Кылбуръёсы пыӵа вакыт

Удмурт Дунне
By Удмурт Дунне 22 января, 2013 12:01
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылбуръёсы пыӵа вакыт

Туж востэм егит кылбурчиос

Туж востэм егит кылбурчиос

15-тӥ толшоре «Грифон» галереяын «Герд не Обама» кылбур лыдӟонъёс ортчизы. Радъязы та ужрадэз «Удмурт дунне» газет но «Ваньмон дыр»  вотэс ошмес.

Лыдӟонъёсты нуиз УдГУ-ысь журналистика факультетын дышетскись Маша Векшина. Кыл-бурчиосты бышкись юанъёсын ёртӥз, озьы соосты люкаськемъёс азьын усьтыны выриз. Машалэн кылбуръёсыз, ачиз верамъя, «йырын гожтэмын, сюлэмын ӧвӧл». Куддыр соосты валан понна куинь-ньыль пол лыдӟыны кулэ.

Даша Шиляева — тужгес егитэз кылбурчи. Та дырлы нылашлэн аслаз «Шыпырты» кылбур бичетэз потэмын ни. Дашалэн кылбуръёсыз кужымез зћбыса возёнлы но катъёсъя гинэ улонлы пумит луисесь.

Наташа Клабукова берло дыре яратон сярысь тросгес гожъя, нош азьло, удмурт кылэз, кырӟанэз, шаерез данъяса, кылбураз. Устоесь Наташалэн висъян пусъёстэк кылбуръёсыз. Вань нылашлэн льӧль малпанэз — поттыны аслэсьтыз кылбур бичетсэ.

Ксюша Евсеева ужрадэ люкаськемъёслэсь соку ик висъяськиз ас образэныз. Лэзьям йырсиен но пеймыт кузь дэремен со туж романтической адӟиськиз. Сыӵе ик Ксюшалэн кылбуръёсыз но: мур пуштросъем но философиен герӟаськем.

Лиля Юртаева вылтусызъя но улон шоры учконъёсызъя туж аспӧртэмлыко нылаш, нош кылбуръёсаз та пыӵамын ӧвӧл. Лиля вылтуссэ вошъяны яратэ, нош кылбуран удысэ сыӵе воштӥськонъёсты пыртыны уг дырты, кепыра. Нылаш удмурт калык, зэмлык но крезьгур сярысь гожъя. Лиля кылбура на немец кылын.
Богдан Анфиногенов кылбурчи кемалась ваньзылы тодмо ни Ullapala Boy кырӟась нимын. Богдан суро-пожо удмурт-ӟуч-англи кылын кылбура. Анай-атаез солэн удмуртъёс ке но, пияш, удмурт кылэз тодытэк, будӥз. Нош али каллен дышетэм каре. Кылбура Богдан, Маяковскийлэсь адӟем карыса. Кылбуръёсыз солэн кытчы ке ӧтисесь, яркытэсь, зол чузъяськисесь.

Егит кылбурчиосын пыр-почгес vanmondyr.ru бамын тодматскыны быгатоды.

Лукерья Шихова

Перепеч пыжыку

Ксения Евсеева

Перепеч пыжыку,
мон шудо лыдъясько
семьяме.
Гур доры султыса,
туж сюлмысь
учкиськом  ӝуамзэ…
Атае малпаське:
«Ох, усто ук мынам  кышное»!
Туж ческыт шуыса,
нош  чупа пальпотӥсь
ымдурзэ.
Перепеч сиыку,
удмурт гур кадь
вӧлме  сюлэмам.
Зэм кужмо удмурт вир
кырӟаса пачылме
вирсэрам!
Вань ортчем дауръёс
киноын кадь султо
син азям.
Тау бадӟым, адӟонэ,
шокасько мон
Удмурт дуннеям!

***

Котьку

Наталья Клабукова
туж зол
вирозь
синкылиозь
шып верамозь
кесяськытозь
но бӧрдытозь
нош усьытозь
выль ӝутсконозь
син ворсаку
тыл кысыку
малпаськыку
уй вуыку
но зорыку
кизилиос
ворекъяку…
мон
тон сярысь
малпаськисько
котьку котьку

***

Висён

Лилия Юртаева
«Кин сыӵе тон?
Эмо, панк-а?
Яке эшшо кин ке
мукет?»
«Вӧсь вал-а тыныд,
нылашка,
Куке пасяд ымдурдэ?»

Мар бордам тӥ ериды?
Улыны люкетӥсько?
Котькытчы вуэ нырды,
Мар кари но карисько.

Ку тӥляд пичи визьды
Валалоз огзэ:
Со тӥляд ӧвӧл ужды!
Весь пушкы ини вузэ.
Возьматъяса чиньыосын,
Ураметӥ ортчиськоды.
«Со ведь лыз йырсиосын!»
Мон понна
«висиськоды»!

***

Мон оски вал тыныд

Мария Векшина
Мон оски вал тыныд
весяклы, мусое.
Тон саптад но наштад
вӧтъёсме дэрие,
Сю полэс омырын
позыртӥд сюлэмме,
Осконэн сялӟыса,
вамыштӥд азьлане,
Шуятӥд кезьытэн
яратӥсь сюлэмме.
Но уг возькы бордам
пачкатӥсь йыркурме.
Со лоба юг Манак
пӧртмаськись
нюлэскын,
Вордӥськем гуртэлэсь со
ог куинь иськемын.

Удмурт Дунне
By Удмурт Дунне 22 января, 2013 12:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<