Усьтон

Удмурт Дунне
By Удмурт Дунне 22 января, 2013 09:07

Усьтон

А. Ермолаев

А. Ермолаев

Кылем ар пумын Удмурт кун университетлэн издательствоез поттӥз «Удмурт литератураысь дас дано ним» хрестоматия. Татчы пыртэмын тодмо удмурт критиклэн Алексей Ермолаевлэн шаерысьтымы писательёс сярысь гожъям статьяосыз, соос пӧртэм аръёсы печатламын республикаямы потӥсь газет-журналъёсын.

УдГУ-ысь удмурт литературая но Россиысь калыкъёслэн литературазыя кафедра, кудӥныз кивалтэ филология наукаосъя доктор Татьяна Зайцева, улонэ пыӵатэ бадӟым ужез — удмурт критикъёслэсь библиотеказэс кылдытэ. Отчы люкамын луозы литератураез эскерись-дунъясьёслэн газетъёсын-журналъёсын потэм статьяоссы но республикаысьтымы радиолэн но телевиденилэн фондъёсазы кылем вераськемъёссы.

Нырысетӥ книгае пыризы литературоведлэн Алексей Ермолаевлэн ужъёсыз (соосты люказ писательлэн кузпалыз Нина Ермолаева). 1950-тӥ аръёсысен кутскыса, «Дась лу!», «Комсомолец Удмуртии», «Советской Удмуртия», «Удмурт дунне», «Молот», «Кенеш» но «Вордскем кыл» газет-журналъёсын потэм статьяосыз сӥземын дас тужгес тодмо писательёсмылы, кудъёссэ Алексей Афанасьевич удмурт музъемлэн генийёсыз шуэ вал. Со нимъёсты асьмеос туж умой тодӥськом: К. Митрей, К. Герд, А. Оки, Г. Медведев, М. Коновалов, М. Петров, И. Гаврилов, Г. Красильников, Ф. Васильев но П. Чернов. Соос туала лыдӟисьлы яркыт возьмато XX даурлэсь шокамзэ, удмурт литературалэсь улэмзэ.

Писательёс пусъё вал критиклэсь дӥсьтӥсь но зэмлыко луэмзэ. Шуг-секытъёслэсь но кыл кылонлэсь кышкатэк, со сюлмаськиз репрессия улэ шедем писательёслэсь произведениоссэс книгаен поттыны но соослэсь творчествозэс утьыны.

Книгаез лыдӟыса, валаськод: та статьяос пӧртэм аръёсы гожтэмын ке но, туннэ но тунсыко луо. Со уката но юрттоз, дыр, студентъёслы удмурт литературалэсь ортчем вакытъёссэ умойгес тодыны, писателез но солэсь произведенизэ мургес валаны, котыр ласянь эскерыны.

Тани удмурт классиклэсь Г. Красильниковлэсь произведениоссэ эскерыкуз, Алексей Ермолаев гожтэм: «Улонэз выжыятыса ик возьматыны тыршеменыз, Геннадий Красильников туала удмурт прозаямы азинтӥз реализм амалэз. Со пумен мозмытскиз адямиосты сьӧд я тӧдьы буёлъёсын гинэ суреданлэсь, соосты меӵак гинэ ваче пуктылонлэсь. Солэн геройёсыз пумен луизы полэсо-полэсоесь, ӟугресэсь, сыӵеесь, кыӵе луо адямиос зэмос улонын».

«Удмурт литератураысь дас дано ним» книгаысь асьсэлы тунсыкозэ шедьтозы дышетӥсьёс, пиналъёс но студентъёс. Мон, кылсярысь, нырысьсэ лыдӟи Михаил Покчи-Петровлэсь «Усьтон» кылбурзэ. Та кылбур поэтлэн «Малпаськон» сборниказ пырыны кулэ вылэм. Но М. Петровлы со чуръёсыз лябесь потӥллям но соосты корректураысьтыз куштэм. Та страницаез А. Ермолаев утем, нош толэзь ортчыса, М. Петров бырыны шедиз. Озьы та кылбур ӧз ышы, туннэ соин тодматскыны луонлыкты вань:

Михаил Петров
Киям усьтон…
Ма мыдронэз?
Мултэс маке кадь
син азьын.
Нош малпано ке умойгес,
Кулэлыкез солэн бадӟым.

Со пичияк арбериен
Луэ бадӟым юртэ пырам.
Сое ыштӥд ке янгышен,
Уд сюр ни ас улон дорад.

Поэт сюлмам но йырвиям
Таӵе усьтон ке луысал,
Соин, эшъёс, вань ултозям
Калык сюлме мон
пырысал.

Галина Семёнова

Удмурт Дунне
By Удмурт Дунне 22 января, 2013 09:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<