Югра: кыдёкын ке но — матын

Удмурт Дунне
By Удмурт Дунне Декабрь 9, 2012 16:02

Югра: кыдёкын ке но — матын

Ноябрь толэзе Ханты-Мансийске люкаськылӥзы фин-угор кылъёсын гожъяськись газетчиос. Соос асьсэ газет-журналъёссы пыр выжы кылъёссэс утён сярысь вераськизы но «Ханты ясанг» («Хант кыл») газетэз 55 ар тырмонэныз ӟечкылазы.

Ивор усёз вертолётысь
Удмурт но пор газетъёслы ӝоген 100 ар тырмоз ни бере, хантъёс милемлы туж пинал пото ай. Аслэсьтыз 55 арзэ пусъён аре хант газет потэ кык диалектэн (выль арысен чакламын ньылен), чылк-чылк тӧдьы бумага вылын, турлы буёло. Но тиражез — 400 экземпляр… Арлы сылэ 150 манет гинэ. Уйпалан улӥсьёс понна со одӥг килограмм селёдкалэн дуныз. Но уг басьто! Зэм, оскон вань, газет ӝоген кыкетӥ шокчон басьтоз шуыса — Уйпалась ӧжыт лыдъем выжы калыкъёсты утёнъя кун программа чотын ханты но манси кылъёсын потӥсь газетъёсты кайтаысен вӧлмытозы чылкак дунтэк!

— Ма, пичи дыръямы озьы ик вал, — тодаз вае журналист Алёна Молданова, — стойбище вадьсысен книга-газетъёсты вертолётысь куязы. Сотэк ми ас кылмес утьыны нокызьы ӧй быгатысалмы, малы ке шуоно тапала мувӧй поттӥсьёс вуэм бере Югра музъеммы сураськиз-пожаськиз.

Хантлэн яратонэз — кунлэн сюлмаськонэз
Зэмен но, сураськем инты. Хант нылъёс Синюшко, Данилко, Вах фамилиос нулло. Угор выжыысь кышномуртъёслэн картъёссы — украинъёс, вань на турокъёслы, азербайджанъёслы быземъёс. Городысь шераз семьяын кузпалъёс кыксы ик хантъёс. Нылкышноос оскыто, зол яратыса бызизы, тупаса уло шуыса. Кин тодэ, яратонлы судья ӧвӧл.

Но тодӥськоды, луоз, вылӥ верам программая ӧжыт лыдъем выжы калыкъёслы кун ласянь пӧртэм юрттэт сётӥськыны кулэ. Майбыр улэмед ке потэ, мар но уд даурты вылэм. Тодӥськоды на, дыр, кызьы огвакытэ чутрак будӥз хантъёслэн лыдзы — асьсэды та выжы пӧлы пыртыны кутскизы ӟучъёс но. Собере сӥс пыр поттыны кутскизы. Зэм, соку ик мукетыз амал сюриз — суро бракъёс. Кузпал одӥгез хант яке манси ке, вань чаклам льготаос но компенсациос семьялы вуо.

Со сярысь, зэм, асьсэос хантъёс уг верало, кепырало-а, мар-а. Но Правительствоын ортчем котырес ӝӧк сьӧрын шараяськиз: ӧжыт лыдъем выжы калыкысь адямилы но солэн семьяысьтыз котькуд муртлы улон инты басьтыны берыктонтэм вылысь быдэн 800 сюрс манет висъяське. Зэм, та юрттэт кӧня ке ар ӧз висъяськылы, уксё, пе, ӧй вал. Сое буре вайыса, вылды, хант эшъёсмы керӟегъясько: кызьы меда уг возьдасько вераны, мон 12 ар квартира возьмай! Субсидия ӧз тырмы, 200 сюрс ватсано луиз на…

Нылпиосты будэтон, иворзылы осконо ке, нокыӵе шугъяськон уг вайы. Школаын дышетскись пиналлы сиськыны нуналаз 91 манет висъяське, мыно-ветлон — дунтэк. Ёрмыса улӥсь семьяосысь пиналъёслы — уката бадӟым саклык. Нылпи садэ ветлӥсьлы араз одӥг пол висъяське 5 сюрс манет, нырысетӥ классэ мынӥсьлы — 9 сюрс манет, вќжоосызлы арлы быдэ — 7 сюрс. Со уксё чакламын школае мынон дӥськут басьтыны. Со сяна, пиналъёслэсь тазалыксэс юнматон вылысь соосты котькуд гужем дунтэк санаторийын эмъяло.

Студентъёс нош воксё йӧлвыл пӧлын уяло: вылӥ дышетсконние пырем егит мурт 1-тӥ курсын 40 сюрс манет юрттэт басьтэ, 5-тӥ курссэ йылпумъяку — 50 сюрс, со сяна эшшо быдэн 100 сюрс — арлы быдэ! Мыно-ветло дунтэк, общежитие понна уг тыро, стипендизы вӧзы 1800 манет ватсэт басьто. Таӵе пумиськон бере амалтэк кышнояськымтэ хантэз утчам потыны кутскиз, но кышномуртъёссы веразы: уд шедьтэ, ми асьмеос школаысен занятьтӥськом ни…

Айболит: мар уг тырмы? Бинт!
Та палась больницае пыраме вань тодмое сьӧры. Эмчиослэн ужамзылы, вазиськемзылы паймыса, олокӧня пол юай: дунын больницае пыртӥд, дыр. Син азяды пуктэ ай: ӧсэтӥ пырыку ик, тонэ пальпотыса пумита чебер дӥсяськем нылмурт, регистратурае келя, пуксьыны дэмла, ачиз тон понна карточка утча, номерок шедьтэ но «ойдолэ мон сьӧры» шуыса, врач доры келя. Со понна номыр уг куро, тау кылэн тырме.
Демография синмаськымон — нылпиос вордскемъя Югра Дагестан но Чечня сьӧры уйиське. Зэм, татын ваньзэ лыдъяло, хантъёсты но мансиосты гинэ уг. Нош ӧжыт лыдъем ӵыжы-выжыосмылэн лыдзы али 30 сюрс 384 мурт лыдъяське. 2002-тћ арын ортчем переписья лыдзы 28 сюрс 678 вал.

Тазалыкез  утёнъя департаментсылэн кивалтӥсез Сергей Щукин вера: кризис вакытъёсы но одӥг медпункт но пытсамын ӧвӧл. Котькуд муниципальной ёросын ужа ветлӥсь бригада (отчы 12 эмчи пыре, терапевт сяна, окулист, невролог, кардиолог но мукетъёс), калык доры пота ӧтемъя но планъя медосмотр ортчытыны. Со сяна, секыт югдуре потыны котьку дась санавиацилэн 4 вертолётэз но одӥг самолёт. Но хант но манси эшъёсмы ӝожтӥсько: тазалыкез утён гуртъёсын туж урод радъямын. Паймеммылы пумит верало: эмчиос, бен, стойбищеосы вуыло, но ӝытозь ужамзы уг поты, кык-куинь часкын кошко ни. Нош милям воргоронъёсмы отчыозь чорыгамысь, пӧйшурамысь уг вуо на. Ма, одӥг нунал пӧйшуратэк кылизы ке, сютэм уд кулэ, дыр, ук, паймиськом ми. Ум, вазё эшъёсмы, но соос милесьтым уг кылзӥсько. Собере, азьвыл гуртоослы эмъюм но мар дунтэк сёто вал, али милемлы йод но, бинт но уг висъяло… Ми пумитазы лулским гинэ.

Шунды пуксе — «Солнце» потэ…
Кык нунал ӵоже пӧртэм ужрадъёс вал: хант художникен Геннадий Райшевен, тодмо кылбурчилэн Юван Шесталовлэн пиеныз, дано крезьгурчиен Владимир Шесталовен пумиськонъёс, Тору Маа заповедникын (асьме «Лудорвай» выллем) куноян, муксун чорыг но пужей лым сиён… Но сюлэм тужгес ӟырдаз но бӧрдӥз, шуназ но буйгаз, обь-угор калыкъёслэн «Солнце» театрзылэн «Сьӧд кырӟан» спектакляз вуылыса. Со пуктэмын хант драматурглэн Татьяна Молдановалэн «В гнёздышке одиноком» пьесаезъя.

Та театр сярысь газетамы вазенгес гожъяллямы ни. Сое кылдытӥз удмурт режиссёр Ольга Александрова. Али Ольга Москваын улэ-ужа ни, шуизы, но бӧрсяз со туж мур но яркыт пытьы кельтэм. Вераны кулэ, Ханты-Мансийскын ӧвӧл театрлы нимысьтыз юртсы, ужало Эшъяськон юртын, нош труппазы туж егит ай — нимысьтыз хант группа таиз нырысетӥез ай. Ваньмыз-ӧвӧлэз соос 16 кузя гинэ. Нош режиссёр ӧтемын Москваысь. Али актёръёсын ужа Анна-Ксения Вишневская.

Туэ сӥзьыл Саранскын ортчем фин-угор театръёслэн ӵошатсконазы та спектакль вормисе потӥз. Егитъёс уг кышкало Москваын ортчылӥсь ӵошатсконъёсы но пыриськылыны. Вормыны ӧм на вормылэ, но со понна ӟеч визь-нод басьтӥськом, асьмелы оскыны кутскиськом, шуо.
Бордазы тросгес учкисез кыскон понна али артистъёс шудо ай тросгес ӟуч кылын, хант кылын кылало-бурало, кырӟало гинэ, но со, паймоно кадь, уг люкеты театрлы хант луыны. Татын котькуд ӝыт аншлаг — городысь театрез яратӥсьёс ветло «хант спектакле», малы ке шуоно со хантъёс сярысь, со дасямын хант авторлэн пьесаез вылын, сое шудо хант нылъёс-пиос. Но шудо озьы — мугор зубектэ, йырси пежырске, синкыли гуньдытэ.

Пужейёс городэтӥ уг ветло
Ханты-Мансийск — выль, туала, чылкыт город. Машинаен город кузя 60 искемлэсь ӝог уд ширты — котькытын камераос. Ужад ке, 30 сюрслэсь ичи уждун уд басьты. Зол ужад ке — 70-80 сюрсозь но вуоз. Ваньмыз ворттыло иномаркаен, вучайы шуба фуфайка кадь потыны кутскиз — вань кышномуртъёс вылын со. Удмурт сямен лабыртыны кутскиськод — Ижысь адямиосты пумитаськод…

Та городын. Нош зэмос хантъёс но мансиос  уло кыдёкысь гуртъёсын. Вашкала дыръёсы сямен ик пужей вордо, соосты утён вылысь њырт кезьытъёсы но кионлэсь пастухало. Куд-огез ноку уг вуылы городэ, уло инкуазен огкылысь. Соин туж сюлэмзы висе музъемъёссэс нефтяникъёс саптамысь. Кун сӥзе бен со понна компенсация. Но яке солы коньдон уг шедьты, яке собыдња выт тупатэ, компенсацилэн нимыз гинэ кыле на. Коньдонэз но кулэ ӧвӧл, вашкала музъеммес медаз гинэ исалэ вал, шуо хантъёс-мансиос.

Югра музъем вылэ кык пол вуылыса ни, мон таки   ӧй на ву пужейёс доры. ӧй на ыб одӥг коньыез но, ӧй на куты одӥг чорыг но. Озьыен, мон тӥледлы хантъёс сярысь номыр ӧй мадьы на. Соин ик нош ветлытэк ӧвӧл.

Зинаида Рябинина

Удмурт Дунне
By Удмурт Дунне Декабрь 9, 2012 16:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<