«Нюлэсэ» ми пырыса…

Удмурт Дунне
By Удмурт Дунне 29 января, 2013 11:01

«Нюлэсэ» ми пырыса…

«Newless» рок-группа

«Newless» рок-группа

«Пепелац» клубын «Newless» рок-группа удмурт кырӟанъёслы каверъёс быдэстӥз. Тросэз позыръяськонэ лыктэмъёс таослы синмаськизы. Нош мон пияшъёсын тодматскон понна одӥгез сьӧры репетициязы калъяськи.

Ульчаостӥ вамышъяса, кыӵе ке но пеймыт азбаре пырим. Син азям усьтӥськем суред соку ик Ф. Достоевскийлэсь Петербургзэ тодэ вайытӥз. Куашкам тубатъёс, секыт корт ӧс, кырсь пеймыт подъезд, куркуян (мусорка) вӧзын тамакпумъёс, утялтымтэ кузь коридор, наштам борддоръёс. Та, пе, крезьгур гожъянъя умойёсыз пӧлысь студия. Аренда понна уксё тырыса, огаз пичи комнатае пырим. Пыдкукъёсмес куштӥм но эшшо одӥг висъет сьӧры кожим. Пиос дышем сямен кыштыр гинэ пыризы но аппаратуразэс тупатъяны кутскизы. Нош мон диван вылэ пукси но мукет дуннее сюри кадь. Татын крезьгур гинэ улэ. Тыныд нокин но уг люкеты, кулэтэм куараосты югыт-курень борддоръёс ньыло, куинь ӝуась тылъёс синъёсты уг мальдыто. Огласянь, татын утялскемын кадь: сэрегъёсын ӝужыт колонкаос, диванлы пумит тэркыосын барабанъёс, наушникъёс но сьӧд езъёс кортӵогъёсын ошисько. Нош мукет ласянь, шторкаос тупатъямын ӧвӧл, выж вылтӥ мукет проводъёс кыстӥсько но аппаратураез герӟало.

Кызь минут пала ортчыса, репетиция кутскиз. Котькуд пияш аслаз инструментэныз.
Рок-крезьгур — со кужым сётӥсь ритмичной куара. Нош ритмез барабанъёс кылдыто. Соос сьӧрын Костя Волков пуке. Тани со вань сюлмысьтыз, быдэс мугорыныз шудэ, ваньзылы эрик кузьма. Мыным потэ, со улонлэсь ваньзэ басьтыны турттэ.

Бас-гитараен шудэ Влад Степанов. Туж сак, ваньзэ пыртӥз лэзе. Таиз пияш туж серьёзной, ЕГЭ-лы дасяське, историен тунсыкъяське.

Клавишаос апӧртэмлыко лирической шӧм пыӵато. Антон Ехланов поп-шунытэз, небытэз пыртэ группалэн улоназ.

Нош со дыре сэргын, шыпыт мыняса, Женя Бикузин электрогитаралэсь сиоссэ кыска. Та инструментлэн куараез рок-крезьгурлэн валтӥсь тодметэз луэ, шуэ со. Озьы, ог-огзэс кылзӥськыса но валаса, пиос кылдыто одӥг крезьгур гармония. Вераны ик уг быгатӥськы, кудбыдӟа крезьгур кужым мон вылэ усиз.

Группаез кылдытӥсь но кивалтӥсь Артём Трефилов луэ. Со сӥзьыл куашкам «Amiso Wott» рок-группаысь пиослы вазиськиз выль группа кылдытон ласянь. Озьы нырысетӥ пумиськылонъёсазы соос Артёмен гожтэм кырӟанъёсты шудыны кутскизы.

Али дырлы ӟуч кылын куинь кырӟанзы вань ни: «Я забыл», «Жить», «Твой голос». Нырысь кырӟамзэс кылзыкум, янгыштэк быдэстӥзы кадь потӥз: кужмо, улэп. Но ваньмыз огшоры гинэ вылымтэ: огез дырыз дыръя шудыны уг кутскы, мукетызлэн чёткостез ӧвӧл, яке клавишалэн куараез золгес кылӥське, барабанэн шудӥсь янгыша. Артём котькудзэ чакла, шекъёссэс тупатыны выре, валэктэ, экспериментъёс пуктылэ, кырӟаны но вуттэ.

Группа пӧртэм крезьгур фестивальёсы пыриськыны малпа. Со «Улетай», Удмурт кун университетэн радъям рок-фестиваль но мукетъёсыз. Озьы пиосыз кылзӥськисьёслэн лыдзы будоз, соосты кутскозы тодманы, мукет концертъёсы ӧтьылыны. Со ик группалэн тыршемезлы вылӥ дунъет луоз, вылӥегес ӝутскыны бурдъёс сётоз.

…Пиос шутэтскыны потӥзы. Со дыре Артём азьлань сюрессы сярысь мадиз:
— Арняяз одӥг пол коть бичаськыны тыршиськом. Кема шудытэк улӥд ке, вань быгатонлыкъёс тӧлэн ӵош лобӟозы. Ваньзылы тодмо луон но асьме творчествоенымы уксё поттон милям ужамы валтӥсез уг луы. Ми шудӥськом, малы ке шуоно сюлэм куре. Тани мон, Костя но Антон крезьгуръя колледжын дышетскиськом, улонмы крезьгурен герӟаськемын вал ини. Азьланяз мукет удысэ выжыны ум малпаське. Но аслад тунсыкъяськонэныд коньдон поттонын номыр но уродэз ӧвӧл. Огшоры репетициос но кисыез бушато ай. Люкаськыны луонлыкмы мед луоз шуыса, котькудӥз кытын ке но ужа. Нош альбом гожтон понна спонсор ик утчаны кулэ луоз. Яке вожвылъяськонъёсы пыриськыса, грант утыны выром, кызьы «SWG» Ижкарын ортчись крезьгур чемпионатын вормиз. Но отчыозь милемлы трос ужано на, группамылэсь шудон стильзэ волятоно.

Репетицилы сётэм кык час ӝоген ортчиз. Дӥсяськыса ваньмы ӵош дор пала вамыштӥм. Тазьы ик бертыкузы, шуак ним но, пе, вордӥськиз: «Newless». Удмурт сямен чузъяське — нюлэс, англи кылын — новый лес. Озьыен, нимызъя учкид ке, та группа этнофутуризм ӧртӥ кошке шуыса, малпалод. Но соос асьсэзыз поп-рок пӧлы пырто, огшоры кырӟало яратон сярысь, нокин сьӧры но уг уйисько, нокинэн но асьсэзыз уг ӵошато.

Мария Векшина

Туспуктӥз Ксения Ворончихина

Удмурт Дунне
By Удмурт Дунне 29 января, 2013 11:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<