Шекъёсты шараялод — ыштонлэсь пегӟод

Удмурт Дунне
By Удмурт Дунне 18 января, 2013 17:55
3-18-1

Кунгож сярысь вуттэм но шаерамы поттэм йӧл сылэ огкадьгес. Кудзэ быръёно?

Дуннеысь вуз каронъя огазеяськонэ пыронэн валче шаерамы кылдытэмын вал нимысьтыз ужась группа. Соин кивалтэ Правительстволэн Тӧроез Юрий Питкевич.

— ВТО-е пырон шаерысьтымы предприятиос понна, тужгес но сиён-юон поттон удыслы, капчиен уз сётскы, — вераз министр Михаил Зайцев. — Кыдёке ветлонэз ӧвӧл — басьтом тани Украиналэсь ВТО-е пыремзэ. Ӝажыосазы вуыны кутскизы кунгож сьӧрысь вузъёс. Соослэн дунъёссы юромо уськытэмын, кыӵе ке кунлэн рыноказ бадӟымгес инты басьтон, монополия кылдытон понна. Озьы кунгож сьӧрысь ваем вузъёслы дунъёс ӵошкытазы Украинаын поттэмъёсыныз. Соин ик та кунэз ВТО трос ыштонъёсы вуттӥз. Табере асьмеос лыдэ басьтыны быгатӥськомы ни та ужпумлэсь котькуд палзэ, котькуд шексэ.

Шаерамы кылдытэм группалэн ёзчиосыз сак чакласа возё ВТО-е пыронэн валче кылдӥсь ужпумъёсты. Гурт удыс сярысь верано ке, кужмо хозяйствоос ВТО-е пыронэз чидалозы, со вие ик куд-огъёсызлы курадӟоно луоз.

Али магазинъёсысь чакланы быгатӥськомы ни таӵе суредэз: кунгож сьӧрысь вуттэм, шуом, йӧл продукцилы дунъёс ӵошкытамын шаерамы поттэмъёсыныз. Но нырысетӥез порошоклэсь лэсьтэмын ке, кыкетӥез — нокыӵе суретъёстэк, зэмос йӧл. Нош дунзы огкадь. Оло нош эшшо но улӥынгес. Валамон: калык, тужгес но мӧйыос — пенсия вылын улӥсьёс — быръёзы дунтэмзэ. Но экономистъёс оскыто: таӵе югдур кема кыстӥськыны уг быгаты — 3-4 толэзь. Та дырез ик чидано луоз асьме предприятиослы.

Туэ улонэ пыӵаны кутскиз ларёкъёсын кудӟытӥсь юон вузанэз пытсанъя федерал закон. Валамон, таин вырись ужбергатӥсьёсты со ыштонэ вуттӥз — кисыязы кӧня коньдон вуэ вал сур вузанлэсь! Та закон шӧдӥськытэк уз кыльы бизнесэн вырисьёслэн лыдзы вылын — соос амалтэк кулэсмозы.
— Пичи бизнес — чидась маке, — оскытӥз министр. — Ужбергатӥсьёслэн тыршемзы-бергамзы потэ ке, соос одно ик шедьтозы табыш поттыны амал. Вуз каронэн вырыны ӧз пӧрмытэ ке, шӧдскымон бадӟым барыш басьтозы калыклы услугаос сётонын, пичи производство радъянын. Соин ик пичи бизнес ласянь мынам кышканэ чик ӧвӧл.

Нялтас вераса, валля арлэн пумаз шаерамы ваньзэ-ӧвӧлзэ лыдъяськизы 44 сюрс пала ужбергатӥсьёс. Декабрь толэзе та лыдпус 4 сюрслы кулэсмиз. Та югдурез министр М. Зайцев герӟа сурен вуз карись ларёкъёсты пытсанэн. Со вие ик министр шараяз мукетсэ но мугез. Ужасьёс понна Пенсиосъя фондэ тыриськись взносъёслэн быдӟалазы йылӥз. Таиз но, валамон, соку ик шӧдӥськиз ужбергатӥсьёслэн кисызы вылын, табышсы ичигес люкаськыны кутскиз, конкуренциын вормыны кужымзы быриз.

Елена Никитина

Туспуктэмез: udmfoto.ru

Удмурт Дунне
By Удмурт Дунне 18 января, 2013 17:55