Малпандэ эн усьты — кырыж учкозы?

Удмурт Дунне
By Удмурт Дунне 16 января, 2013 13:09

Малпандэ эн усьты — кырыж учкозы?

Коми алфавитлэн "Ö" букваезлы синпелет

Коми алфавитлэн «Ö» букваезлы синпелет

Кыӵе инты басьтэ коми кыл Комиын? Кун кылъёс сярысь законзы татын 1992-тӥ арын кутэмын. Со дырысен котькуд чиновник коми кылъя вакчи ке но курсъёсыз ортчыны кулэ. Нош школаын дышетскисьёс ваньмыз коми кылэз дышетыны кулэ.

Сыктывкар кун университетын азьвыл фин-угор факультетсы вал. Но 3 ар талэсь азьвыл сое историяя, кунсьӧр кылъёсъя, журналистика, филология но мукет факультетъёсын огазеязы. Уно дышетӥсьёсыз ужтэк кельтӥзы. Туннэ татын Гуманитарияя институт вань, отысь огаз ёзын коми филологъёсыз дасяло. Арысь аре дышетскон интыос кулэсмо.

Ӟучъёслэн вожзы потэ кадь, пичи коми калык ас шаераз «титульной» нимаське шуыса. Но комиослэн асваланзы сайканы кутске. Егитъёс огпол гинэ ӧз вералэ: берпуметӥ аръёсы кылзы вылэгес ӝутӥськиз, урамын но кылӥськыны кутскиз.

Кивалтон удыс сярысь ке верано, татын комиос сокем вылэ ӝутскыны уг быгато — ма, удмуртъёслэн кадь ик сюлмаськонзы. чиновникъёс пӧлын комиос трос ӧвӧл, пӧлазы уногес — кышномуртъёс. Соос бадӟым ужрадъёсын анай кылынызы ӟечъясько, коми кылэз пыӵатыны выро кадь. Но калык пӧлын соосты бадӟым гажан мылкыд уг шӧдӥськы: мар соослэн коми луэмзылэн пайдаез, ас калыксы понна номыр уг лэсьто ке, ӝожтӥсько комиос. Но интыязы ӵектыны нокинэ кадь: егитъёс политикаен сокем уг тунсыкъясько. Котькытын али сыӵе югдур кылдэмын, лэся: кивалтэтлы пумит, но ас малпанзэс шараяны уг дырто.

Сыктывкарысь  газет но журнал редакциосын ужасьёслэсь, дышетскисьёслэсь коми кыллэн но калыклэн интызы сярысь юаськи. Университетысь одӥгез дышетӥсь шуиз: «Учкы www.bnkomi.ru сайтэз, отысь тодод шаерамы улӥсь калыкъёслэсь зэмос югдурзэс но кусыпъёссэс».

***
Комиысь Усть-Кулом черкогуртын бадӟым конференция ортчем. Отын эскериллям школаын анай кылэз дышетонэн герӟаськем юанэз. Сайтын со пумысен таӵе ченгешон ӝутскиз.

Александр Щиголев:
— Котькуд адями — визьмо-а со, визьтэм-а — валаз ни: коми кылэз школаын ваньзылы одно ик дышетыны косыса, кивалтӥсьёс коми калык но солэн лулчеберетэз сярысь уг сюлмасько. Чиновникъёс ужамзэс возьматыны гинэ тыршо. Соин ик воштоно азьветлӥсьёсыз но маке выльзэ малпано.

Темса:
— Мон малпамъя, конференциос туж трос ортчо, но со юнме коньдон быдтон гинэ.

Эжвинец:
— Акыльтӥз ни коми кылэз дышетыны косэм! Акыльтӥз!!!

Who are…:
— Коми кылэз азинтонъя юанэз коми калыклэн конференцияз ӝутӥллям. Мар отын уродэз?

Александр Щиголев:
— Алама, малы ке шуоно табере коми кылэз школаын 9-тӥ классозь одно дышетыны косозы. Калык сое эшшо но адӟемпотостэм кароз.

Тортила:
— Мон ачим коми выжыысь. Анай-атае верамъя, 5 аресозям ми куспамы коми сямен гинэ бӧтьыртылӥм, но мукет интые улыны выжемен, ваньмыз воштӥськиз. Али мон мае но сое валасько, но чик уг вераськиськы анай кылыным. Анай-атае улонысь кошкем бере трос коми книгаосмы кылизы. Куштыны ки ӧз ӝутӥськы, соин коми тодмоосмылы ӵектӥ, но соосыз нокин кулэ ӧз кары. Та кыл нокинлы кулэ ӧвӧл ни, соин ик малы сое школаосын дышетыны косоно на?

Я:
— Мон комиосыз адӟемпотостэм уг кариськы. Мон соосыз уг адӟиськы но тӥни!

Эля:
— Ӟучъёс адӟемпотостэм каро ваньзэ но ваньзэс. Соос асьсэды гинэ ярато. Нош уло мурт музъемъёсын. 16-тӥ-17-тӥ даурозь Восточной Европаын соос чик вылӥллямтэ.

Элялы:
— Тӥляд музъемды — Пермь улос но Удмуртилэн уйпалыз. Тӥледыз отысь удмуртъёс улляллям («удмурт» кыл «ӝокатӥсь» шуыса берыктӥське). Тӥ удмуртъёслэсь пегӟиды но улляды татысь ненецъёсыз, кузёяськыны ӧдъяды.

Малпан кылдэ: комиосыз юромо вӧсь каро. Куд-огез, кылъёслэсь этимологизэс тодытэк, ымзэ усьяны кутске: удмурт, пе, «удушающий» шуыса берыктӥське! Ӵектӥ со «визьпоглы» огпол ке но кыллюкамез усьтыны.

***
Мукет выжы калыклэн историеныз, югдуреныз тунсыкъяськыса, асладэз понна сюлэм эшшо висьыны кутске. Удмурт калыкмы но ӟучоме, тырше «ваньмыз кадь» луыны. Но тросэзлэн выросъёсыз быдэс улонэз ӵоже удмурт ик кылё, удмурт кылзэ уг потта ке но.

Но кужыммы ӧвӧл шат анай кылмес, лулчеберетмес но гажано историмес, сям-йылолъёсмес утьыны? Финъёслэн анай кылзы бырон калын вал. Но соос быгатӥзы, утизы. Табере 5 миллион адями та кылын вераське. Фин кыл  выльысь улӟиз, пушйиз. Табере ӵыжы-выжы луись калыкмы шоры ми гинэ ӧвӧл, уно мукет калыкъёс но синмаськыса учко.

Лена Рябина

Туспуктэмез: finnougr.ru

Удмурт Дунне
By Удмурт Дунне 16 января, 2013 13:09
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<