Пыжкрезьлы синмасько финъёс

Удмурт Дунне
By Удмурт Дунне 15 января, 2013 16:04

Пыжкрезьлы синмасько финъёс

Удмуртъёслэн крезьзы тунсыко быдэс дуннелы

Удмуртъёслэн крезьзы тунсыко быдэс дуннелы

Вить силэсь ватосъёссэ утчан

24 ар талэсь азьло удмурт калыклы выльысь берыктэмын вал вашкала крезь.
Но аръёс ортчыса, югдур трослы ӧз воштӥськы. Туннэ асьмелэн крезьмы, удмуртъёслы матын луэм интые, тунсыкогес потэ финъёслы. Малы? Со пумысен кенешиськом Удмурт кун университетысь калык инструментъёсъя кафедралэн кивалтӥсеныз Татьяна Кунгуроваен.

— Татьяна Владимировна, 2011-тӥ-2012-тӥ аръёсы Удмуртия но Финляндия радъязы «Крезьгуро академия» проектэз. Ма муген та уж мытэмын вал?

— Финъёслэн кантеле инструментэн шудон сямзы-йылолзы кемалась дауръёсысен пыӵамын ни. Фин культураез кантелетэк син азе уд но пукты. Соос саклык висъяло академической амалэн шудонлы но, сиосты калык манерен кысканлы но. Кантелеез кырӟатыны финъёс дышетско нылпи садысен ик — 4-5 аресын. Нылпиосын шудо, кырӟало, вить сиен кантелеез уже кутыса.

Удмуртъёслэн но талы тупась крезьгуро инструментсы вань — пыжкрезь нимаськомы. Солэн вить сиез. Ми, профессионалъёс но, ӵемысь ум валаське солэсь ватэм мур пуштроссэ. Малы финъёс тэшкылиосты кантеле шудэм улсын визьмало? Покчи муртлэн йыраз но, визьмаз но кырӟанъёс, выжыкылъёс кылё, кантеле куараен герӟаськыса. Озьы быдэс культураез фин пиналъёс валаны кутско асьсэ кантелезылы луыса. Та ужан амал милемлы туж тунсыко потӥз.

— «Крезьгуро академия» проектэз кутскыку, нырысь финъёс асьме доры вуылӥзы…

— Озьы. Финъёс нырысь ик туж тунсыкъясько асьмелэн крезенымы. Соослы уката паймымон потэ солэн куараез, чузъяськемез. Та сярысь финъёс эскеронъёс но, наукая ужъёс но гожтыны ӝуткаськизы ни. Соин проектлэн огъя кылдытӥсьёсыз луизы удмурт но фин крезьгурчиос Сергей Кунгуров, Татьяна Фёдорова но Мина Раскинен. Кылем толалтэ Ижын радъямы конференция, татын ик мастер-классъёс но вал, концертъёс но. Фин эшъёсмылы милям ужаммы туж яраз. Озьы ӝыны ар ортчыса, Удмуртиысь группа Финляндие огъя ужен тодматскыны вуылӥз.

— Асьмелэн нылпи садъёсамы чузъясько фортепиано, баян, аккордеон, нош удмурт инструмент сярысь малпась ик ӧвӧл, лэся. Ижын ортчем «Ӵыжы-выжы» нылпи фестивальын возьматэм огез номер крезен герӟаськемын вал. Учкисьёслы со туж паймымон потӥз.

— Сергей Кунгуровлэн вал сыӵе мылкыдыз, нылпи садын пиналъёсты одно ик пыжкрезен мед дышетозы-визьмалозы шуыса. Огласянь со туж огшоры инструмент, но вылӥ тодон-валанэн адямиослы трос тыршоно луэ таӵе арбериен туж усто шудыны быгатон понна. Татын сюлмаськоно ни милемлы, крезьгурчиослы, кызьы пыжкрезьлэсь ватосъёссэ шараяно. Тани тодмо луэ ӟуч гусли. Сое котькинлэсь ӟеч тодӥз Великий Новгородысь реставратор но крезьгур удысэз эскерись Владимир Поветкин. Макем огшорыгес тусызъя инструмент, сокем умойгес тодыны кулэ солэсь ватосъёссэ, шуылӥз со.

Мон нуналмысь адӟи Сергей Николаевичлэсь ужзэ, сюлмаськонъёссэ. Но ас вылад вуытэк, ваньзэ пумозяз валаны уг луы вылэм. Финъёс дорын мон мукет омырен шокай кадь, шӧдӥ, ас синмыным адӟи. Но ваньместы отчы нуыны уг луы ук. Табере милям быдэстоно ужмы туж бадӟым — валэктоно мӧйыослы но, пичиослы но.

Зэм, финъёсын уд ӵошатскы. Тани огшоры крезьгуръя школалэн кивалтӥсез аслаз учрежденияз басьтыны быгатэ электрон кантеле. Солэн дуныз 50 сюрс евро. Асьме уксёен — 200 сюрс манет.  Милям одӥг  школа но сыӵе инструмент басьтыны уз пӧрмыты. Но ужпум туннэ крезь бордын ӧвӧл. Нырысь ик воштоно музыкантъёслэсь мылкыдзэс.

Крезь — огшоры инструмент, но со котькуд сиеныз удмуртлык пыӵатыны быгатысал, будӥсь муртлэн сюлэмаз шаердэ яратон тысь уськытысал. Крезь си тупа котькыӵе кырӟанлы, котькыӵе калыклы. Финъёс нимысьтыз саклык висъяло сӧсыр муртъёслы — соосты кантелеен шудыны дышето. Туж тодмо но дано музыкантъёссы таӵе уже, дышетонэ пырисько.
Соин ик туннэ мон туж бадӟым ужпумез адӟисько — пыжкрезез калыке вӧлмытоно но сӧсыр муртъёслы крезь си пыр юрттэт сётоно.

— Мылкыд карись муртъёс кыӵе крезьгуръя школаын быгатозы крезен шудыны дышетскыны?

— Таӵе интыос чиньыен лыдъямон гинэ. Туж тодмо Воткаысь педколледж. Ижын та удысын кутскон сётэ 56-тӥ гимназия. Ёросъёс пӧлысь висъясал Вавожез, Алнашез но Пичи Пургаез. Туннэ крезьгуръя школаосын пиналъёс мыло-кыдо курисько шудыны гитараен, фортепианоен но синтезаторен. Уго та инструментъёс котькытын чузъясько. Но со вакытэ ик таӵе инструментэн шудӥсь удмуртъёс нокинлы но тунсыко уз потэ. Палэнын улӥсьёслы паймымон асьмелэн калык крезьмы. Но Удмуртиысь крезьгуръя школаос таӵе классъёс уг усьто, анай-атайёс уг тодо крезь сярысь, уг куро сое. Соин валэктон уж радъятэк, югдурез уд вошты.

— Ярам, шуом маке муген вань школаосын усьтӥськизы крезен шудонъя классъёс. Нош дышетӥсьёс луозы-а?

— Таиз но сюлмаськон вань. Уката ик Ижын. Малы ке шуоно крезез тодӥсь вылӥ тодон-валанэн егитъёс городэ уггес кылё. Уждунзы туж ӧжыт, кӧня ке интыын тыршыса но, патер понна тырымон гинэ люкаське. Нош егит адямиослы дӥсяськоно на, кӧт тыроно. Соин дышетскем егитъёс берто вордскем палъёсазы.

— Нош вань-а мылкыдзы туала студентъёслэн калык инструментъёсын шудыны? Лыкто-а соос университетэ нимысьтыз кафедрае дышетскыны?

— Берло аръёсы кылдӥз бадӟым шугъяськон, вылӥ тодон-валан басьтон звеноын воштӥськонъёс луэмен. Кык ар ӵоже одӥг муртэ но ӧм кутэ. Оскем потэ, выль аре выль дышетскисьёсмы луозы ни шуыса. Но нимысьтыз крезьлы сӥзем группа гинэ ум люкалэ — милям кафедрамы калык инструментъёсын шудыны дышетэ. Нош та вакытэ быгатӥсь егитъёсмы быръё мукет городъёсты: я Петрозаводске кошко, ӵемгес Пермьысь культурая институтэ. Валамон, удмурт калык инструментъёс сярысь отын верась но ӧвӧл ни.

— Вань мукетыз но сюлмаськон. Тодосчиос шуо: удмурт профессиональной крезьгур али уг  азинскы, ӧвӧл егит Корепановъёс, Корепанов-камскийёс, Шабалинъёс. Нялтас вераса, Николай Шабалинэз финъёс ӟечгес тодо, удмуртъёсын ӵошатыса.

— Шонер. Та проектлэн огез палыз — удмурт крезьгурчиослэн, классикъёслэн ужъёссылы выль улон пыртон. Николай Шабалинэз юнме уг нимало удмурт Моцартэн. Солэн ужъёсыз вуныны кулэ ӧвӧл. Нош крезь сиос та произведениослы выль улон сётозы. Тани кылем арын крезьгуръя колледжысь студентъёс, солэсь произведениоссэ шудыса, концерт радъязы. Диск но поттэмын. Мукетсэ но верано на: асьме профессионалъёс та ужез ке ӧз нуэ, пыжкрезез ке ӧз дунъялэ, мукет выжыысь калык та борды уз басьтӥськы. Нош мукет калыкъёслы тунсыко потэ нырысь ик асьмелэн крезьмы.

— Быгатозы-а крезез калыке вӧлмытонын валче ужаны Удмуртиысь Культурая, печатья но иворъёсъя, Дышетонъя но наукая, Нациосын ужан политикая министерствоос? Та ужез соослы ӵошен радъяны тупагес, дыр, ук.

— Малпасько, соос тае валало кадь. Но милям ужан интыосмы ог-огзылэсь укыр висъясько, лэся. Нациосын ужан политикая министерство котьку дась юрттыны. «Крезьгуро академия» но ӧй быдэсмысал, куспамы валан ке ӧй луысал.

Культура удысын, шонерзэ вераса, юрттон мылкыдэз уггес шӧдӥськы. Со понна Дышетонъя но наукая министерствоен огкылысь ужаськом. Зэм, татын но капчи ӧвӧл. Университетлэн кичӧлтонэз соослы матын уг поты — уго УдГУ пыре федерал ёзэ, нош крезьгуръя колледжлэсь куронъёссэ кыло — таиз уго асьмелэн, Удмуртилэн. Мон туж сюлмаськисько, одӥг кылын вераськыны мед быгатомы шуыса.

Алёна Ионина

Удмурт Дунне
By Удмурт Дунне 15 января, 2013 16:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<