Ӵуказе тодом, кыӵе луоз тодон…

Удмурт Дунне
By Удмурт Дунне 11 декабря, 2012 05:25

Ӵуказе тодом, кыӵе луоз тодон…

В. Векшин

12-тӥ декабре Кун Думаысь депутатъёс кутыны чаклало «Дышетон сярысь» законэз. Сое кык арлэсь кема дасяны выризы. Проектаз 1 сюрс 700-лэсь ятыр воштонъёс но ватсанъёс пыртэмын ни.

Тани-тани «пыжыны» дасям закон котырын туннэ но ӵашетонъёс уг чусомо. Россиысь дышетӥсьёслэн профсоюззы Кун Думаысь депутатъёслы нимысьтыз вазиськон пӧраз, ӵектэм законысь куд-ог интыосыныз чутрак соглаш ӧвӧл шуыса. Со улэ кинюртэмзэ пуктӥз дышетон удысысь ог 1 миллион 74 сюрс адями. Россилэн Президентэзлы, Россиысь Правительствое но Кун Думае 43 сюрс 762 телеграмма ыстэмын.

Удмуртия палэнэ ӧз кыльы. Кун Думаысь депутатъёслы вазиськон улэ республикаысьтымы 29 сюрс пала дышетӥсьёс гожтӥськизы. Маиныз уг кельшы выль закон Россиысь дышетӥсьёслэн профсоюззылы? Та юанлы валэктон утчаса, вазиським шаерысьтымы дышетӥсьёслэн профсоюзэнызы кивалтӥсьлы Владимир Векшинлы. Тани мар вераз со:

— Уно воштонъёс но ватсанъёс пыртэм бере законлы проект ярамон кадь луиз ни вал. Россиысь Дышетонъя но наукая министерство соглаш кариськиз дышетӥсьёслэн профсоюззылэн ӵектонъёсыныз но — берлозэ соос ог 60 пумо вал. Но законопроектэз эскерон радъяськиз на Россиысь Правительствоын. Валамон, Дышетонъя но наукая министерство сяна, отчы пыриськизы мукет министерствоос но ведомствоос, кылсярысь, Экономикая, Социальной азинсконъя, Коньдон ужпумъя министерствоос. Таос шобретэз котькудзы ас палазы кыскыны выризы. Мар пӧрмиз? Тросэз ӵектонъёс дасяськись законысь ышизы.

— Законлы пумитъяськисьёс пыкыло: дышетон удысын гарантиос сётыны кун дась уг луы. Маин соос тае герӟало?
— Вужаз законын умой-умой гожтэмын вал: дышетон удыслы нимысьтыз саклык висъяно, солы кун бюджетысь ог 10 процентсэ коньдонэз чаклано. Выляз та сярысь номыр гожтымтэ. Туннэ дышетон удысэ кун казнаысь ог 3 но ӝыны процентэз коньдон лыктэ. Со туж ичи.
Татчыозь дышетон удыслы субвенциос висъяськылӥзы. Ваньмыз лад-лад верамын вал, кытчы со коньдонэз кутоно: уждунлы ке — уждунлы, дышетон пособиос басьтонлы ке — пособиос басьтонлы. Выль закон трансфертъёс вылэ выжыны дэмла. Озьыен, коньдон висъяськоз, но кытчы сое кутоно, верамын уз луы ни. Иське, со коньдонэз интыяз кутытэк но луоз? Чыры-пыры кадь. Но таӵе чыры-пырыослэсь ик кылдо бадӟым сюлмаськонъёс.

Эшшо: дышетӥсьёслы книгаос басьтон понна уждунзы борды ватсаса коньдон висъяське вал — ог сюрс манет. Со трос ӧвӧл. Но визьнодасьёс со сярысь но вунэтыны быгатозы. Угось выль законын изданиос басьтонэн герӟаськем чурез ышемын. Та коньдонэз табере оклад борды дэмӟытоно, пе. Окладын пыртэмын-а со, ӧвӧл-а,  валаны туж секыт луоз ни. Кызьы али шуэмъясько: гуртысь дышетӥсьёслы уждунзы борды 25 процент ватсаське. Но со, пе, окладын пыртэмын. Басьтэ городысь но гуртысь дышетӥсьёслэсь расчёткаоссэс — трослы ик уг висъясько, 25 процентэз уг шӧдӥськы.

— Иське, верамды потэ: дышетӥсьёслэсь, огласянь, уждунзэс будэто, мукет ласянь, сое кулэстыны быгатозы?
—  Уждун йылэмлы туж шумпотоно! Но со улосысь шоро-куспо уждунлэсь ичигес медаз луы шуыса, законэн юнматоно. Жаляса верано, таӵеез ӧвӧл. Коньдон йылэ В. Путинлэсь май толэзе потэм указзэ быдэсъяса. Нош сыӵе указ ӧз луы ни ке? «Зарни зор» кисьтэмысь уз дугды-а, дышетӥсьёс нош ик буш кисы уз кыле-а?

Дэмласьком законэ созэ но пыртыны: вузъёсысь преподавательёслэн уждунзы улосысь экономикаын шоро-куспо уждунлэсь кык поллы ятыргес мед луоз. Нош степеньёс но званиос понна коньдон нимаз чурен мед тыриськоз, оклад борды итытэк. Соиз но, таиз но ӵектонъёсмы законлы проектэ пыртэмын ни вал. Ышемын Правительствоын ортчем кенешон бере.

— Алигес дорамы вуылӥз Россиысь дышетон удысын эскеронъёс ортчытъянъя институтлэн наукая кивалтӥсез Александр Кондаков. Со кивалтӥз дышетон удыслы выль стандартъёсты кылдытӥсь группаен. Туж оскытыны выриз: выль куронъёс туала улонэз чакласа дасямын. Малы профсоюз соин соглаш уг кариськы?
— Покчи классъёсын дышетскисьёслы чаклам куронъёс улонэ но пыӵаны кутскизы ни. Но соосъя юанъёс но уг кылдо. Сюлмаськытэ мукетыз: мар луоз, со куронъёс бадӟым классъёсын пыӵаны кутскизы ке? Тани мар ӵектэ Александр Кондаков: одно дышетоно предметъёс 4 пумо кыльыны кулэ. Соос пӧлын нимаз ӧвӧл ӟуч литература, вань ӟуч кыл но литература. Озьыен, лыдӟиськонлы тырмыт саклык уз висъяськы. Нош литература личностез будэтыны юрттэ ук! Историез, пе, дышетоно одно. Ярам, мед дышетозы. Но туннэ история шоры учконъёс пӧртэм пумоесь. Учебникъёслэн авторъёссы но турлы. Предметъёсты профильёслы люкыны дасясько, шуом, естествознаниея профиль. Отчы пыртэмын биология, физика, химия. Нылпиос ас мылкыд каремзыя одӥгзэ бырйыны быгато, шуом, химиез. Но кыӵе со специалист луоз, физикаез но биологиез ӧз тоды ке?

— Алэмын ӧвӧл ук мукет предметъёсты но дышетонлэсь. Яке малпаськоды, ваньмыз со коньдонэн луоз?
— Озьы малпасько. Бен, та сярысь али кылпум нокытын уг поттыло. Но кылем предметъёс кун гарантие пыртэмын уз луэ ни ук. Иське, малы соос дунтэк луыны кулэ? Вузъёсын кемалась кылдӥз ни сыӵе валан — тодон-валан сётон  услугаос. Школаын талы пумен дышыны кутскиськом.

— Владимир Васильевич, но вань ук «Дышетон сярысь» законын ӟеч палъёсыз но.
— Соос ӧжыт ӧвӧл! Кылсярысь, шор ёзо тодон-валан сётон вазен муниципалитетъёс вылын вал, собере сое субъектъёс ас вылазы басьтӥзы. Уждун тыронэн ӝеганъёс соку ик вунӥзы. Табере кун ас вылаз басьтоз покчиосты школалэсь азьло визьнодан удысэз но. Туж умой.
Выль законын нимысьтыз саклык висъяське нылпиослэсь правооссэс утёнлы, воспитаниез улӟытонлы. Нылпиосты визьноданэ кыскыны чакламын анай-атайёсты, общественной огазеяськонъёсты — туж шонер.

Угось улонлэн куронъёсыз воштӥсько. Совето вакытъёсы асьме тодон-валан сётон туж вылӥ дунъяськылӥз — та сярысь верало быдэс дуннеысь экспертъёс. Но улонлэн куронъёсыз воштӥсько — «Дышетон сярысь» закон, зэмен но, туж кулэ ни вал.
* * *
«Дышетон сярысь» закон сярысь сомында вераськемын — дышетӥсьёслэн, анай-атайёслэн соин тунсыкъяськонзы кысыны кутскиз ни. Кыӵе воштӥськонъёс витё соосты вуоно арын — закон соку улонэ мур-мур пыӵаны кутскоз — тыро-пыдо валаса озьы ик ӧз вуттэ. Нош профсоюзъёс оско: соослэсь мылкыдзэс Москва одно кылоз. Россиысь дышетон удыс, Совето Союз вакытэ сямен ик, дуннеысь одӥгез адӟем карымонэз луоз.

Элина Кумачёва

Туспуктӥз Владимир Беломорских

Удмурт Дунне
By Удмурт Дунне 11 декабря, 2012 05:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<