Зӧк Люм пичия

Удмурт Дунне
By Удмурт Дунне 9 декабря, 2012 16:19
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Зӧк Люм пичия

Дышетӥсьёс Т. Щепина, О. Хайнина

Люм школа Глазов ёросын одӥгез вашкалаез луэ. Солэн историез 140 арлы пыдлое кыстӥське.

Нылпи куараослэсь мӧзмон
Кӧня сюрс нылпиос та школаын тодон-валан люказы ни меда! Вал котькыӵе дыръёс. Ӟеч вакытъёсы со шор ёзо лыдъяськылӥз. 2010-тӥын пиналъёсты дышетӥзы  на  9-тӥ классозь. Нош ар ортчыса, татчы кельтӥзы покчи классъёсын дышетскисьёсты гинэ. Озьы республикаысьтымы дышетон учреждениос пӧлын оптимизация ортчытон люмъёслэн улон-вылоназы зол шӧдӥськиз. Гуртоослы валэктӥзы: бадӟым школаез возён трос ыштонъёс вае. Нылпиосты выжтозы Дондыкарысь школае, соосты нуозы-ваёзы автобусэн.

Люм школалэн юртэз пичи ик ӧй вал — улыно-вылыно юртын бадӟымесь классъёс, паськытэсь коридоръёс. Ма, со пуктэмын ай Люм черкогуртлэн сяськаян вакытъёсаз, 1970-тӥ аръёслэн пумазы. Татысь «Люмский» эштос азинсконъёсыныз быдэс республикамылы тодмо вал. 2003-тӥ арын школалэсь липетсэ но быдэсак выльдӥзы — профнастилэн шобыртӥзы.

Малпазы меда соку, кӧня ке ар ортчыса, та школа шал-шал буш кылёз шуыса. Туэ кыкетӥ арзэ ни со, пинал куараослэсь мӧзмыса, сылэ — вӧсезлы чидатэк, тани-тани губырскоз кадь. Вӧзтӥз ортчись гуртоос гинэ шораз лулӟылыса учкыло.

— Берло арзэ отчы 38 пинал дышетскыны ветлӥз на, — тодаз вае дышетӥсь Татьяна Арсентьевна Щепина. — Покчи классъёсы ветлӥсьёсмы но трос ӧвӧл — 14 пинал. Артэ юртын интыяськемын нылпи сад. Отчы кык группа усьтыны ӧм быгатэ, нылпиос тырмымтэен.
Со понна кыӵе тузӥ интые усьтэмын покчиослы школа! Городъёслы вожъяськымон.

Таиз юрт но пуктыны кутскемын вылэм ай Совето вакытъёсы. Шуылӥзы: татын  усьтӥськоз культурая центр! Солы проектэз ой! кыӵе мудрон вал.

Но ваньзэ тарказы кылем даурысь 90-тӥ аръёс. Лэсьтӥськон ужъёс гуньдӥзы 13 арлы. Юртлэсь лысьӧмзэ но шӧртчиосыз кирпичен-кирпичен нуллыны куризы ни вал.

— Президентэ сокугес гинэ пуксемын вал А. Волков,  — тодазы ваё гуртоос.  — Солы вазиськонэн потӥм: культурая центрмылы усьтӥськытэк ик бырыны эн сётэ. Бӧрысьгес Президент ачиз но кожылӥз черкогуртамы. Лэсьтӥськон ужъёс выльысь вырӟизы! Бен, проектсэ быдэсак выльдӥзы. Клубен одӥг липет улэ пуктоно шуизы школа, больница, библиотека, почта.
Шуэмын — лэсьтэмын.

Узырмизы, кедр вузаса
Школае кожыкумы, отын пинал куараос уг кылӥсько ни вал. Урокъёс кемалась быремын. Дышетӥсьёс Татьяна Арсентьевна Щепина но Ольга Вениаминовна Хаймина гинэ ӵуказе нуналлы дасясько. Малпамтэ куноосты, милемыз, соос чик уг возьмало вал. Но маин ушъяськыны соку ик шедьтӥзы: 7 компьютерзы, 2 интерактивной досказы. Нырысетӥзэ досказэс, пе, «Дышетон» нацпроектын нюръяськемзы понна сётӥзы вал, вормисьёс радэ соку ӧз шеде ке но. Ма понна кыкетӥзэ висъязы — валаса но вуттӥллямтэ. Дышетон удысэз азинтон программа чотын луоз, пе.

— Ма, берло арзэ мар но уг келяло ни милемлы! Таӵе ӟеч вакытъёсты адӟылэмъёс вунӥзы ни вал, — шуо дышетӥсьёс. — Азьвылзэ юртмес пытсамзы бере но отысь вань тӥрлык кылиз милемлы. Дондыкар школае номыре ик ӧз басьтэ. Химия, биология кабинетъёсысь дышетон пособиосты жаг куян интые куштоно луиз…

Син шорамы йӧтӥзы тренажёръёс.
— Зэмен но, тӥ туж узыресь, — паймемез ватыны уг луы.
— Ой, тренажёръёсын нимысьтыз история, вераны но оло дӥсьтод, оло уд… — гуньдэм кадь луизы Татьяна Арсентьевнаен Ольга Вениаминовна.

Ужпум тани ма бордын вылэм. Азьвыл школа азбарын будо кедръёс. Мерттэм ай соосты биологиен дышетӥсь, Быдӟым тылож пыр потэм Степан Васильевич Мышкин. Вылысьтыз вылаз будӥсь писпуосты синйылтӥллям палэнысь лыктэмъёс, кин ке соосты Москва палась вал шуэ, кин ке Сочиысь кожам. Озьы-а, тазьы-а, но матысь ик ӧвӧл. Куноос куриллям: коть кыксэ ке но писпудэс вузалэ… Отӥяз одӥгаз газетын потӥз лек статья, дышетӥсьёсты кедръёсты вузамзы понна пышкылыса. Нылпиос, пе, мертто, соос вузало. Трос керӟегъяськоно  луизы визьнодасьёс. Но сюлэмзы чылкыт: одӥг копейказэ но тус-тас ӧз каре. Тренажёръёсазы табере ёзвиоссэс кыдато дышетӥсьёс но, нылпиос но.

Школаын коть чимаса шуд: кык бадӟым классъёс, нылпиослы ёзвиоссэс кыдатыны-бызьылыны зал. Учительское дас но ӝӧк пуктыны малпад ке, инты шедёз. Нош татын со куинь муртлы — директорлы но кык дышетӥсьлы — чакламын.
Огкылын вераса, ӝожтӥськыны номырлы.

 

Эмъясь О. Кельдышева

Городэ кӧчон
Дышетонъя но наукая министерстволэн ивортэмезъя, 2011-тӥ — 2014-тӥ аръёсы шаерамы 30-лэсь ятыр школаез пытсаны чакламын. Отын дышетскисьёсыз чиньыен лыдъямон кылемын. Эшшо 80-лэсь ятырезлэн воштӥськоз статуссы. Шуом, кызьы Люм шор ёзо школа пӧрмиз начальнойлы. Оптимизация юнме малпамын ӧй вал — улонлэн куронэз сыӵе. Шырыт луоно. Озьы школаослэсь лыдзэс кулэстыса, республикамы ог 44 но ӝыны миллион манетэз шыръяны чаклаз.

Но малы меда бодылэн пумыз кык? Огласянь, люмъёс табере шуныт интыын лыдӟиськыны, концерт учкыны быгато. Нош кыӵе соослэн больницазы! Асьсэлэн физиокабинетсы, лабораторизы, татын ик аптека, пинь йӧнатон, массаж лэсьтон кабинетъёс. Соос югытэсь, шунытэсь, вӧл-вӧлэсь! 20 койкалы стационарзы артэ юртын интыяськемын. Эмъясь Ольга Алексеевна Кельдышева верамъя, чакласа возё ог 1 сюрс 300 адямиез, со пӧлысь ог 100-эз — нылпиос.

Бен, нылпиос трос ӧвӧл. Егитъёс кошко городэ, гуртэ кылё мӧйыос гинэ. Уката но со шӧдӥськиз шор ёзо школаез быдтэм бере. Иське, бодылэн кыкетӥ пумыз шукке ик.

— Тани кык арзэ ни ужаськом врачтэк, кылемын акушеръёс, эмъясь сузэръёс гинэ. Педиатрмы но быдэс ставкалы уг ужа, — вера Ольга Алексеевна. — Вал милям огъя практикаен врачмы. Школаез пытсамзы бере кошкиз. Угось пиналъёсызлы школае ветлоно на. Оглюкетэз дышетӥсьёс но Глазовысь уж шедьтӥзы. Ма, «Люмский» совхозмы но табере куашкамын, со интые «Северный» ООО кылдытэмын. Пичи гинэ со, ужасьёсты кутэмзы туж ик уг поты.

Люмысен Глазовозь ог 25 иськем гинэ. Соин ик егитъёс машинае пуксё но отчы ужаны ширто. Куд-огез пиналъёссэс но Глазовысь школаосы, нылпи садъёсы сётыны кутскизы ни. Пумен соос ӟучомо, город шӧмъемесь луо.

Куке но зӧк Люм пичия.  Специалистъёсты уг гочаты ни ӟеч ужан инты но. Люмын кадь тузӥ культурая центр быдэс ёросын ӧвӧл. Нош отчы но ужасьёс уг лыкто — со кузётэк сылэ. Нош эмъясь Ольга Кельдышева аслэсьтыз вера:

— Дондыкар 28 иськем палэнын. Нылпиос доразы нуназе бере куинь-ньыль часын гинэ берытско. Соос быдэс нунал сюрес вылын ук — жадё. Кызьы ӟеч дышетскыны пӧрмытозы, тазалыксы юн луоз-а?

Элина Кумачёва

Туспуктӥз Владимир Беломорских

Удмурт Дунне
By Удмурт Дунне 9 декабря, 2012 16:19