Пӧлэстӥське кык нюжа…

Удмурт Дунне
By Удмурт Дунне Январь 29, 2013 11:19
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пӧлэстӥське кык нюжа…

Семьяын - удмурт кылын, школаын - ӟуч кылын

Семьяын — удмурт кылын, школаын — ӟуч кылын

Кыккыллык сярысь мифъёс

Кык кылын вераськон (кыккыллык — билингвизм) сярысь мифъёс Швейцариысь тодосчилэн Франсуа Грожанлэн Bilingual: Life and Reality книгаяз пыр-поч эскеремын. Соосын вакчияк тодматӥськом егит анай-атайёсты, тодосчиосты. Соосты шедьтыны луоз www.francoisgrosjean.ch бамын.

Кык кылын вераськон — шер пумиськись феномен. Та малпан ШОНЕР ӦВӦЛ. Дуннеын ӝыныезлэсь трос улӥсьёс тодо кык яке тросгес кылъёсты. Кык кылын вераськон дуннелэн вань люкетъёсаз, улонлэн котькуд палъёсаз, котькыӵе арлыдоос пӧлын пумиське. Сыӵе кунъёсын гинэ но, кытын одӥг кылэз валась муртъёс тросгес, кык кыло муртъёслэн процентсы бадӟым. Кылсярысь, США-ын туннэ 50 миллион адями 2 кылэз тодэ.

Тросэз кык яке тросгес кылъёсын вераськыны пичи дыръязы дышо. ШОНЕР ӦВӦЛ. Кык кылын вераськыны пичи дыръя кутскыны луэ, но озьы ик быдэ вуон вакытэ но, бадӟым будэм бере но. Зэмзэ вераса, тросэз быдэ вуэм адямиос кык кылын вераськыны кутско, малы ке шуоно соос одӥг кунысь яке улосвылысь мукетаз улыны выжо но кыкетӥ кылэз дышетоно луо. Дыр ортчемъя соос кык кыллы дышо (анай кыл акцентэз лыдэ басьтытэк). Огъя вераса, сыӵе югдур иммиграциен яке дышетсконэн сэрен кылдыны быгатэ, озьы ик мукет калыкысь адямиен кузпалъяськыса, ас кунысь мукет кылын вераськись группаосын кусып возьыса.

Кык кылын вераськисьёс кыксэ ик кылъёсты одӥг кадь ӟеч тодо. ШОНЕР ӧВӧЛ. Таиз миф туж кема улӥз! Куд-огезлэн одӥгез кылыз валтӥсь луэ, мукетыныз гожъяськыны но лыдӟиськыны уг быгаты. Туж ичиез тодо пӧртэм кылъёсты одӥг кадь ӟеч.

Кык кылэз ик ӟеч тодӥсьёс акценттэк верасько. ШОНЕР ӧВӧЛ. Кыӵе ке кылын акцентэн яке акценттэк вераськон герӟаськемын соин, ку тон кылъёсыдлы дышид. Зэмзэ вераса, кык кылын шалтыр гинэ бӧтьыртӥсь но малпаськыса вераськыны быгатӥсь муртъёслэн сояз яке таяз кылын акцентсы вань. Мукетъёсызлэн акцентсы ӧвӧл ке но, соос  ӝог вераськыны уг быгато.
Кык кылэз тодӥсьёс — вордскем дырысенызы кылысь кылэ берыктӥсьёс. ШОНЕР ӧВӧЛ. Соос огшоры валатонъёсты одӥг кылысь мукетаз тыро-пыдо берыктыны ӵем дыръя шугъясько.

Кылъёсты суран кык кылэз тодӥсьлэсь азьтэмзэ возьматэ. ШОНЕР ӧВӧЛ. Кылъёсты суран, кылсярысь, асэстэм кылъёсты кутон, ваче вераськонын вӧлмем сям луэ. Со огшоры сьӧд кофе юэм интые йӧлын сураменыз гусъяськемез тодэ вайытэ. Вераськисьёс кылъёссэс юри но сурало. Троссэ предложениосты но кылъёсты умойгес вераны одӥг яке мукет кылын. Кылъёсты сураса, берыктыса, куд-ог дыръя пуштросэз ыше. Озьы ке но мукет учыръёсын, кылсярысь, одӥг гинэ кылэз тодӥсьёсын вераськыкузы, соос тодо: кылъёсты сураны уг яра.

Кык кылэз тодӥсьёс озьы ик кык культураез асэсто. ШОНЕР ӧВӧЛ. Тросэз кык кыло муртъёс кык культура пушкын уло ке но, одӥг культураез гинэ тодо (кылсярысь, Швейцариысь немец кылын вераськисьёс пинал дыръязы ӵемысь куинь яке ньыль кыллы дышо ке но).

Кык кылын вераськисьёслэн личностьсы шори люкиськемын. ШОНЕР ӧВӧЛ. Кык кылэз тодӥсьёс, одӥг кылын сямен ик, пӧртэм учыръёсын но адямиосын асьсэды пӧртэм сямен возьыны дышо. Кылсярысь, япон но англи кылэз тодӥсь пӧртэм сямен ассэ возёз — песянаеныз япон кылын вераськыкуз но сузэреныз англи кылын вераськыкуз. Кык кыло муртлэн вераськон манерез, учконъёсыз, шӧдонъёсыз воштӥсько ваче вераськись муртэн сэрен.

Кык кыло муртъёс мылкыдъёссэс нырысетӥ кылынызы верало. ШОНЕР ӧВӧЛ. Куд-ог кык кыло муртъёс огдыре кыкезлы ик кыллы дышыса будэмын, соин ик соослэн мылкыдъёссы кык кылын ӧръясько.

Анай-атайёслэн потэ ке, нылпизы кык кылын вераськыса мед будоз шуыса, соослы таӵе радлыкез чакланы кулэ: одӥг адями — одӥг кыл. ШОНЕР ӧВӧЛ. Нылпиез, кык кыллы дышетыса будэтонын трос амалъёс вань: анай одӥг кылын вераське, нош атай — кыкетӥ кылын; одӥгеныз кылын доразы верасько, нош мукетыныз — дорлэсь палэнын; кыкетӥ кыллы нылпи школаын дыше но мукет. Нылпилы кулэ валаны (ӵем дыръя шӧдыса гинэ),  солы нуналлы быдэ кык яке тросгес кыл кулэ луэ шуыса. Татын «одӥг адями — одӥг кыл» амал ӵем дыръя пайда уг вайы, угось кык кыло нылпи ӝог вала, лябез кыл (ӵем дыръя пичи лыдъем калыклэн кылыз) туж ик кулэ ӧвӧл шуыса. Анай-атай яке семьяысь мукет адямиос ӵем дыръя ог-огенызы бадӟым лыдъем калыклэн кылыныз верасько, озьыен, малы лябеныз кылын вераськод на? Умойгес луоз дорын быдэс семьяен луэмезъя лябеныз кылын вераськыны: нылпилэсь та кылэн кусыпсэ юнматон понна но кылъёслэсь кутӥськон интызэс пусъён понна.

Кык кылъёсты тодыса будэм нылпиос котьку но кылъёссэс суралозы. ШОНЕР ӧВӧЛ. Кык кыло нылпиос одӥг кыло муртъёсын (шуом, песянаен, кудӥз англи кылын уг вераськы) одӥг кылын гинэ вераськыны ӝог дышо. Но со одно ик луыны кулэ зэмос одӥг кылын вераськон югдур (одӥг кылын вераськемъяськыса, мукетсэ кылэз тодымтэ улсы кариськон ӧвӧл). Нылпиос тыршозы вераськыны одӥг кылын гинэ, шӧдӥзы ке, со ваче вераськыны кулэ шуыса. Озьыен, анай-атайёслы кулэ кылдытыны зэмос одӥг кылын вераськон югдур, мед нылпиос одӥгзэ гинэ кылэз кулэ карозы но вераськонын кутозы.

Дасяз Елена Рябина
Туспуктӥз Кати Сысоева

Удмурт Дунне
By Удмурт Дунне Январь 29, 2013 11:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<