Кыдан, вормон, ӝутскон

Удмурт Дунне
By Удмурт Дунне 18 января, 2013 15:35

Кыдан, вормон, ӝутскон

Ю. Перевощиков

Ю. Перевощиков

Экономика наукаосъя докторлы Юрий Перевощиковлы — 85 арес

Юрий Перевощиков — Удмуртиын улӥсь удмуртъёс пӧлысь экономика наукаосъя нырысетӥез доктор. Диссертацизэ утиз 1988-тӥ арын. Удмурт АССР-ысь наука но техника удысысь дано ужась. Пусъемын Трудовой Горд Знамя орденэн, ВДНХ-лэн азвесь медаленыз, СССР-ысь Кун премилэн но М. Т. Калашников нимо премилэн лауреатсы. Дас кык книгалэн но 100-лэсь ятыр статьяослэн авторзы, солэсь эскеронъёссэ Россиысь тросэз предприятиос ужазы куто. Та дано нимъёсты нуллэм сяна, Юрий Семёнович улонын котьку но азьветлӥсьёс радын.

— Вордӥськем гуртады тӥ нырысетӥез средне-технической но вылӥ тодон-валан басьтэм адями луиськоды. Отчыозь вуон понна трос гинэ кыдано, шуг-секытъёс пыр потоно луиз, дыр?

— 1928-тӥ арын 13-тӥ январе Эгра ёросысь Сепож гуртын Татьяна Никоновна но Семён Герасимович Перевощиковъёслэн семьяязы мон вордскиськем. Нуныяськыса будонэз ӧм адӟе, пичиысен бусые сюрлоен ужаны ветлӥмы. Мугоры пичи, жадьыса пыдъёс-киос висё. Малы меда адями тазьы курадӟе шуыса, кӧты урод луылӥз. Малы солэсь ужзэ капчиятон понна нокин уг сюлмаськы. Школае, аресы тырмытэк, мынӥ, анай-атаелэсь куриськыса. Ньылетӥ классын дышетскыкум, школамес пытсазы, мыным Чутыр гуртэ мыноно луиз. Укмыс аресъем маке нуналлы быдэ дас иськемез пыдын ветлӥ.

Война кутскемен, улонмы пазьгиськиз: воргоронъёсты оже келяллязы, егитъёсты — Ижысь ремесленной училищее. Монэ но отчы лэзё вал. Но кызьы ке пегӟыны быгатӥ. Доре бертӥ но, мамамы гуртын ӧвӧл — со вакытэ Ижевск-Балезино сюресэз лэсьтыны кутскизы, отчы келяллям. Доре куать аресъем выныным кылимы. Мама ар пала чугун сюрес вылын ужаз. Атае колхозын председатель вал.

Училищее ӧй мыны шуыса, кышкай, пытсэт сьӧры келяны быгатозы, шуизы. Соку Эграысь МТС-э трактористэ дышетскыны куриськи. 1942-тӥ арын тракторен ужаны право басьтӥ. Гуртамы соку сыӵе дышетскемъёс ӧй вал на. Тодон-валан басьтон мыным туж секытэн сётӥськиз: сиён ӧвӧл, ялан сютэм ветлӥськом. Кызьы меда пыд йыламы сылӥмы на. Одӥг пол тулыс доре бертыны потӥ, шур маке пасьта вӧлскем. Берен Эграе мыноно ке, кужыме уз тырмы, пӧй. Ойдо мар ке луэм лу шуыса, шур вамен потоно кариськи. Шораз вуи но тани-тани выйисько ни. Соку мыным кин ке юрттӥз кадь: кыӵе ке вай борды кутски но вуысь ачим ик потыны быгатӥ. Тямыс иськемез кот дӥськутэн пыдын ортчи. Та арлыдам мон озьы ӧй лэсьтысал ни, вуэ пыремелэсь азьло дӥськутме кыльысал, киям ӝутыса поттысал. Но мар карод, пинал визь вылӥськем на.

Мынам улонэ кутскиз МТС-ын. Уже куриськон бумага гожтыны косӥзы. Пинал дыръям йырсие кельыт вал, бамам пужыос. Кивалтӥсь азьын гольык пыд сылӥсько. Пыдъёсам «чипыос». Куриськонме янгыштэк, чылкыт гожтӥськем — монэ секретаре пуктӥзы. Собере тодон-валанме муромытэме потӥз: дышетскыны пыри Ижысь индустриальной техникуме. Городын сютэм улон эшшо но зол шуккиз. Сиськытэк улыса, синмы лябӟыны кутскиз. Но юрттӥсьёс шедизы: дышетӥсьёс сюлмаськемен, санаторие путёвка сётӥзы. Отын мон котькыӵе сиёнэз адӟи ини, 20 нунал эмъяськытозям, 7 кило люкаськем.

Техникумез йылпумъяме бере атай кышнояськыны косэ, нош мынам дышетскеме потэ. Кык-куинь толэзьзэ ужаса, коньдон поттӥ но Москваысь механизация институтэ пыри. Ярам коть, отын улон инты сярысь сюлмаськоно ӧз луы: спортзалэ 40 адямиез интыязы. Озьы ке но мылкыд куашкамын. Кытысь ке шуак иворез кылӥсько: вуоно арын, пе, таӵе ик институт Ижын усьтӥськоз.

Берен Иже вуыса, механикая заводэ ужаны интыяськи: мастере кутӥзы. Отысен, ачим но шӧдыса ик ӧй вуы — комсомоллэн Ижысь горкомаз шеди. Собере ини Ижысь механикая институтэ пыри. Бырйи экономикаез, наукае выйи. Научной эскеронъёсы герӟаськемын вал адямилэсь ужзэ тодыны тыршонэн. 1966-тӥ арысен Ижысь научно-исследовательской технологической институтын тырши. Ужез эскеронъя лаборатория кылдытӥ, отчы ужасьёс кутӥ. Обороная министерстволы вить аръем план дасямы, 23 томъем йылпумъянъёс поттӥмы. Ваньмыз со «секретно» вал.

Вылӥ партийной школаын дышетски. Партийной но общественной ужен трос выри. 1958-тӥ арын нырысьсэ кылдытӥ Удмуртиысь Изобретательёслэсь но рационализаторъёслэсь огазеяськонзэс. Собере ужаны выжи Удмурт кун университетэ. Отын экономикая но производствоез радъянъя-чакланъя кафедра кылдытӥ. Удмурт Республикаын нырысьсэ кылдытӥ Экономика удысысь диссертациосъя кенеш. 1993-тӥ арын Информатизацияя калыккуспо академилэсь Удмуртиысь ёззэ кылдытӥ. Удмурт кун университетлэсь нырысетӥ филиалзэ радъяй. Со интыяськемын Кудымкаре. 1962-тӥ  арын Ижысь дружинникъёслэсь нырысетӥ оперативной отрядзэс кылдытӥ но соослэн нырысетӥ командирзы луи. Ваньзэ-ӧвӧлзэ 24 аспирантъёсты нодъяй. Гордъёслы сӥзьыса, «Рыжие люди. Откуда вы?» книга поттӥ.

— Тӥ быдэсак наукае выем адями. Мыло-кыдо пыриськиськоды удмуртлыкез ӝутонэ но.

— Техникумын дышетскыкум ай, Ижысь Советской ульчаетӥ мынӥсько. Азям туж йӧноесь, ӝужытэсь, чебересь нылкышноен воргорон вамышъяло. Абдрай: удмурт кылын верасько.

Паймыса шоразы кема учки на: Ижын удмурт кылын вераськыны луэ шат? Берло тодӥ: тодмо удмурт учёнойёс Александра Ивановна но Пётр Николаевич Перевощиковъёс вылӥллям. Малпай, малы мон соослэсь пӧртэм луыны кулэ?  Со ик луиз, дыр, вылӥ ӝутскыны кужым люканэ.

Удмурт калык сярысь тани мар шуысал: дауръёсын со секыт зӥбет улын улэмын. Соин ик адямиослэн кытчы ке но палэнэ кошкемзы потэ. Асьмелэн ӧвӧл огъя герӟась осконмы. Вожъяськонмы асьмелэсь но бадӟымгес, дыр. Но кытчы карод на со менталитетэз? Нокытчы уд пегӟы ни. Пумен ӟучомиськом, суро-пожо вераськиськом. Одӥг удмурт интеллигент но докладзэ чылк-чылк удмурт кылын лыдӟыны уг быгаты. Сюлэм со понна бӧрдэ.  Шумпоттӥз «Удмурт Кенешлэн» выль  тӧроез Игорь Семёнов: декабре ортчем съездын зуч-зуч чебер удмурт кылын вераськиз.

Асьмелэн ӧвӧл азьветлӥсьёсмы, куашкамын союзъёсмы (писательёслэн но, крезьгурчиослэн но, суредасьёслэн но). Кӧты уг веська, библиотекаез «лыдӟиськон юрт» яке «лыдӟон юрт» шуыса нимало, мукет интернациональной  кылъёсты берыктыны выро. Фин-угор калыклэн огъя кылыз но вал, дыр, сое мургес эскерыны басьтӥськоно ни.

Алигес аспирантурае 8 удмурт пияшъёс пыризы вал. Кӧня ке дышетскизы но пегӟизы. Оломалы егитъёслэн тодон-валан басьтыны мылкыдзы уг ӝутӥськы. Диссертация, пе, гожтоно, со бордын выронэз туж ӝег луоз. Тросэзлэн туннэ ик коньдон поттэмез потэ. Нош бигеръёс трос лыкто. Соос мыло-кыдо визь-нод люкало, нош асьмелэнъёс пегӟо.

— Воргорон, шуо, корка ӝутэ, нылпи будэтэ, писпу мерттэ. Та веранэз быдэстӥды кадь-а?

— Кузпал мыным ӟеч шедиз. Со улытозяз медицина удысын тыршиз. Лидия Николаевнаен ӵош дас арлэсь кема корка ӝутӥм. Со понна пырак варматаелэн кадь чебер но йӧно пӧрмиз. Кышно кураны Воткинске ветлыкум, мон, куанер студент, пайми вал соослэн шыкыс кадь ӝикыт юртсылы. Ныл но пи будэтӥмы. Бакча котырамы трос писпу мерттӥм. Улонлэсь куронъёссэ быдэстӥмы кадь.

— Ваньмон дырдэс, бакчаяды сяна, зарезь дурын, кунгож сьӧръёсын ортчытъяськоды, луоз?

— Нимысьтыз нокытын но шутэтскыса улэме ӧвӧл. Одӥг пол кузпалэным зарезь дуре мынӥмы, адямиос шунды шорын пыжо, нош мон библиотекае мынӥ но Карл Маркслэсь но Фридрих Энгельслэсь сочинениоссэс курисько. Библиотекарь дол шорам учке: таӵеез ӧй вал на, шуэ, шутэтскись адями, пе, сыӵе книгаосты куре. Ма, мон, книгаос лыдӟыкум ик, шутэтскисько. Научной ужъёсы бордын но ӵукнаысен бер ӝытозь пукисько.

Любовь Тихонова

Удмурт Дунне
By Удмурт Дунне 18 января, 2013 15:35