Улонэ — кырӟась арган

Удмурт Дунне
By Удмурт Дунне 25 января, 2013 12:24

Улонэ — кырӟась арган

Тимофеев кузпалъёс

Тимофеев кузпалъёс

Елена Тимофеева — Пичи Пурга ёросысь Куреггуртысь нылпи садэн кивалтӥсь. Сайкыт, небыт куараё паймымон нылкышно. Россия Федерациысь дышетон удысысь дано ужась.

— Вордски мон Пичи Пурга ёросысь Курег казармаын (чугун сюрес вылын ужасьёслы пуктэм коркаосын ульчаез озьы шуиллям). Семьямы бадӟым вал — вить нылпиос, ваньмы ик кырӟаны, арган кысканы, эктыны мыло-кыдоесь. Атаймы арганэн шудэ, анае но пинал дыръяз кияз кутылэ вылэм.

— Елена Ивановна, нош тӥ ку кутскиды крезьгурен тунсыкъяськыны, арган борды ик кырмиськиды-а?

— Школае мыныса, крезьгуръя урокъёсты туж яратылӥ. Нош арганэн шудыны дасэтӥ классын гинэ дыши ай. Мынам вынъёсы но, сузэре но арган борды бурмемын. Тани сузэре — Ольга Зайцева — нылыным Лариса Тимофееваен (Петроваен) ӵош «Айкай» театрын ужало. Вася выны, 1-тӥ классын дышетскыкуз ик, Москвае но вуылэмын, арганэн шудыса. Москвичъёс, пе, паймыса учко аслэсьтыз бадӟым арганэз кыскась пияш шоры, «этот хлопчик сам играет, что ли?» юало, пе. Милемыз нокин но нимысьтыз шудыны ӧз дышеты. Туж кельше вал мыным, кызьы атае удмурт эктон гуръёсты капчияк гинэ пуктэ, пыдъёс асьсэос эктыны курисько, таизлы сыӵе вожъяськылӥ. Соин, вылды, мон но эктон гур бордысен ик кутски. Нотаосты кылэмея-шӧдэмея утчасько вал. Собере сюанъёсы но шулдыртылыны ӧтчазы ни.

— Нош мар муген филология удысэз бырйиды, Удмурт кун университетэ вамыштӥды?

— Университетэ мынӥ «Чипчирган» ансамбль понна. Сокем отчы ветлэме потэ вал. Студент вакытме малпасько ке, йырам утыр ик берганы кутске «Чипчирган». Ансамбле куриськыны мынӥ но, быгатэмме возьматыны косӥзы. Арганэн шудыны быгатӥсько шуыса, кытысь ке тодӥллям ни. Кырӟаны косӥзы на — тазэ мон копак уг пӧрмытӥськы ук, малпасько, нёшто уз басьтэ? Кутӥзы — сюрес усьтӥз ӵапак арганэн шудыны быгатэме. Кытчы но ӧм вуылэ ансамблен!!! Кыӵе но учыръёсы ӧм сюрылэ.

Одӥг пол Чувашие ветлӥм. Новочебоксарск городын шудыкум, вӧзам пуны пуксиз но ну, кырӟа ук! Нош огаз колхозын клубзы уг ужа, тылзы, пе, кысэмын. Куазь югыт вал али, шуныт. Кырын, пе, кырӟалэ-эктэлэ. Сцена ӝужыт, медам усе шуыса, кирпичъёс пуктылӥзы но визьмазы: татӥ-татӥ ветлыны уг яра. Нош ми эктӥськом ук! Тапыртон вискын огезлэн нылмылэн пал пыдыз пулъёс вискы кошкиз. Таӵе дыръя кырӟалод на, пе — гориськом. Выльысь кырӟаны кутскиськом но — мукет нылашмылэн серемез потэ, нош ик гориськом. Одӥг кырӟанмес, ньыль пол-а, мар-а кутскыса, мырдэм йылпумъям. Та учырез Розита Андриановна Анкудинова, «Чипчирган» ансамблез кылдытӥсь но кема аръёс ӵоже кивалтӥсез, ансамбльлы сӥзем книгае но гожтэм вылэм.

— Озьыен, Инмарен сётэм быгатонлыктэс Розита Андриановна шараяны тыршем…

— Озьы луэ, мон ноку но сое вунэтыны уг быгаты. Улонысь кошкиз шуыса ивор вуиз но — синкылиосме дугдытыны ӧй ни быгаты. Весяк улоз малпасько вылэм-а, мар-а. Кыӵе со нотной грамоталы милемыз дышетыны турттэ вал. Улонады со кулэ луоз ай, берло валалоды, шуылӥз. Ӧз янгыша. Макем паймымон кышномурт вал со! Выжыезъя ӟуч адями пыӵатыны быгатӥз удмурт культураез, сямъёсыз гажан мылкыд. Малпасько, солы луыса но мон адямие потыны быгатӥ.

— Артист луыны мылкыдды ӧз-а кылды?

— Ӧз, ӧз. Артист луыны ноку ӧй малпалля. Сокем кепырась-а, мар-а мон. Сцена вылын сомында эктыса-кырӟаса но, мон нокызьы но возьдаськонме ӧй вормы.

Университет бере ужан сюресэ туж огшоры кутскиз. Роно ыстэмъя одӥг ар ужай Пугачёвоысь школаын, ӟуч кыллы дышетӥ.
Пичи Пурга районысь Куреггуртэ ик бызи но — гуртысь калыкез коллективе люкай. «Чипчирган» бере таӵе самодеятельной коллективен кивалтыны быгатӥсько вал. Туж трос адями — 40 пала — мыло-кыдо ветлӥзы. Клубмы но ӧй вал. «Конюховка» шуо милям, отын люкаськылӥмы. Собере клубмы но кылдылӥз, отын ужаса вуттӥм. Сыӵе мыло-кыдо ужан вакытамы Эстоние фин-угор фестивале но потаммы вань. Нош 1985-тӥ арын Куреггуртысь нылпи садэн кивалтыны кутски.

— Кырӟась-верась муртлы удалтэ, вӧзаз сыӵе ик адями тупа ке…

— Эн но вера. Картэ ачим кадь ик — кырӟалоз но, эктоз но. Ивиеным кузпалъяським дышетсконме быдтэме бере. Ар ортчыса, Алёшамы вордӥськиз, эшшо кык но ӝыны ар улыса, Лариса нылмы кылдӥз на. Картэ мынам туж умой, лякыт. Тани монэ быдэс улонмес ини доча шуэ, со понна Ларисалэн но мукет нимыз — кенак.

Нылпиосы пичи дыръя мынам ӵапак тужгес азинлыко ужан вакытэ вал, дыр. Пӧртэм конкурсъёсы потамы. Нылпиосылэн но Инмарен сётэм быгатонлыксы вань. Тани Ларисамы кык арескын сцена вылэ потӥз. Витетӥ классэ со мынӥз ни Иже — республикаысьтымы усточи нылпиослэн школа-интернатазы. Собере крезьгуръя училищеез быдтӥз, табере «Айкайын» ужа.
Алёшамес крезьгурлы нимысьтыз дышетскыны нокытчы но ӧм ӝуткалэ. Шӧдонэз солэн инкуазен сётэмын. Куараез туж паськыт. Мугорыз пичи ӧвӧл, но куддыръя туж паймоно: кытысьтыз та куаразэ поттэ? Пӧртэм инструментъёсын шудэ: арган но, гитара но, флейта но кияз кутылэ. Студент дыръяз «Чипчирганэ» ветлӥз. Собере, Баграш-Бигра школаын ужаны кутскемез бере, Пичи Пурга районысь «Зарни шеп» ансамбле эшъёсыныз ӵош пыриськиз. Али Баграш-Бигра школалэн директорез.

— Табере тӥ песянай но ӵужмемей ни. Нылпиосты асьсэлэсь пиналъёссэс тӥ сямен удмурт культураен герӟало-а?

— Ой, Лёшамы удмуртлык понна туж висе. Ларисамы но удмурт вераськыны дышетэ. Нылы семьяеныз городын улэ, пичи пиенызы удмурт верасько, вӧзысьтызы ӟучъёс талы, пе, дотово паймо. Нош мынам малпанэ одӥг: удмуртлы адямие потыны анай кылэз ик юрттэ.

— Нош нылпи садын удмурт кылэз кызьы пыӵатӥськоды?

— Милям Куреггуртмы ӟучомемын ӧвӧл. Садике ветлӥсь нылпиосмы — удмуртъёс. Соос ми доры удмуртэсь лыкто, удмуртэсь ик кошко. Удмуртлык понна нимысьтыз ум выриське — со милям нуналмысь ужмы, шулдыръяськон-а со, концерт-а — татын удмурт кырӟанъёс, кылбуръёс. Школаен туж кенешыса ужаськом. Ачим ик крезьгуръя занятиос но нуисько. Сюлмаськонэ бадӟым: пичи арганъёсы аламаесь ини, быремын. Верасько ке, ваньмыз сётом-сётом шуо, но арган мон дорозь ӧз на вуы.

— Тӥ зэмос удмурт нылкышно, котьку ветлӥськоды удмурт дэремен.

— Мон туж яратӥсько удмурт дӥськутэз, удмурт ужрадъёсы удмурт дэремен ветлыны тыршисько.

Анжелика Петрова

Удмурт Дунне
By Удмурт Дунне 25 января, 2013 12:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<