Егитъёс шулдыртӥзы пиналъёсты

Удмурт Дунне
By Удмурт Дунне 18 января, 2013 16:04

Егитъёс шулдыртӥзы пиналъёсты

Удмурт кылэз дышетӥсьёс                     огазьын

Удмурт кылэз дышетӥсьёс огазьын

Ижысь 5-тӥ-7-тӥ классъёсысь удмурт кылэз дышетӥсь пиналъёс понна Эшъяськон юртын  нырысьсэ удмурт ёлка ортчиз.  

— Тол каникулъёс куспын шаерысьтымы егитъёс «Вамыш» лагере люкаськылӥзы но та шулдыръяськонлы сценарий гожтӥзы, — шуэ «Удмурт Кенеш» огазеяськонлэн вице-президентэз Татьяна Ишматова. —  Асьсэос ик соос нылпиосты шулдыртӥзы. Нырысетӥ ужрад пӧрмиз, шуыны луоз, нылпиос капчи мылкыдын кыз котыртӥ бергазы, Тол бабай ческыт кузьымъёс люкылӥз.

Удмурт кылэз дышетӥсь пиналъёслэсь мылкыдзэс бурдъян вылысь таӵе шулдыръяськон ортчытэмын вал. Отчы вуылӥзы городысь тужгес мыло-кыдоосыз гинэ — 9 школаысь сю пинал. Вож кыз котырын шулдыръяськон быдэсак удмурт кылын ортчиз бере, мазэ-созэ валатэк сылӥсьёсыз но вал. Шумпоттӥз соиз: та ужрадлы вань пиналъёс удмурт кырӟанъёс но тол сярысь кылбуръёс дышетыса лыктӥллям.

Городысь пиналъёс понна Выль ар шулдыръяськонэз вуоно арын азьланьтыны малпало. Ижысь пиналъёсты сяна, ёросъёсысь усточиосты но кыз котыре шулдыръяськыны ӧтёзы.

Валентина Емельянова

Удмурт Дунне
By Удмурт Дунне 18 января, 2013 16:04