Бирды ӧвӧл огшоры…

Удмурт Дунне
By Удмурт Дунне 8 января, 2013 16:23

Бирды ӧвӧл огшоры…

Чиньы выре — йырвимез ужатэ

Дэрем модаысь туж чаль потэ, пинал дӥськут пичи кыле, нош бордаз итэм чебер бирдыосты куштыны жаль. Кин тодэ, оло, со я та дӥсь борды вурӟылтыны яралоз. Соин но, лэся, дорын огшоры басма пуйыын возисько олокыӵе но буёло, быдӟалаё бирдыос. Озьы аръёсын-аръёсын уно пӧртэм бирдыос люкасько. Кытчы меда кутыны луэ соосты? Туала дизайнеръёс аспӧртэмлыко амалъёс шедьтӥллям. Бирдыослэсь лэсьтыны луэ олокыӵе но тунсыко арбериос, улон интыдэс эшшо но чебергес карыны.

Миндэр
Нылылэн яратоно шудонэз — ас киын вурем пичигес гинэ миндэр. Кулэ луоз: пӧртэм буёло басма юдэсъёс но бирдыос.
Миндэр синмез ас бордаз мед кыскоз шуыса, пӧртэм буёло басмаосты, квадратъёслы вандылыса, ог-огзы борды итылӥ. Вылаз вури пӧртэм буёло бирдыосты. Пушказ понӥ трос басма люкетъёсты — озьы пӧрмиз тунсыко миндэр. Пинал, бирдыосты кутылыса, чиньыоссэ выретэ, йырвиымзэ ужатэ, пӧртэм буёлъёсты но валаны ӝог кутске. Миндэрез чеберманы луэ на пужъятэмен.

Сяська
Ӝӧк вылдэс чебермалоз ас киыныды лэсьтэм сяська керттэт. Кулэ луозы: пӧртэм пумо яркытэсь бирдыос, картон, атлас лентаос, вож басма но векчи ез.
Вож басмалэсь вандоно пичи куаръёс, соосты дэмӟытоно ез вылэ, ез йылэ пононо бадӟым бирды, со вылэ — пичизэгес, нош йылсано воксё пичи бирдыен яке бисерен. Сяськалэсь ныдзэ озьы ик чеберманы луэ, вож бисерез сузьйыса. Сяськаосты пӧртэм луыны быгато: кыӵе бирдыос ки улады шедёзы я кызьы йырды ужа. Озьы лэсьтоно трос сяська, соосты пуктоно чебер вазае. Ваза пушкы кисьтэ бирдыос ик, соос пӧлы мертчытэ лэсьтэм сяськаостэс. Ваза дурез чеберманы луоз атлас лентаен.

Книга вискын возён
Пиналъёсты алигес гинэ тунсыкъяськыны кутскизы венен сӥньысэн? Книга вискын возён (закладка) лэсьтон туж умой дышетоз соосты бирды вурыны. Кулэ луоз: картон, пӧртэм буёло бирдыос но атлас лента.
Картонэз фломастеръёсын чебермано, вылаз вурӟоно бирдыос. Бирдыосты лякыны гинэ но луэ. Картонлэн пумаз лэсьтоно пась, со пыр поттоно атлас лентаез. Озьы пӧрме книга вискын возён.

Абажур
Кулэ луоз: вуж абажур, пӧртэм буёло бирдыос но клей.
Абажур вылэ бирдыосты вурӟылыны шуг ик луоз дыр, умойгес — лякылыса. Малпаны луэ бирдыослэсь кыӵе ке суред, кылсярысь, зарни сӥзьыл: абажур пальпотоз зарнивуам буёлъёсын.

Салфетка
Озьы ик бирдыосын чеберманы луэ сиськон палась ӝӧкез но. Огшоры етӥн салфетка вылын мед мынялозы виноград, улмо, чия… Соос ваньмыз пӧрмемын пӧртэм буёло бирдыослэсь. Куаръёссэ пужъятыны луоз.

Фоторамка
Огшоры фоторамкаосты но чеберманы луоз трос пумо бирдыосын. Рамказэ лэсьтыны луоз картонлэсь но. Вылаз клеен лякылоно бирды. Клей быръёно љог куасьмисьсэ.

Елена Вахрушева

Удмурт Дунне
By Удмурт Дунне 8 января, 2013 16:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<