Визь-нод

Удмурт Дунне
By Удмурт Дунне Декабрь 21, 2012 13:43

Визь-нод

О. Юскин

Олег Юскин тӥледын пумиськыны мылкыд каре 25-тӥ декабре 10 часысен 12 часозь редакциын.
Сюлэмдэс чепыллясь юанъёсты вань ке, пушкады ватӥськыса эн улэ. Шугъяськонъёстэс  «Удмурт дуннеен» ӵош, оло, сэрттыны-пертчыны пӧрмытомы. Юанъёстэс сётэлэ (3412) 73-33-38 номеръя. СМС ыстэлэ 8-963-028-23-87 номеръя. Быгатӥськоды гожтэт но лэзьыны. Валэктон шедьтоды «Визь-нод» бамысь.

Люконтэм?
Картэным ӝыны ар ини улӥськомы нимаз. Нылмылы 1 арес ӧвӧл на. Люкиськеме потэ. Загсэ мынӥ. Отысен судэ ыстӥзы. Судья малпаськыны косӥз на, 6 толэзь ортчыса, пе, лыктоды. Нылпилы 1 арес тырмытозь, люкиськыны уг луы шат?
Лариса В.
Шаркан ёрос.

Нылпи быдэ вуэмын ӧвӧл ке, кузпалъёс загс пыр гинэ люкиськыны уг быгато. Пичи нылпиен муртъёсты одно ик люке суд. Озьы кулэ нылпиез кин ке борды улыны юнматон но алиментлэсь быдӟалазэ тупатон понна. Семья кодексэз учконо ке, суд быгатэ кузпалъёслы малпаськыны дыр сётыны — 3-сен 6 толэзёзь. Керетэм кузпалъёс со куспын выльысь тупаны но быгатозы. Та дыр ӵоже куспазы номыр уг воштӥськы ке, судлэн чигнаны правоез ӧвӧл ни.

Музъем кузё?
Пичи Пурга ёросын музъем кесэге вань.  Документъёсъя со мон вылэ гожтэмын. Нылылы сое сётэме потэ. Кызьы умойгес луоз: завещание гожтыса яке кузьмаса (дарственной лэсьтыса)? Со музъем вылэ нылылы корка пуктэммы потэ.
Виктор И.
Пичи Пурга ёрос.

Асьтэлэн, нылдэс кыскытэк, музъем вылэ пуктӥськемды потэ ке, наследстволы документъёстэс дасялэ. Нылдылэн ваньзэ ас вылаз али ик гожтэмез потэ ке, ваньзэ документъёсын юнматыса, дарственной гожтэ. Соку гинэ нылды быгатоз басьтыны пуктӥськыны лэзись документ.

Куинь полэс выт
2010-тӥ арын сад-бакчаме вузай. Вань вытъёсты тыри. Но Выт бичанъя инспекциысь алигес вуиз гожтэт, 2009-тӥ ар понна налог курыса. Быдӟалаез 1 сюрс 222 манет. 2008-тӥ арын со выллем ик вытлэн быдӟалаез 487 манет гинэ вал. Озьы будыны быгатэ вал шат? Музъемме учётысь кемалась куштӥ. Ачим кыкетӥ группаен инвалид, ужысь ветеран. Мар кароно?
Кудяков Е.
Иж город.

Тӥледлы Выт бичанъя инспекцие мыноно, отын куриськон гожтоно. Пуштросэз таӵе луыны кулэ. Мыным налоговой уведомление вуиз сыӵе-сыӵе номерен, музъем понна 2009-тӥ арлы налог тырыны косыса. Быдӟалаез 1 сюрс 222 манет. Но сыӵегес ик вытлэн 2008-тӥ арын быдӟалаез вал 487 манет. Таизлэсь но уведомленилэсь-гожтэтлэсь номерзэ пусъёно. Куроно: валэктэ, кыӵе мугъя 2009-тӥ арын налоглэн быдӟалаез куинь поллы будӥз? Озьы ик курисько валэктыны, малы мынам выт тыронъя нокыӵе но льготаосы ӧвӧл.

Куриськондэс кык экземплярен гожтэ. Кыказ но, басьтӥзы шуыса, числоен но кинюртэмен мед гожтӥськозы. Валэктонзэс кулэ адресъя келяны мед быгатозы шуыса, улэм интыдэс пусйыны эн вунэтэ. Налоговойысь гожтэтъёстэс бордаз, копировать карыса, понэ на. Соку гинэ юанъёстылы валэктон кылыны быгатоды.

Алимент кекатэ
Судэ ортчиз. Алимент тыронме туж кема кыски уго — маке мында люкаськиз 12 ар ӵоже. Но мынам сое туннэ ик ваньзэ тыреме уг луы — уждунэ пичи, алигес эшшо пиналы вордӥськиз. Луэ-а со пунэмен маке карыны?
Олег С.
Алнаш ёрос.

Судэ вазиське. Пичи уждунды, семья доходды сярысь справка басьтэ. Судын выльысь учкозы югдурдэс. Сыӵе дыръя суд быгатоз люкаськем алименттэс кӧня ке толэзь ӵоже тырыны косыны, быдӟалазэ тупатоз.

Машина шуккиз…
Монэ, сюрес дуртӥ мынӥсь сазь муртэ, машина донгиз. Дугдӥз. Юрттоз кожай. Нош шофёрез урмиз, монэ ик тышкаса кельтӥз. Машинаяз пуксиз но азьлань шонтӥз.  Адӟисьёс ӝог юрттэт сётӥсьёсты ӧтизы. Лобаса ворттылӥсьлэсь машина номерзэ но бумага вылэ гожтыса сётӥзы. Полициын ужасьёс доры вазиськи, отын нимысьтыз куриськон гожтӥ. Шуккиськем интыосме больницаын документэн юнматӥ — йыры табере висьылэ уго. Но полициысь мыным туннэ ке но нокыӵе ивор ӧз вуы на — толэзьлэсь кема дыр ортчиз ни.  Мар кароно?
Пётр К.
Можга ёрос.

Полицилэн югдур борды басьтӥськымтэез сярысь куриськонэн вазиське судэ но прокуратурае. Полициын ужасьёсты мед зуркатозы, югдурдэс кутсконысеныз пумозяз мед эскерозы. Машина номерез но адӟисьёс сюризы, шуиськоды ук. Куре на: судлэн решениезъя тӥледлы уведомление мед вуоз. Адрестэс, телефон номердэс пусъе.

Елена Фёдорова

Удмурт Дунне
By Удмурт Дунне Декабрь 21, 2012 13:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<