Ведра-карнан вунӥз…

Удмурт Дунне
By Удмурт Дунне 28 декабря, 2012 12:27

Ведра-карнан вунӥз…

Палэнэ потаса, дорлэсь мӧзмон уката зол шӧдӥське.

Брангурт песянайёс та арлэсь номыр паймытӥсьсэ ӧз возьмалэ вал. Качыян (високосной) арез соос котьку но чакласькысагес пумитало. Нош улон ас сяменыз берыктӥз. Табере удмурт песянайёсмы быдэс дуннелы тодмоесь.

«Брангурт песянайёс» коллективысь нылкышноослы ваньмызлы ик зэмос песянай луыны ӧз на кылды вал. Ольга Туктаревалэн но Алевтина Бегишевалэн нунокъёссы ӧй вал на. Но таяз аре югдур воштӥськиз — Бегишевъёслэн семьяязы пичи Василиса вордскиз. Табере нылоклы 8 толэзь ни.

— Ар котыр ласянь паймымон ортче, — шуэ Алевтина Бегишева. — Ми сомында ӟеч калыкен пумиськылӥськом. Концертъёсы потаса, сыӵе жадьыса доре вуиськод кадь, всё, нокытчы мынэм уг ни поты, нош гурт калыкмы милемыз шумпотон синкылиен пумита, ушъя, дунъя.

Но таӵе сӥё-дано луонлэн урод палыз но вылэм. Удмурт Республикаысь калык артистъёсмы табере доразы уг пуко, арнялы быдэ кадь шаермылэн палэназ потало.

— Семьяен ӵош но улэм потэ вылэм. Сузэр-вынъёсылэн но Аляпайзы доры бертэмзы, кунояськемзы, пыжиськем сиемзы потэ, нош мон гастрольёсын ветлӥсько, — вера Алевтина Геннадьевна.

Кытчы но ӧз вуэ ни песянайёсмы та ар ӵоже — Россиысь кӧня городъёсы ӧтчазы. Кунгож сьӧры но потазы — Азербайджанэ, Латвие, Белоруссие, Украинае, Германие. Ма, ваньзэ вераны но уд шедьты!

Нош кӧня куноос табере вуо Брангуртэ! Россиысь но кунгож сьӧрысь журналистъёс пумтэм лыкто. Россиысь калык артист Сергей Безруков но перепеч сиыны вуылӥз. Зэм, туэ брангуртъёслы адӟыны ӧз кылды Президентэз Владимир Путинэз гинэ. Уго «Евровидениын» кыкетӥ инты басьтэмзы бере Владимир Владимирович кышкатъяз вал куное вуонэн. Та дырозь песянайёслэн но Президентлэн ужан графикъёссы уггес тупало, лэся.

Воштӥськон омыр шӧдске Брангуртын но. Нырысь ик, татын волязы сюресъёс. Уката ёрмо вал Дородова Зояпайлэн ульчаяз улӥсьёс. Табере Зояпай но, котырысь калык но дэри ӧжытгес колалозы. Та урамын улӥсьёс ик вулы но олокудкеме уз ни ветлэ. Зояпай но ву дуре ведра-карнанэн мыноно луэ вал, ӵемысь колонкаос но ӧз ужалэ. Табере таӵе сюлмаськонзы та ульчаын ӧвӧл ни.

Нош гуртысь клублэн чеберскемезлы шумпото культурая юртлэн кивалтӥсез Ольга Туктарева но, ӵош ужась эшъёсыз но, нылпиос но, гурт калык но.

— Дотово кельше выльдэм клубмы, — шуэ Ольга Николаевна. — Но та дырозь ӧвӧл на аппаратурамы но залын пуконъёсмы. Соин клубмес сӥё-дано ӧм на усьтэ.

Ваньмыз ик гуртоос шумпото, ӝутскись черк шоры учкыса. Лэсьтӥськисьёс Выль арозь ӝутозы ни борддоръёсты. Лэсьтӥськонлы 5 миллион манет быдтэмын ни. Та пӧлысь 2,5 миллион манет — Президентлэн нимысьтыз фондысьтыз юрттэт — висъяз Удмуртилэн йырыз Александр Волков.

Зэм, черк ӝутон капчиен уг быдэсмы. Нырысь малпазы, юртлэн мугорыз сӥзьылозь липет улэ пыроз шуыса. Но озьы гинэ ӧз пӧрмы. Лэсьтоно ужъёс трос на. Брангуртъёс табере оско, Тройчае соос выль черкын огинын чирдозы-вӧсяськозы шуыса.

Кинлы кызьы, нош мон Брангурт песянайёсты телевизорысь адӟисько ке, синъёсме воштыны уг ни быгатӥськы. Удмурт кенакъёсмес али мыло-кыдо ӧтё ток-шоуосы но концертъёсы.

Галина Николаевна Конева «Время обедать» передачаын пӧраськиз ни, «Давай поженимся» ток-шоуын кен дэмлась но луиз ни.

— Кытчы ке ӧтё ке, учкись чотын гинэ мыно шуисько, — вера Галина Николаевна. _ Нош озьы гинэ уг луы: весь камера азе султыто. Сыӵе дыръя дотово воже потэ, ма, лек тусме учкисьёс сотэк но адӟо, дыр.

Галина Николаевналэн мылкыдыз валамон. Со сюлмаське, калык удмурт песянайёс шоры гажаса мед учкоз шуыса. Нош «Давай поженимся» передачаын нылкышноос 6 час ӵоже съёмкаосты возьмазы, шуныт пыдкутчанзэс туфлиослы воштыны ӧдъязы но… Дугдытӥсь луиз: пыдкуктэс, пе, эн вошъялэ, ум возьматэ. Песянайёс оскизы, гань-гань кариськизы.

Нош телевизорын юри малпам кадь — сапегъёс но нордикъёс. Кӧня пол камера пыдкукъёссы шоры учыралляз — веранэз ик ӧвӧл ни. Таиз пумысен песянайёслэн кӧтсы ӝож луэ, но шоу-бизнес таӵе чыры-пырыос шоры чиньы пыртӥ учке, лэся.

Ортчись ар удмурт песянайёсмес шаплыгес кариз. Табере соос ваньзы ик мобильной телефонъёсын гастрольёсы потало — матысь ӵыжы-выжыосынызы котьку вераськыны быгато. Смс гинэ бичаны ӧз на дыше, кин тодэ, оло, тазэ но пӧрмытозы ай.

Сюрес вылын но Брангурт песянайёсмы ужлы уг ёрмо, пыдвыл кертто, пӧртэм шортъёслэсь мунёос лэсьто — кузьымтэк соос куное уг потало.

Вуоно арзы Брангурт песянайёсмылэн уката устогес мед ортчысал. Сӥзиськом тӥледлы вольыт сюрес, творчествоын азинсконъёс, нош сюлэме пырись кырӟанъёсты асьме удмурт радиотулкымъёсын но мед чузъяськозы.

Алёна Ионина

Удмурт Дунне
By Удмурт Дунне 28 декабря, 2012 12:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<