъя политикаын мар выльзэ лэсьтоды?

— Бугыртыны капчи, дыр, нош вужзэ но ӟеч ужась системаез азьланьтыны быгатонлык но кужым кулэ. Вужезлэсь палэнтӥськеме уг поты. Зэм, воштӥськонъёстэк уз ортчы 2013-тӥ ар. Бадӟымгес саклык висъяломы егитъёсты йыруж лэсьтонлэсь утёнлы. Уногес сюлмаськыны кутскомы гуртын улӥсь пиналъёс сярысь, соослэсь югдурзэс капчиятыны выромы.

Туала арын егитъёс туж дӥсьтӥсесь, котьмалы дась луисесь. Эшшо мед быгатозы на вылэм сётэм кылзэс пумозяз быдэстыны, верамъёссы понна гордэктонэз медаз тодэ вал. Но туала арын Интернет, телевидение ӵушизы, шуыны луоз, «кыл кутон» кыллэсь пуштроссэ. Ӵем вунэ «визьнодан» кыл но. Монэ, кивалтӥсез но атаез, та сюлэмшугъяськытэ.
Депутатъёслы адямиос ӵемысь наказ сёто: выж лэсьтоно, сюрес тупатоно, клуб ӝутоно.

Армиын

Нош адями сярысь, кин со шуыса, туннэ малпаськисез ӧжытгес но ӧжытгес кыле. Ярам, Президентмы Владимир Путин али ӵемгес вераськыны кутскиз адямиез будэтон сярысь. Та шумпоттэ. Аракы, шузимытӥсь сурет, йыруж уго уката золгес аляны быгатозы, визьнодан пумысен тодамы ӧм вае ке.

— Интернет вотэсысь «ВКонтакте» сайтын усьтӥськиз Егитъёсын ужанъя министерстволэн аслаз бамез. Асьтэос отчы макем ӵем кожаськоды?

— Со бам усьтӥськемен валче министр доры личной приёме пятницае куриськисьёс ӧжытгес кылизы. Зэм, куд-огез монэ вазь ӵукна ик министерствоысь кырме ни — вазь султэмме тодо. Но «ВКонтактеын» ужаны кутскеммы бере дорамы олокыӵе но юанъёсын-куронъёсын вазиськыны, сюлэм вӧсьсэс вераны ӧдъязы. Куд-огез уксё куре. Специалистъёсын кенешимы тазьы: бам борды юнматомы нимысьтыз адямиез, вань вуэм юанъёсты со мон дорозь вуттоз, соослы валэктон сётоз, мынэсьтым мылкыдъёсме одно санэ басьтыса.

Елена Сараматова

Удмурт Дунне
By Удмурт Дунне Январь 11, 2013 10:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<