Трокаез данъясь гуръёс

Удмурт Дунне
By Удмурт Дунне Декабрь 12, 2012 10:07

Трокаез данъясь гуръёс

Кырӟало-верало Вотка ёросысь усточиос

Алнаш ёросын Трокай Борисов тодосчилы, югдытӥсьлы сӥзьыса, 18 ар ӵоже ини кырӟась-верась коллективъёс куспын конкурс-фестивальёс ортчытъяло.

Та ужрадэз элькунын ортчытон вылысь «Удмурт кенеш» огазеяськон, Культурая, печатья но иворъёсъя министерство, Нациосын ужан политикая министерство Удмурт Республикаысь Президентлы вазиськонэн потӥзы. Александр Волков та вазиськонэз ӟеч мылкыдын пумитаз.

Озьы туэ нырысьсэ шаермылэн пӧртэм сэрегъёсаз удмурт культуралы сӥзем Т. Борисов нимо смотр-фестивальёс ортчизы. Кырӟась-верась ансамбльёс сяна, та фестивале озьы ик пыриськизы шаерысьтымы кибашлыос.

Декабрь толэзьлэн нырысетӥ нуналъёсаз республиканской фестиваль-конкурслы йылпумъянъёс ортчизы Дэри но Пичи Пурга черкогуртъёсын.

Нош 8-тӥ декабре Удмурт театре люкаськизы трос куара люкам коллективъёс но усто кырӟасьёс, кибашлыос.
Удмуртиысь коллективъёс сяна, зональной но республиканской фестивале мыло-кыдо пыриськизы Свердловскысь, Кировысь, Пермьысь, Татарстанысь но Башкортостанысь 19 коллективъёс.

Ӝытэз усьтӥз Дэри ёросысь Подшивал гуртысь кырӟанъя но эктонъя «Марӟан» калык ансамбль. Люкаськем калыкез ӟечкылазы Удмуртиысь культурая, печатья но иворъёсъя министр Дмитрий Иванов, нациосын ужан политикая министр Владимир Завалин, Кибашлыослэн элькун юртэнызы кивалтӥсь Рафкат Каримов. Соос фестивальлэн лауреатэз луэм коллективъёслы но кибашлыослы дипломъёс сётъязы.

Алнаш ёросысь Ӧркагуртысь кырӟасьёс Ю. Балашова но А. Николаева

Озьы ик удмурт сям-йылолъёсты но вашкала кырӟанъёсты утисьёслы нимысьтыз диплом — Алнаш ёросысь Ӧркагуртысь кырӟасьёслы Юлия Балашовалы но Антонида Николаевалы. Нимысьтыз дипломен пусъемын удмурт калык эктонъёсты ӟеч утемзы но улӟытэмзы понна Глазов ёросысь «Чупчи гуръёс» ансамбль (кивалтӥсез Лидия Михайлова).

Удмурт культураез Удмуртилэн палэназ утьыса воземзы понна синпель кузьымен но сертификатэн пусъемын бускель Башкортостанысь Татышлы ёросысь Кызылъяр черкогуртысь «Марӟан» калык ансамбль но Татарстанысь Кукмор ёросысь Сутэр починка гуртысь Михаил Михайлов. Фестивальлэн дипломантэз, гитараен шудыса, аслэсьтыз кырӟанзэ быдэстӥз.

Собере сцена вылэ бӧрсьысь бӧрсе потӥзы огезлэсь мукетыз усто коллективъёс-дипломантъёс: Пичи Пурга черкогуртысь «Зарни шеп» (кивалтӥсез Федосья Тубылова), та ёросысь ик Эдэйгуртысь нылкышноослэн «Арганчи» ансамбльзы (Татьяна Михайлова), Кияса ёросысь Уддяди гуртысь «Инвожо» (Надежда Пахомова), Яр ёросысь Вортча гуртысь «Бесерман крезь» (Екатерина Дюкина), Глаз ёросысь Куреггуртысь «Шулдыр гуръёс» (Олег Петров) но та ёросысь ик нылпиослэн «Детство» но «Россия» эктонъя ансамбль-студиоссы (Екатерина Барышникова, Наталья Щуклина), Дэбес ёросысь «Медло гур» фольклорно-этнографической ансамбль (Анна Чернова) но мукетъёс. Пӧртэм ёросъёсысь 12 кибашлыос фестивальлэн дипломантъёсыз луизы.

Фестивале пыриськемъёс пӧлысь котькинлэсь но шудоесь вал 14 коллективъёс. 63 ансамбльёс пӧлысь, жюри ӵектэмен, соос гала-концертэ шедизы. Нош шудоос пӧлысь эшшо но шудоесь луизы Вотка ёросысь кырӟась-верасьёс. Фестивальлэн Гран-приез но 100 сюрс манет тыр сертификат соос кие шедиз.

Вормон басьтэмзы пумысен кенешиськом Вотка ёросысь культура отделэн кивалтӥсен, Удмуртиысь культура удысысь дано ужасен Надежда Елькинаен:
— Сомында коллективъёс пӧлысь таӵе бадӟым шумпотон басьтомы шуыса, осконмы ик ӧй вал. Но, кызьы адӟиськоды, шуд ми кие вуиз. Ёросамы 275 творческой коллективъёс ужало. Кырӟаны но вераны, котькыӵе ужез быдэстыны культура удысын тыршисьёсмы туж устоесь, визьмоесь но шаплыесь.

Ма, эктӥсьёсмы но вань гинэ. Но быгатонлыкъёсмы эшшо но ӟечгес но синмаськымонгес мед луозы шуыса, Ижысь «Чебеляй» ансамблен кивалтӥсез Наталья Чирковаез юромо дорамы ӧтчаллямы. Нимысьтыз тау кареммы потэ солы.

Вань коллективъёс кырӟам-верам бере, калыкез шулдыртӥзы Вотка ёросысь библиотечно-культурной центрысь «Забава» калык ансамбль (Лариса Хныкина) но Кукуи культура юртысь «Купанча» калык ансамбль (Владимир Шкляев).

* * *
Удмурт культуралы сӥзем Трокай Борисов нимо смотр-фестивальлы дасяськон но ортчытон пумысен кӧня ке кыл вераны куримы жюриын ужам муртэз, культурая колледжысь дышетӥсез Надежда Поляковаез.

— Таӵе бадӟым фестиваль асьме дорын нырысьсэ ортчиз. Отчы пыриськыны трос коллективъёс мылкыд каризы. Жаляса верано, тросэз со сярысь тодытэк но кылизы, луоз. Ми жюриын 7 адями ужамы. Кивалтӥсьмы Россиысь икусство удысысь дано ужась Валерий Митрофанов вал.

Номинациос тросэн туж секыт вал коллективъёсты люкыны, уката ик соос пӧртэм жанръёсын быгатонлыксэс возьмато: отын ик кырӟанэз но, эктонэз но, киуж возьматонэз но. Со-осты ваньзэ ӵош сураны-пожаны кулэ ӧй вал, дыр. Азьланяз одно ик та югдурез лыдэ басьтоно. Табере фестивалез нимаз ортчытоно — эктонъя ке эктонъя со мед луоз, фольклоръя ке фольклоръя. Киужъёсын но сое сурано ӧвӧл. Мон малпамъя, палэнэ кельтыны уг яра театръёсты но.

Любовь Тихонова

Туспуктӥз Владимир Беломорских

Удмурт Дунне
By Удмурт Дунне Декабрь 12, 2012 10:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<