Йырвизь люка «Букварьысен»

Удмурт Дунне
By Удмурт Дунне Январь 29, 2013 11:36

Йырвизь люка «Букварьысен»

Андрей Габитов

Андрей Габитов

Глазов пединститутысь удмурт кафедрае кияз портфелен, веськрес, ӝужыт мугоро, чебер, суд йырсиё пияш пыриз. Куараез йӧн-йӧн. Бамаз пальпотон шудэ. Удмурт кылын чырткемъяськиз. Преподаватель вылымтэ со — студент Андрей Габитов. Мукет егитъёслэсь со трослы висъяське.

— Кытысь таӵе йӧно удмурт пияш Глазов институтэ вуэм ай?

— Ваньмыз паймо, мон удмурт шуыса. Нош мон адямиослэн паймемзылы паймисько, ма, удмуртъёслы лыньыр-ланьыр луоно-а, мар-а? Вордӥськи мон Дэри ёросысь Пыӵанка гуртын. Школаез пырпотыса, тросэз эшъёсы Удмурт кун университетэ пыризы. Нош мон аслэсьтымзэ лэсьтӥ.

Бон луэ вал мынам но Ижевсклы матэ кариськеме. Но университетын покчи классъёсты дышетӥсьёсты уг дасяло ук. Нош мон соослэн ужзы шоры пичи дырысеным синмаськыса учкылӥсько. Пичи нылпиосты дотово яратӥсько. Сыӵе мылкыды ик тӥни Глазов пединститутэ вуттӥз, лэся. Туэ куинетӥ курсэ потӥ ини. Дышетсконме йылпумъяса, покчи классъёсын дышетӥсь луо.
Со сяна, мон психологлы дышетскисько на. Тросэз егитъёс Москвае, Санкт-Петербурге дышетскыны кошко. Нош мон сыӵе ӧвӧл. Мон данъяськисько Глазовысь пединститутын дышетскеменым. Глазов город мыным чылкытэныз кельше. Вӧзтӥз ик Чупчи шур бызе. Калык но татын кыштыр гинэ улэ.

— Тон сяна, группаяды удмурт пиос дышетско-а?

— Группаямы пиосмы ӧвӧл, но институтын соос вань гинэ. Ми пӧртэм выжыысь пиосын — бигеръёсын, ӟучъёсын, армянъёсын — ог-огенымы тупаса улӥськомы. Общежитиын но ӵош пӧртэм ужрадъёс ортчытъяськомы. Милям нокин но татын юон-кысконэн уг эшласькы, наркоманиез поттылӥсь ик ӧвӧл. Ми татчы тодон-валан басьтыны лыктэмын ук.

— Тон кышкатэк но кепыратэк удмурт кылын вераськиськод. Мукет выжыысь потэм эшъёсыдлэсь та ласянь пыкылэмзэс уд кылӥськы-а?

— Пичи дырысеным анай кылме яратӥсько. Со понна тау карыны кулэ песянайёсылы но анай-атаелы. Туала арын удмуртлык шоры учкыны бадӟым эрик сётӥзы Брангурт песянайёс. Удмурт студентъёс шоры табере мукет выжыысь студентъёс вожъяськыса сямен учко.

— Туала арын уждун пичиен дышетон удысысь тросэз воргоронъёс кошко. Тонэ со югдур уг-а сюлмаськыты?

— Дышетӥсь ӧжыт уждун басьтэ шуыса, мон туж умой валасько. Ӵапак та ужпумез ӝутэме потыса ик, мон татчы дышетскыны пыри. Мон та удысэз уг бырйы, мукетыз палэнтӥськоз… Кин нылпиосты дышетоз? Малпасько, та югдур куке но интыысьтыз вырӟыны кулэ. Умой вакытъёс но вуозы ай, ялан тазьы луыны кулэ ӧвӧл.

— Вордӥськем палъёсыдлэсь уд мӧзмиськы-а?

— Институтын удмурт кафедра вань. Отчы пырисько ке, дорам вуыса, анай-атаеным но эшъёсыным адӟиськем кадь потӥсько. Ваньмыныз дышетӥсьёсын шалтыр-шалтыр удмурт кылын вераськисько. Соос но мыным дышизы ини, институтын но, городын но пумиськыкумы, шорам Ондӥ шуыса вазиськыло. Мон дышетӥсьёслэсь ӵемысь юрттэт курыса но юалляськисько. Студентлэн мӧзмыса пукыны дырыз чик ӧвӧл. Занятиос бере бызьыса мынӥсько библиотекае. Пичи дырысеным яратӥсько лыдӟиськыны. Изьыны выдытозь, книгаос пушкын бугыръяськисько.

— Дышетскон вискад ваньмон дырыд пичи ке но луэ, дыр, ук?

— Луэ но, туж шер. Пичи гинэ ваньмон дыр шедьтӥсько ке, соку ик спортзалэ мынӥсько. Одно ик киное ветлӥсько. Пичи дырысеным яратӥсько театрез. Таяз ини, ваньмон дыр шеде-а, уг-а, мыныны тыршисько. Спектакльёс весь уг луо ук, соин ик одӥгзэ но учкытэк кельтэме уг поты. Иже вуылыкум но, одно ик театръёсы вутскисько: удмуртсэ но, ӟучсэ но спектакльёсты учкеме потэ. Пичи дырысеным артистъёс шоры синмаськыса учкылӥсько вал. Кытӥ-отӥ сцена вылын но шудӥсь луэм потылӥз. Кӧня ке ар талэсь азьло Удмурт театрын Москваысь театральной училищее егитъёсты дышетскыны келян понна вожвылъяськон ортчытӥзы. Мон но отчы пыриськи. Но малы ке малпанме чутрак воштӥ, дась ӧй вал, лэся, мон солы, дышетӥсьлэн удысэз ик матынгес потӥз. Но мон институтын но театральной кружоке ветлӥсько, пӧртэм спектакльёсын шудӥсько. Ӝоген возьматомы Владимир Соллогублэсь «Беда от нежного сердца» спектакльзэ.

— Таӵе йӧно но визьмо пи сьӧры нылъёс уллёен бызьыло, луоз?

— Ма, трос соос. Но мынам уг поты ай йырме кыӵесэ донгеме. Вань мынам нылы, но со сьӧрлось городын улэ. Ӵемысь телефон пыр вераськиськом. Со но али вылӥ тодон-валан люка.

— Нош кыӵеен адӟиськод вуоно кузпалдэ?

— Куронъёсы сокем бадӟымесь ӧвӧл: анае но апае кадь чебер, мусо, визьмо, лякыт сямо мед луоз. Милана апае Дэриысь администрациын ужа. Со экономика удысысь кандидат. Мон весяксэ ик солэсь адӟем карыса будӥ. Туала нылъёс малы ке но узыр пиос шоры учко, соиз мыным туж уг кельшы. Кыӵе яратон сярысь отын вераськонэз?

— Астэ кинэн адӟиськод? Оло, тон директор но луод ай яке наукае кыстӥськод?

— Тодэм-валамед тырмыт луиз ке, дӥсьтонэд ватӥськыса ӧз ке улы, малы дышетскондэ азинтонтэмез? Ми сямен ик министръёс но будэмын ук: нырысь ик нылпи садэ ветлэмын, собере парта сьӧрын пукемын. Вордскемез бере ик одӥгез но адями бадӟым кивалтӥсь ӧз луы на, нырысь ик аръёсын-аръёсын, шапыкен-шапыкен, «Букварьысен» кутскыса, йырвизь люка.

Любовь Тихонова

Туспуктӥз Владимир Беломорских

Удмурт Дунне
By Удмурт Дунне Январь 29, 2013 11:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<