2 сюрс 800-лы тросгес луим!

Удмурт Дунне
By Удмурт Дунне 28 декабря, 2012 10:22

2 сюрс 800-лы тросгес луим!

97 номеро нылпи сад тупатъям бере выль кадь адӟиське

Арлы ӟеч йылпумъянъёсын, азьлане бадӟым осконъёсын пумита 2013-тӥ арез шоркармы. Ижлэн йырыз Александр Ушаков дугдылытэк мадьыны дась городын выльдӥськонъёс-воштӥськонъёс сярысь.

Со шуиз: 2012-тӥ ар огсыр ортчиз, Ижмы шӧдскымон югытгес, чебергес луиз. Коркаосы дыраз вуэ шуныт — ӟырт кезьытъёс кышкыт ӧвӧл. Отӥяз  Александр Ушаков вераз улон юртъёсты тыро-пыдо тупатъян сярысь: берло аръёсы 560 корка выль кадь луиз, 2012-тӥын ог 70 лифт воштэмын. Азинтӥське куашкан калэ вуэм юртъёсын векасьёслы выль улон инты висъян — али таослы Дружба но Степной урамъёсын юртъёс ӝужало. Ортчем арын 245 сюрс квадрат метр улон интыос пуктэмын — арлы быдэ та лыдпусэз будэтыны быгатӥськом. 5 сюрс пала егит семьяос улон интызэс, капчиятэм кредит басьтыса, паськытатыны быгатӥзы ни. «Улон инты — егитъёслы» программа вуоно арын но азинтӥськоз.

— Бен, городысь сюресъёсты вольытатон одӥгез сюлмаськытӥсь ужпум луэ, — пусйиз Иж городлэн йырыз. — Та бордын азьланьын гижысь-пиньысь ужано на. Но шумпотымонэз татын но вань. Ортчись ар ӵоже гинэ сюресъёсты утялтыса возён понна 34 техника басьтэмын, вуоно арын но автопарк выльдӥськоз. Тодмантэм воштӥськиз тыметлэн лымшор палыз — ульча паськытаз.

Матэктӥсь аре вӧл-вӧл луыны кулэ Карл Маркс, Ленин урамъёс, Широкий пролка но мукетъёсыз.
Малы та ваньмыз лэсьтӥське? Калыклэсь улон-вылонзэ  ӟечомытон вылысь. Городын улӥсьёс тае шӧдо. Туэ 21-тӥ декабрёзь шоркарын 9 сюрс 937 пинал вордскиз ни.    Кин тодэ, ар пумозь та лыдпус 10 сюрсозь но вуоз, оло. Озьы ар куспын Ижын улӥсьёс эшшо 2 сюрс 800-лы тросгес луизы ни. 40 процентлы уногес луизы трос пинал будэтӥсьёс — 2 сюрс 725 семья туннэ нуналлы лыдъяське.

— Вордскись пиналъёсмылы дышетскыны, таза, визьмо, чебер будыны вань луонлыкъёс кылдытоно, — азьланьтӥз веранзэ Александр Ушаков. — Туэ нылпи садъёсын ватсаса 800 инты усьтӥм, вуоно арлы 750 инты кылдытыны чакламын. Школаосын тупатъян-выльдон ужъёс азинтӥсько, туэ 30-тӥ школаез паськытатӥм, вуоно арын Ильфат Закировлэн урамаз 800 интылы школа пуктыны кутском.

Нимысьтыз саклык висъяське ёзвиосты кыдатонлы. Туэ выль улон сётэмын «Торпедо» стадионлы, тодмантэм воштӥськиз «Динамо». Малпанъёс бадӟымесь матысь кык аръёслы. Ворошилов ураме пуктыны кутскозы бадӟым спорткомплекс, «Зенитын» 50 метръем бассейн луоз.

— Матысь кык аръёсы вань школаос бордын луозы спортзалъёс! — ӝот-ӝот вераз Иж городлэн йырыз.

Александр Ушаков ачиз но спортэн эшъяське. Ветлэ бассейнэ, туж яратэ гурезьтӥ куасэн ширъяны — туэ куас вылэ султылэм ни. Данъяське: со туж яратэ шур дурын кияз визнанэн пукыны, нош 2012-тӥын аслыз йӧн-йӧн чорыгась потыны кутскиз ни — судакъёсты кутылыны дышиз. Городын улӥсьёслы но куноослы Иж городлэн йырыз сӥзе ӟеч мылкыд, семьяосазы мед луоз шуныт, азинлык.
* * *
Маин улэ город? Та сярысь табере умой-умой тодыны луоз Иж город администрацилэн выльдэм сайтысьтыз. Отын нимысьтыз 4 люкетъёс кылдытэмын: властьлы, городын улӥсьёслы, ужбергатӥсьёслы, куноослы. Угось озьы кулэ иворъёсты шедьтыны капчигес.

Сайтысь тодыны луоз ваньзэ, маин улӥз но улэ город. Сётэмын городлэн картаез, отысь адӟиське, кыӵе урамъёсын тымиськемын машинаос, кытын тупатъян-выльдон ужъёс мыно. Кытчы ке шутэтскыны вамыштэмды потэ? Учкелэ сайтэз! Отын пусъемын та вакытлы но матысь дырлы чаклам ужрадъёс. Марлы ке кӧтты уг веська? Та сярысь асьтэос сайтэ гожтыны быгатӥськоды, вӧзаз туспуктэм но бырттэмды луоз. izh.ru юнме шорысь кылдытэмын ӧвӧл ук. Со калыкез но властез матэгес карон вылысь чакламын.

Элина Кумачёва

Туспуктӥз Владимир Беломорских

Удмурт Дунне
By Удмурт Дунне 28 декабря, 2012 10:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<