Ческыт медло!

Удмурт Дунне
By Удмурт Дунне Январь 11, 2013 09:51
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ческыт медло!

Дэри ёросысь Шор Постол школаысь дышетӥсь Н. Кабанова

13-тӥ январе — Россиысь прессалэн нуналэз. Праздникенымы валче туннэ ми данъяно кариським гожъясьёсты дунъясез, удмурт кылъя дышетӥсез Надежда Кабановаез.

Удмурт Республикаысь дано дышетӥсьлы, 2010-тӥ арын «Дышетон» нацпроект конкурсын вормисе потӥсьлы азинсконъёс басьтыны юртто газет-журналъёс но, соос пӧлын — «Удмурт дунне» газет.

Удмурт кун университетысь удмурт филология факультетэз йылпумъяса, Надежда Васильевна 23 арзэ ужа ни Дэри ёросысь Шор Постол шор ёзо школаын. Мукет газет-журналъёсын артэ котькуд ар соин ӵош вамышто удмуртъёсыз.

— Выль ар шутэтскон туж кема кыстӥськиз, — шуэ со. — «Удмурт дуннелэсь» мӧзмыса, «Берекет» приложенизэ сайтэ пырыса лыдӟи. Но гожъямъёсын тазьы тодматскыса, мынам кӧты уг тыры. Газетэз одно ик киям кутыны, солэсь зынзэ шӧдыны кулэ, мед со ӵаштыртоз. Урамамы интыям почта ящикъёс дорысь лымыез но сузяй — почтальонмы Саня апай капчи мылкыдын мед кожоз отчы.

Газет-журналъёсын эшъяськон мылкыд солы пичи дырысен ик пыӵатӥзы анай-атаез. Семьяязы соос дасо пумо вуо вал. Кӧтыз ӝож, туала нылпиос тросэз лыдӟиськонлэсь палэнскемын. Мумы-бубыоссы асьсэос уг лыдӟисько бере, кытысь нылпилы сыӵе сям пыӵалоз, пе. Озьы ке но дышетскисьёссэ газет борды кыскон амалъёс шедьтэ, соосты урокъёсаз кутыса. Тросэз доразы уг басьто бере, бускельёссы доры мыноно луо яке библиотекае вамышто.

Туж жаля Ува ёросысь Косой гуртын улӥсь атайзэ Василий Черепановез. Кылем арын солэн синмыз адӟемысь дугдэм, табере туж мӧзме «Удмурт дуннелэсь». Василий Алексеевич газетэнымы эшъяськем тямыс арескысен. Быдӟым ожысь бертыса, 1947-тӥ арын атаез «Советской Удмуртия» газетлы гожтӥськем махорказэ бинялтон понна. Пичи пияшлы газет туж кельшем, сое лыдӟытэк атаезлы ӧвӧл сётылэм.

Табере Надежда Васильевна Дэри ёросын ик улӥсь братэныз газетысь иворъёсты атайзылы телефон пыр мадьыло.
— Мылкыдмес бугыртӥсь материалъёс пумысен Сергеен куспамы но дырын-дырын кенешиськом. Жингыртэ ни, лыдӟид-а, пе, сыӵе-сыӵе материалэз? Пушкын бугыръяськись малпанэз кинлы ке кисьтэм потэ ук! Нош асьмелэсь мылкыдъёсмес газетозь вуттыны малы ке ум вуиське. Собере буйгатскиськом, — шуэ Н. Кабанова.

Университетын дышетскыкуз, Надежда Васильевналэн журналист луон мылкыдыз но ӝутскылэм. Пичи курсъёсысен луонлык вылэм Свердловскысь университетэ выжыны, но палэнэ кошкыны нылашлэн дӥсьтонэз тырмымтэ. Табере гожъяськон мылкыдзэ школаын ӧръя, литературая «Чингыли» кружок нуэ. Нылпиосын ӵош таӵе нимын ик газет потто.

Дышетскисьёсызлэн ужъёсынызы газетмес лыдӟисьёс но дырын-дырын тодматскыло. «Тол бабайлы гожтэт» конкурсын вормисе потыса, Владик пиез «Шундыкар» лагерьын шутэтскиз. Пияш али дышетске 8-тӥ классын, мылкыдыз вань журналист луыны. Алёна апаез но та удысэз бырйиз, Италмасысь школа-интернатэз йылпумъяса, дышетске Москваысь кун университетысь журналистика ёзын.

— Ачим гожъяськись ӧй луы ке но, газет котьку ик монэн артэ, — вера Надежда Васильевна. — Мон понна со сиён выллем. Нырысь ик киям кутӥсько «Пригородные вести», «Ӟардон» газетъёсты — ёросысь иворъёсты одно ик тодыны кулэ. Таиз мон понна капчи сиён. «Удмурт дуннеез» лыдӟыса, рос-прос сиськиськод ни. Нош «Ӟечбур!»-ез кельтӥсько десертлы — мылкыдэз шунтэ буёлъёсыныз но нылпиослэн ужъёсынызы.

Надежда Васильевналэн кияз туннэ «Удмурт дуннелэн» зӧкомем номерез. Семьяяз тодо: газетэз нырысь ик со кияз кутыны кулэ — ческыт зыныз тӧлӟыса медаз вуы. Надежда Кабанова ӵаштыртӥсь бамъёсты йылысеныз пумозяз берыкъялоз но лыдӟонзэ берпуметӥ бам бордысен кутскоз.

Синйылтытэк уз кельты гороскопез. Но сюлэмзэ тужгес но шунтозы культура удысысь иворъёс, тодмо адямиос сярысь гожъямъёс. «Кизилиосты» котьку сямен нимаз папкае интыялоз. Оскиськомы, таиз но пӧраммы лыдӟисьмылы кӧтызъя луоз. Ческыт медло, Надежда Васильевна!

Лия Малых

Туспуктӥз Владимир Беломорских

Удмурт Дунне
By Удмурт Дунне Январь 11, 2013 09:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<