Тодмотэмез асьме дорын

Удмурт Дунне
By Удмурт Дунне Декабрь 9, 2012 17:51

Тодмотэмез асьме дорын

IB&4CP группа

Иван Белослудцев ноку но ӧй гожтысал, дыр, удмурт кылын кырӟанъёс, Удмурт кун университетысь удмурт факультетэ ӧй ке пырысал. Ижысь крезьгурен вырись ӟуч пиос ноку но удмурт сямен ӧй кырӟасалзы, кунгож сьӧры ӧй потысалзы ке. Сыӵе малпанъёс кылдӥзы Испаниысь конкурсысь бертэм IB&4CP («Иван Белослудцев но 4 чебер пиос») группаен вераськем бере.

Удмурт кылэз тодыса, кыдёке кошкод, шуиськом ни табере. Арабъёслэн «Аль-Джазира» телеканалзы «Пичи калыкъёслэн «Евровиденизы» ӵошатскон сярысь сюжетсэ, Ваняен тодматыса, кутскиз. Кунгож сьӧрысь журналистъёс понна Россиысь пичи Ижкар тужгес но тунсыко потӥз.

Соос валало: отын ӵыжатӥсь чугун пуртыын сямен пӧртэм калык культураос, куспазы сураськыса но пӧзьыса, выль паймымон вуз кылдыто. Кылсярысь, IB&4CP удмурт инди-поп группа ик.

— Ванялэн «Тау тыныд» кырӟанэз — со зэмос хит, — шуиз Антон Янцен (со пиосты Испание нуиз-вайиз, конкурсысь жюрие крезьгуръя эксперт луыса пыриськиз). — Мон Ижысь крезьгур улонэн 15 ар ӵоже вырисько, мае-сое валасько ини. Та кырӟан — кунгож сьӧры вузаны дась продукт, нош татын, Ижын, ӟуч кылын кырӟась рок-командаосты кылзӥсьёс сое дунъяны уз быгатэ.

Удмуртъёс пӧлын но, Николай Анисимовлэн кырӟанъёсыныз ӵошатыса, Ванялэн творчествоез трос калыклы валамон но ярамон уз луы, дыр. Но Иван Белослудцевлэсь аспӧртэмлыко, экспериментлы укшась кырӟанзэ выль крезьгур ӧръёсын тунсыкъяськись калык туж дунъя.

— Оло, пиосты кунгож сьӧры ӧтё ни? — юазы Янценлэсь.
— Вазьгес на, кылем арын «Silent Woo Goore» группаез, кык толэзь ортчыса гинэ, ӧтизы, — шуиз со.

Концерт радъян понна пиослэн кырӟанъёссы ӧжытгес. Группа но туэ куартолэзе гинэ кылдӥз. Продюсерлэн Павел Поздеевлэн кичӧлтэмезъя Ванялэсь бард творчествозэ выль тубатэ ӝутон понна Ижысь крезьгурен вырись егитъёс люкаськизы. Ванялэн, Дималэн но кык Сашаослэн IB&4CP группазэс азьланьтыны, крезьгур альбом гожтыны мылкыдзы вань, но коньдон кулэ.

Таӵе амалэн удмурт кыл туала лулчеберет улонэ пыџа. Озьыен, ми дунне пыдэсын ум улӥське, асьме дорын тодмотэмез но тунсыкоез будэ. Кунгож сьӧрысь калык сое синйылтэ.

Лариса Дмитриева

Туспуктӥз Катя Сысоева

Удмурт Дунне
By Удмурт Дунне Декабрь 9, 2012 17:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<