Визнан си

Удмурт Дунне
By Удмурт Дунне 22 января, 2013 10:15
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Визнан си

Кристина Тот

Кристина Тот

Кристина Тот. Верос

— Эшшо кӧня ке нянь сёт на!
— Нош няньлэсь соослы урод уз-а луы?
— А-а, котькин сое сётэ ук.
— Озьы ке но, со ӟеч лэсьтэ шуыса, тодмо ӧвӧл на. Ӝушсы нош изыны быгатоз-а?
— Керетэмед потэ-а?
— Кышкасько гинэ, соослы мар ке но луоз шуыса.
— Соку ӧй курысалзы. Пудо-животъёс тодо, мар соослы умойгес.
— Адямиос но…
— Тон нош ик кутскись-код-а?

Одӥгез юсь, чукин-бекин лёгаськыса, ярдуре потэ, паськыт кандыко пыдъёсыныз  изъёс пӧлтӥ шурдысагес вамышъя.

— Учкы, кыӵе мусо! — шуэ нылаш.
— Возьма, мон тонэ соин туспукто!

Пияш кельтэм песьтэрез доры бетон ярдуре тубе, отысь аппаратсэ поттэ. Со кроссовкиен но горд вакчи штанен, йыраз — горд бейсболка.
— Ну, ӧжыт ке но учкы ини тапала!

Нылаш, пияшлы тыбырыныз берытскыса, лаптӥське, объективын адӟисько векчи кало топен пельпум,  кузь курень йырси быж  но  юсьлэн нянь юдэслы кыстӥськись чыртыез гинэ.
— Курисько,  учкы ини татчы!

Нылаш уг берытскы. Пияш аппаратсэ палэнэ понэ, берен изъёс пӧлы мынэ. Егитъёс ог-огзы вӧзы лаптӥсько.
— Али нош мар луэ тонэныд?
— Сое но-а  Фюредэ вайылӥд?
— Дугды ини.
— Вайылӥд яке ӧд?
— Тыныд та али малы кулэ?
— Туж кулэ. Соин но-а юсьёсты сюдӥд? Туспуктылӥд?

siКуараезъя нылаш ӧжыт гинэ уг бӧрды, но сьӧд очкиез синъёссэ ватэ.
— Барабыр ӧвӧл-а? Али ми татын тонэн ӵошен, мар кулэ на?  Вунэты ини!

Нылаш пурӟыса пичи нянь колӟоосты вуэ куя, юсьёс выйылӥсь комокъёс сьӧры донгаськыса уяло.  Нылаш эшшо но кыдёкегес лэзьяськыны кутске — сопала-тапала.
— Сое но-а туспуктӥд?
— Инмаре, дугды ини.
— Уг дугды. Тодэме потэ.
— Ӧй.
— Мыным вӧсь медаз луы шуыса гинэ, юри озьы вераськод.

Пияш шуак султэ, юри, туж тыршыса, синмыныз кыдёкысь пыжъёсты утча.
— Каллен мыныны быгатысалмы.
— Тыныд монэн урод, озьы ведь?
— Ӧвӧл мыным тонэныд урод, адӟеме гинэ уг пот,  вис карытэк со сярысь вераськиськод шуыса.
— Иське, ма сярысь вераськом?
— Верам ини, вунэтом шуыса,  яке ӧм-а? — пияш куаразэ будэтэ.  — Вераським, озьы-а?!
— Но мон уг быгатӥськы вунэтыны.
— Соку эн луы монэным.
— Озьы-а потэ? — нылаш ӧжыт гинэ уг бӧрды.
— Татын эшшо нянь вань на. Учкы, кыӵе возьмало.

Юсьёс чыртыоссэс золто. Витьымтэ шорысь палэнысь вылез уллё матэктэ — ярдурлэн мукет люкетаз кин ке соосты сюдэмысь дугдэм. Одӥгез тылобурдо бере кыле, мае ке сыскыса кадь.

Мукетъёсыз ярдур пала вуо, ныръёсынызы вуэз гырыса кадь мыно. Нылаш табере, али вуэмъёсызлы но мед сюроз шуыса, нянь куя.
— Учкы ай созэ, сьӧрысьтызы, соизлы ӧз йӧты! — пияш самой берпуметӥез шоры возьматэ.

Нылаш шораз яратыса учке, сьӧд очкизэ выллань ӝутэ.
— Кушты тон солы, тон кыдёкегес быгатод.

Нянь юдэс кыдёке ик уг вуы, пырак изъяр вӧзы сачкиське.
— Адӟиськод ук, уг быгатӥськы кыдёке зӥръяны.
— Нош Эдина бадӟымгес ик вормонэд вал — мургес зӥртӥд…

Пияш быдэс нянез  сачак! вуэ сале но ярдурлэн вылӥяз тубе, нылаш огназ кыле.
Уллёлэсь палэнэ кылем юсь матэгес вуэ, кежегъяськыса тазатэ тылыоссэ, бурд улаз бугыръяське, йырзэ чукинтыса, ымзэ усья.
— Лык берен!

Пияш нылашлэн вош-тӥськем куараезлы пайме,  ярдурлэн улӥяз ваське.
— Учкы ини, таин мар ке но луэмын! Сыӵе йӧспӧртэм йырзэ кыска. Адямилэн пеляз ву пырыку кадь.

Кырымпыдэс вылазы пыкъяськыса, егитъёс уллань васько, тылобурдо доры матэгес карисько. Юсьлэн ымысьтыз кузь визнан си мычиськемын, силэн пумыз кытын ке кыдёкын ву вылын веттаське. Ым котыраз пичи котырес узвесьёс ошисько.
— Инмаре, куанер, уг быгаты сялӟыны! Ойдо юрттом солы!

Пияш нюштыр-нюштыр юсь дӥне мынэ, тани-тани матаз вуоз, киысьтыз нянен гочатэ. Тылобурдолэн йырыз киын сузьымон матын луыса, пияш визнан сиез зӥрак кутэ, кыскыса утча. Юсь кышкатске, кыдёкегес полыса, нош ик йырзэ сэзъя.
— Уг луы поттыны. Курикез ньылэм.
— Кызьы-озьы ньылэм?
— Озьы ик, ымаз басьтэм но ньылэм. Кыски ке, соку кӧтсюлыз потоз. Ум йӧтылэ сое.
— Соку со кулоз! Кутом сое кызьы ке но, нуом пудо эмъясь доры!
— Нош кызьы кутыны малпаськод?

Нылаш зар бӧрдэ, ымнырыз кузя синкылиос васько, ныркышетсэ утча.
— Уг тодӥськы. Кут, туж курисько. Туж курисько. Туж курисько.

Пияш, изъёс борды канжалляськыса, юсь сьӧры мынэ.
Но юсь берыктӥське,  бадӟым ву пала полыса, ӝушаз курикен, ымаз веттаськись визнан сиен. Дырын-дырын тыбыраз нырыныз  йӧтскылэ, собере пумен палэнэгес,  пумен кыдёкегес  Фюред тыметлэсь уяса кошке.

Берыктӥз
Екатерина Ермакова,
УдГУ-ысь студентка

Туспуктӥз Дарали Лели

Удмурт Дунне
By Удмурт Дунне 22 января, 2013 10:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<