Шуг ке, мыным уката кельше

Удмурт Дунне
By Удмурт Дунне 22 января, 2013 10:40

Шуг ке, мыным уката кельше

myataА. Демьяновлэсь «Роса на мяту пала…» кылбурзэ берыктон пумысен малпанъёс

21-тӥ шуркынмонэ потэм «Ингожын» лыдӟисьёсмылы дэмламын вал шаерысьтымы тодмо ӟуч кылбурчилэсь Анатолий Демьяновлэсь «Роса на мяту пала…» кылбурзэ удмурт кылэ берыктыны. Та уж секыт потэм, шӧдске: вазиськись ик ӧз луы…

Кызьы озьы? Кытын берыктон ужъя усточиосмы?
Осконме ыштытэк, вамыштӥ соос пӧлысь огез, Пушкинэз но Лермонтовез, Некрасовез но Кольцовез, Блокез но Есенинэз удмурт кылэ берыкъям кылбурчи Сергей Матвеев доры.
— Зэмзэ но, кылбуръёсыз кылысь кылэ берыкъян — мынам яратоно уже, — малпанзэ шараяз эшмы. — Демьяновез берыктыны дэмламдэс газетысь соку ик синйылтӥ. Кылбурез вакчи чуро, ӝикыт. Но, тае озьы гинэ уд берыкты шуыса, валай. Соин но бордаз кыскиз. Шуг ке, мыным уката кельше…
***
Ӟуч кылбурез ас азяд пуктэм юн куронэн берыктоно ке — шуом, кылгурез (ритмез) ӵапак сыӵе ик мед кылёз шуыса — рифмаос бордын йырез тӥяно луэ. Сыӵе шуг-секыт кылдытэ литературоведениын женской шуиськись рифма — куке ударениен слог бӧрсьын «быжыз» вань на.

Тани та учырын: пала — попало, зачахнет — пахнет, перемята — не мята… Соин ик удмуртэ берыктӥсьлы амал шедьтоно луылэ. Яке отрицательной формаен глаголэз кутыса: уд кылзы — ческыт зын, уг возьы — уд ӟузьы. Яке предложениысь союзэз я частицаез, вводной кылэз ударенитэм слог чот карыса: лёгамын ке — кытын, пе; кузя нош — бызе но; ярдур но — мур но…

Тазьы ас берыктэмме чаклано ке, нырысетӥ чуре мужской рифмаё луиз (мужской — ударение берпум слог вылын). Ма, валлин кыл бӧрсьы кыӵе ке кыл-слог кутод шат? Валлин-а, валлин но, валлин нош, валлин, ло… Тазьы коть озьы верано ке, умойтэм, шуш кылӥське, огъя пуштросэн уг герӟаськы. Я, шуом, луысал али кыл бӧрсьы «быж» пуктытэк но, быдэс кылбурез мужской рифмаосын гинэ лэсьтыны (удмурт кылбурчиос ӵемысь озьы ик карыло). Нош мукет ласянь, али но шуыса, пуштросэз воштӥське, муроме. Ӟучезлы тупась кылгуре выжон но та ик луэ.
Кыкетӥ строфаын (куплетын) но шеке вань. Рифма понна мята ческыт зын шуоно луи. Нош шонергес луысал — ческыт мята зын. Куинетӥ строфаез пӧраку, таӵе но вариант кылдӥз:

Пыдын ке лёгамын со,
Киын ке погмамын,
Ческыт зыно турын но
Лултэм ни кылемын.
Яке воксё тазьы:
Пыдын но лёгаськод ке,
Киын но ке ишкад,
Возез но саптаськод кадь —
Мята уг ни шока.

Ньылетӥ строфаын курадӟыса ӧй улы ни — огшоры берыктӥ. Витетӥез но ас понназ, шуак кылдӥз. Куатетӥ строфа бордын ужакум, терновник кылэз валэктыны кыллюкамысь ӟурӟек кылэз шедьтӥ, та образэз кыкетӥ интые пуктӥ. Нош шурлэн «урдэсыз» ярдур гинэ луиз. Нирске шуэмме пырдэ кылын воштӥ. Луысал, дыр, кеське, куашка шуыны но…

***
С. Матвеевлэн берыктэмаз нырысь чураз ик шуляк шуэмысьтыз шуак луоно ик, но валано: иське, шуль-шуль луэмын, котмемын. Пумаз но озьы ик, паймымон: ярдурез, пе, изъёс лаё. Шонерзэ, предложенилэн конструкциез татын умойтэмгес кадь (изъёс-а лаё шуыны шонергес луысал), но поэтлы таӵе чыры-пыры понна вожмес поттыны ум быгатӥське. Малы ке шуоно С. Матвеев ӟуч поэтэз туж гажаса, эскериськыса берыктэм. Кылтӥрлыкезлэн усто луэмез нырысь ик адӟиське удмурт кылын женской рифмаосын шудыны быгатэмысьтыз: тулыс-а — дырлы со; пыдын но — кытын на; марӟан-а — кырӟа но; уг ваты — кузьма, дыр… Кызьы адӟиськом, С. Матвеев пӧртэм грамматической формаен кылъёсты кузъя, соосты капчиен шедьтэ. Пусъём: женской рифмаосаз ударениен слогъёсын гласной куараосыз одно ик тупало. Нош тани кызьы берыктод кадь «ночной росой беспечно» шуыса кутскись ньыльчурез… Мон тае вылтӥз гинэ тэтчыса ортчи, нош С. Матвеев туж тупамон кылъёс шедьтыны, пуштроссэ усьтыны быгатэм.

Со сяна, переводын маиз кельшиз. Ӟуч автор ачиз тодэ, шӧдске, но уг валэкты, мар со ю (озьыен, удмурт кылэз тодӥсьтэм муртлы со валантэм кылёз). Нош берыктӥсь та кыллэсь ву значенизэ пыртэм — нимыз дэмла кадь: ю. Солэн шурез но адями кадь улэп пӧрмемын — вераса: со сюлэмаз уг ваты…

Шуысал, мынамез берыктэме ачимъягес, огшорыгес но капчиенгес лыдӟиське-валаське, калык манеренгес гожтэмын, нош С. Матвеевлэн — поэтлэн-усточилэн сямен, кӧня ке мудронъяса. Адӟиське: со нош яратоно ужез пӧлы выйылэм но, А. Демьяновлэн малпанъёсызлэсь палэнэ кожылытэк, переводзэ синмаськымон быдэстыны быгатэм.

Татьяна Чернова

Анатолий Демьянов
* * *
Роса на мяту пала
Вдоль тихой речки Ю…
Темно и что попало
Плетут про жизнь мою.

Молва, она зачахнет,
Истает без следа,
Но жаль, что
мята пахнет,
Покуда молода.

Ногами перемята,
От грубых рук мертва,
Она уже не мята,
Она уже — трава…

Ночной росой беспечно
Светля струю свою,
Внизу воркует речка
И носит имя — Ю.

Она в себе не прячет
Обиды и беды,
И очень много значит
Глоток её воды.

Над ней терновник вьётся,
Ей камни рвут бока,
А речка Ю смеётся,
Чиста и глубока!

* * *
Шыпыт Ю шур валлин
Бутник лысвуаське.
Кин ке, вылды, али но
Монэ пыже-миське.

Я, ӵок, сое уд кылзы —
Жондоз но чалмылоз.
Но жаль, мята
ческыт зын
Туннэ гинэ луоз.

Пыдын но лёгамын ке,
Киын ке погмамын,
Возь чеберед кытын, пе,
Кытын на со турын…

Югыт ву дур кузя нош
Лысвуаське уйшор.
Жильыр гинэ бызе но
Нимзэ данъя Ю шур.

Ас кожъёсаз уг возьы
Ӝожез но кайгуэз,
Кызьы, пе, нош уд ӟузьы
Со чильпырась вуэз.

Изэн пырдэ ярдур но,
Ӟурӟек но ӝабыръя.
Нош Ю — чылкыт но, мур но —
Бызе но серекъя.

Берыктӥз
 Татьяна Чернова
* * *
Лысву пӧлын со шуляк —
Бутник Ю шур дурысь…
Кызьы гинэ уг зулё
Та улонэ сярысь.

Зулён — сӥзьыл-тулыс-а —
Тӧлӟоз пож вуэныз,
Но жаль, вакчи дырлы со —
Вож бутниклэн зыныз.

Паньгатъямын пыдын но,
Кырым тыр ишкемын, —
Бутник, шуод, кытын на,
Со огшоры турын…

Лысву пазьгем марӟан-а
Визылъёсаз юг-юг, —
Ю шур шыпыт кырӟа но,
Нимыз дэмла кадь: ю.

Со сюлэмаз уг ваты
Ӝожез но кайгуэз.
Лулшуг буйган кузьма, дыр,
Солэн шапык вуэз.

Вадьсаз пешкель* вотэс-а,
Дурзэ изъёс лаё,
Ю шур нош — пальпотэ со —
Чылкыт мурдалаё.

*Пешкель — векчи куак.

Берыктӥз
Сергей Матвеев

Удмурт Дунне
By Удмурт Дунне 22 января, 2013 10:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<