Дыгаевлэн ужез дыгатэк мынэ

Удмурт Дунне
By Удмурт Дунне 7 декабря, 2012 18:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Дыгаевлэн ужез дыгатэк мынэ

О. Дыгаев

Пичи Пурга ёросысь Куреггуртысь Олег Дыгаев кема аръёс ӵоже ни гуртлэн тӧроез луэ. Мӧйы калыкен кылыз тупа, но уката адӟем карымон со пиналъёс понна.

Егитъёс Дыгаев бордын инкубаторын сямен будо — одӥгъёсыз быдэ вуыса бадӟым улон сюрес кузя вамышто, соос интые пичиосыз визь-нод люканы лыкто. Табере бускель гуртъёсысь егитъёс но курисько куреггуртъёслэн командаязы. Озьы ик Олег Николаевич сюлмысь тырше ужаны шуге-леке вуэм семьяосын.

Тужгес адӟем карымонэз — гуртысь пиослэн хорзы. Кырӟась егитъёсты кужмо кичабонъёсын пумиталляло Ижысь фольклор ӝытъёсын но, ёросын но. Хорысь пиналъёс умой тодо удмурт калыклэсь сямъёссэ. Матысь Баграш-Бигра но мукет гуртъёсы солдат пи келянэ ӧтчало Дыгаевлэсь коллективзэ. Вератэк кельтыны уг луы созэ но: Куреггуртын клубзы ӧвӧл. Соин хорын кырӟасьёслы люкаськылыны нокытчы, соос урамын но репетициос ортчытъяло.

Ачиз Олег Николаевич клубен кивалтэ вал. Соин егитъёслэн ужпумъёссэс со вала. Куреггуртлы матысь гуртъёсын но клубзы ӧвӧл. Соин таяз гужем ӵоже Дыгаев Гожня, Эгра, Курег, Бигра гуртысь пиналъёс понна нюлэс кушын дискотекаос радъялляз. Ачиз ик крезьгуро аппаратура висъяз. Сюлмаськонэз одӥг вал — егитъёс куспазы керетон-жугиськон медаз поттэ, таӵе дискотекаосын мед тодматскозы, эшъяськозы. 200 пала нылъёс но пиос гужем эктонъёсы ветлӥзы.

Олег Дыгаев районысь «Удмурт кенешлэн» азьветлӥсез, правленилэн ёзчиез. Оскисько, азьланяз солэн мытэм ужъёсыз эшшо ӟеч пушъетъёс сётозы. Куреггуртъёслэн тыршемзы мукет гуртъёс, районъёс понна но адӟем карымон.

Василий Москвин

Удмурт Дунне
By Удмурт Дунне 7 декабря, 2012 18:00