Кылбурчилэн но басня гожъясьлэн Ф. Суворовлэн книгаез потӥз

Удмурт Дунне
By Удмурт Дунне 22 января, 2013 17:39
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылбурчилэн но басня гожъясьлэн Ф. Суворовлэн книгаез потӥз

Ф. Суворов

Ф. Суворов

 Али гинэ «Удмуртия» издательствоын кылбурчилэн но сатириклэн Фёдор Суворовлэн «Азвесь зор» книгаез потӥз. Книгае пыремын кылбуръёс, сонетъёс но басняос. Удмурт литератураын басня гожъясьёс трос ӧй вал. Фёдор Суворов азьланьтэ та жанрез. Тросаз басняосаз со историысь луэм учыръёсты валэктэ, улон-вылонын кылдэм югдуръёсты сэрттэ-пертче, адямилэсь сямзэ возьматэ. Басняосыз  туала улон возьматӥське.

Фёдор Суворов вордӥськиз Ува ёросысь Сурӟи гуртын. Со — газетмылэн ветеранэз, кема дыр ӵоже «Шӧкыч» бамез нуиз.

azvesКожой но Пыӵ

Огпол, музъем зуркам бере,
Шуккиськыны шедиз Гондыр.
Вӧсь луэмлы йырыз курен
Бурсэ ук со ымтыр тэль тыр.
Ӵапак соку синмаз солэн
Куаръёс пӧлысь Пыӵед йӧтӥз.
Гондыр пукон вылысь ӝутскиз,
Бер пыдыныз ӝӧкез ӵыжиз
– Али ик со чачырасез
Татчы, кабинетам! – кеськиз.
Пыӵед сылэ куалекъяса,
Лулыз возьке на пыдтышказ.
Мырдэм-мырдэм викышъяса,
Кырыж куклэсь мырдэм юаз
– Я мар понна, Гондыр уром,
Янгыш луи та рад нош мон?
Пукон вылаз ӟукыртыса,
Гондыр бурсӥз пыкъяськыса:
– Эшшо паняс тон выриськод,
Монэ визьтэм шат малпаськод?
Тӥ тэтчамен сэрен уга
Арлы быдэ Музъем зурка!
Тань луиськиз сӧсыр-лебыр,
Лыос вазё лысыр-лосыр!
– Наукалэн гожъямезъя, –
Пыӵед кутскиз валэктыны, –
Музъем котьку ачиз зурка.
– Мизгир, монэ дышетыны! –
Пурӟиз Гондыр. – Мон возьмато,
Музъем кызьы ачиз зурка!
Гижыеныз Пыӵез кабаз,
Путэт вискы пыдло тулъяз.
***
Та пумысен мар верано,
Татын ӧвӧл трос тунано
Шуккиськыны шедем дыръяз,
Эн тэтча Гондырлэн матаз.

Удмурт Дунне
By Удмурт Дунне 22 января, 2013 17:39