Парижез адӟи ке но, ӧй кулы

Удмурт Дунне
By Удмурт Дунне 29 января, 2013 10:08
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Парижез адӟи ке но, ӧй кулы

Париж — со бумеранг кадь…
П. Захаров

Париж чебер. Париж йӧно! Париж тузӥ но тодмо. Париж… Зангарик кадь. Ӧвӧл! Зангарик — Парижысь Диснейлэнд кадь, нош Париж… Ассэ яратыны косэ. Мон солэсь возьдаськи, шукыресэзлы, алякезлы пайми. Париж — воксё удмурт ӧвӧл. Удмурт кыл та городлы уг тупа, татын удмурт сямен малпаськыны уг луы. Татчы ӟуч аристократъёс пегӟизы, татын узыр семьяосысь ӟуч студентъёс дышетско. Татын улӥсь эше гинэ но удмурт кылын уг вераськы.

Пичи Пурга ёросысь Норья гуртын вордскем удмурт эше Русских Света татын ньылетӥ арзэ улэ. Быземын французлы, али Сорбоннаын дышетске. Данъяськисько эшеным. Трос шугадӟонъёс пыр потыса, со удмурт Золушкалэсь выжыкылзэ зэматӥз. Нош табере огшоры улэ — Парижын со мода сьӧры уг уйиськы, тодон-валан бича. Пусъе: татын сое гажало — студентэз сямен, егит ӧнерчиез сямен. Берен берытскемез уг поты. Ижын сое уар (раб), ужась кужым чотын гинэ адӟизы, шуэ…

Света возьматӥз мыным ас Парижзэ. Чебер интыос: Латин квартал, Сена ярдур, Люксембург сад — ваньмыз выжыкылын кадь бергаз. Музейёслэсь, ульчаослэсь жадем йыр кылбур чуръёс ик малпаны кутскиз!

Парфенонысь ноны,
Нап-вож ӵыкмем дэра,
Трикоосын Тулуз-Лотрек
Вайям пыдын учке
шорад.
Музей та — зэм, кельше мыным.
Нош кылемез потэ
туж зын.
Метро но зын,
Сюрес но,
Калык но (огшоры)
Чеберез но (духи пыры).
Зын Сен-Жермен,
Зын Сен-Мишель,
Зын шаурма
Но зын шушен
(чечы вина).
Зынэсь нылъёс,
Зынэсь бомжъёс,
Шан-з-Элизэ
Но закодъёс.
Ваниль зын, Ымусьтон зын,
Парфюм зын, чупаськон зын,
Мисьтӥськымтэ зын, мускус,
Турын-куаръёс но уксус.
Чылкыт зын, порошок зын,
Паймон, кышкан но шок зын.
Турист зын, лӧптылон зын,
Книга зын но мӧзмон зын…

Удмурт нуналъёс ортчем бере ик Париж пумитаз мукет палыныз — глобалист тусыныз. Gilber Joseph книга лавкае пырыса, урамысь люр-ляр куараосын ӧйлась: социалистической партия, Бастилия карлудысен Пантеонозь, Сеналэн огез ярдурысен мукетаз выжыса, митинген ортчиз. Oui pour l’égalité! Эрик понна! Шара кесясько, гужгето. Озьы «чагыр» но «льќль» паръёслэн кузпалъяськыны правозы понна нюръясько вылэм. Француз гейёс но лесбиянкаос али ке но загсын гожтӥськыны уг быгато на: та элькунын трос оскись муртъёс — католикъёс но мусульманъёс — уло.

Соку ик син шоры йӧтэ мукетыз но — шоркар тырмемын лымшорысь но шундыӝужан палась вуэмъёсын. Соос татын вордскемын, сыӵе ик французъёс. Куке-соку колониосысь вуэм француз кылын вераськись «сьӧдъёс» Париже кылизы, татын уж шедьтӥзы, семья кылдытӥзы. Валамон, тросэз нелегально уло. Саркози президент дыръя ӵем гинэ «сузянъёс» ортчытъязы — сыӵе семьяосысь пиналъёсты, школаоссы дорын кутылыса, анай-атайёсынызы ӵош депортировать карылӥзы.

Иммигрантъёслы улон карточка басьтыны капчи ӧвӧл, шуэ Света. Ачиз Россиысь бере, ӟеч тодэ, кӧня бумага бичан, бызьылон сюре. Картэныз ӵош соос асьсэды паллянъёс шуо. Огласянь, тодосчи луэмзы соосты консервативной, чырмыт парен суреда, мукет ласянь, туала обществоын улэмзы пытьызэ кельтэ. Гийом но Света — туала егитъёс, эрико малпаськись макеос. Котькуд нунал мае ке выльзэ тодыны-адӟыны тыршо. Гийом, кылсярысь, яратэ комиксъёсты, ачиз но суредаське, крезьгура, дыбырен шудэ.

Комиксъёс — француз дуннеын быдэс культура. Пиналъёслы гинэ огшоры шудон ќвӧл та. Пичи суредэ быдэс улонэз тэрытыны быгатоно. Светалэн лыдӟиськон ӝажыяз — Серж Гейнсбурлэн улонэныз суред бичет. Ачим но лавкаысь зӧк томлы синмаськи: Полина пичи балериналэн будон вакытэз. Пичи дыръям таӵе книгае луысал ке!

Париже яке пичи дыръя, яке семьяен вуылоно. Та город — зэм но шукырес праздник. Пичи дыръя ваньмыз бадӟым но паймымон потэ. Али мон асме та карын ӧй шедьты. Пиналме куке но Париже ваё ик, дыр. Диснейлэндэз учкыны! Света эше но нырысь ик сое учкыны ветлэм.

Дарали Лели

Удмурт Дунне
By Удмурт Дунне 29 января, 2013 10:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<