Тазьы вал со…

Удмурт Дунне
By Удмурт Дунне 1 декабря, 2012 14:34
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Тазьы вал со…

А. Разин

Альберт  Разин
Удмурт культурая «Дэмен» обществолэн азьвыл тӧроез,
Трокай Борисов нимо премилэн лауреатэз

Удмуртъёслэсь Нырысетӥ ӧтчамзэс дасяз Удмурт культурая огазеяськон. Соин кивалтэ вал К. А. Пономарёв профессор. Тазалыкез лябӟемен, со но кивалтонысь поттыны куриськиз. Солэсь куриськонзэ санэ басьтыса, со интые монэ бырйизы. Кивалтон опытэ ичи ке но, мон соглаш луи.

Съезд дорозь ӝыны ар кылиз на вал. Гурезь быдӟа ужез берыктоно. Ма кароно? Мон УдГУ-ын научной коммунизмъя кафедраен кивалтӥсько вал. Удмурт культурая огазеяськонлэн правлениысьтыз эшъёсыным кенеши но шуи: «Ярам, Бадӟым ӧтчаммес дасян понна огдырлы ужысьтым (УдГУ-ысь) кошкыло, нош съездэз ортчытӥм ке, ас интыям тӧрое мукетсэ быръёмы, мон университетам берытско». Озьы ик карим, мыным толэзяз 300 манет уждун тупатӥзы (УдГУ-ын 500 манет басьтӥсько вал). Кассаямы коньдонэз воксё 17 000 манет гинэ, нош уждун тыроно на бухгалтерлы но секретарьлы, потано командировкаосы. Кытысь коньдон кароно? Эшъёсылы «ойдолэ ваньмы коньдон утчалом» шуисько. Поликарп Князев тодмоезлэсь, Удмурт Водоканал предприятилэн кивалтӥсезлэсь, 7 сюрс манетcэ ёртэм-портэм, эшшо одӥг колхозысь тодмо предэзлэсь 1 сюрс манетсэ пызьыртэм на. Павел Вершинин 15 сюрс манетэн юрттӥз. Кылемез 100 сюрс манет кассаямы вуиз Удмурт Элькунысь Правительстволэн Тӧроезлэн кивоштӥсез Антонида Лисина пыр. Ваньзэ-ӧвӧлзэ 150 сюрс манет люкамы. Со пӧлысь 50 сюрсэз быриз ӧтчамез люканы но ортчытыны. Мон кивалтонысь кошкыкум, «Дэменлэн» счётаз 100 сюрсэз кылиз на. Мон интые быръем Пётр Черновлы со кык арлы тырмиз. Уно коньдон вал ай со — «Москвич» машина соку 12 сюрс манет котыр сылэ вал.

Правленимы чырмыт ужаз, 15 мурт пӧлы Михаил Шишкин, Александр Шкляев тодосчиос но мукет тодмо адямиос пыртэмын вал. Уж лачак, дырмы воксё ичи кылемын. Арнялы быдэ правлениез люкалляй. (Огазеяськонмылы «Дэмен» ним сётӥмы: нимзэ мон малпай.)

Самовар, чай юон чашкаос, тусьты-пуньыос вайи. Эшъёсылы кельшиз: пумен пыжиськемъёссэс, пӧрамъёссэс, варення вайыны ӧдъязы. Чай юиськомы, ӵаш поттӥськомы — угось котькудӥз удмурт калыклэсь ӵуказе сюрессэ ас синмыныз адӟе, аслэсьтыз малпанзэ улонэ пыӵатэмез потэ. Куспамы керетӥськом. Но ог-огмылы йыркурмы медаз кылды шуыса, кенешонмес йылпумъяммы бере одно ик кырӟаськомы. Буйгаммы бере дорамы бертӥськомы капчи, ӝутскем мылкыдын.

«Дэменлэсь» ёзъёссэ кылдытон но делегатъёсыз быръён понна котькуд ёросын конференция орчытъямы. Ог 25 пумиськонэ ачим ветлӥ. Тани Владислав Якуповен, Илья Пельтемовен Шарканэ мынӥськомы. Машиналэн руль сьӧраз Якупов пуке. Вуимы райкоме, пыримы Михаил Васильев нырысетӥ секретарьлэн кабинетаз. Ми вераськиськом удмурт кьлын, нош Васильев ӟуч кылын. Та кабинетын талэсь азьвыл ноку удмурт кыл ӧз на чузъяськы, дыр. Илья Пельтемов, гитаразэ кутыса, аслэсьтыз кырӟанъёссэ мытӥз на. Секретарь нырысь бакомиз, бӧрысь удмурт кылыз сэраз. Озьы удмурт кылэз пӧртэм ёросъёсын чузъяськытӥмы.

Югдур тужгес но секыт вал Вотка карын, Сарапулын, Камбаркаын. Та ӟуч каръёсы мон быдэн кык пол но, куинь пол но поталляй.

Сарапулын удмуртъёсыз нырысьсэ люкамы леспромхоззылэн Культура юртаз. Мон вераськисько удмурт кылын, нош лыктэмъёс удмурт кылзэс поттыны уг дӥсьто, ӟуч кылын верасько: удмурт кылмы понна жугозы, пе. Уз жуге, шуисько, асьме вордскем кылын гинэ вераськоно. Табере туннэ куд-огез уз но оске, дыр, — залын ваньзы бӧрдо (воргоронъёс но). Ма, ми удмуртъёс но адями шат, пе.

Камбарка карысь «Дэменлэсь» кивалтӥсьсэ Фёдор Кабировез удмуртлык понна нюръяськемысьтыз ужысьтыз куштӥзы. Сарапулысь удмуртъёслэн азьветлӥсьсылы Екатерина Спиридоновалы но секыт йӧтӥз. Вотка карысь «Дэменэн» кивалтӥсь Алевтина Вахрушеваез пумтэм зуркатъязы но, со висьыны усиз — пери шуккиз. Тӥни озьы, удмуртъёсыз сайкатон инмысь ӧз усьы.

Удмуртъёсыз пӧртэм палась люкан понна ачим Свердловске кык пол вуылӥ, эшъёсме Москвае, Казахстанэ, Красноярск, Тюмень, Волгоград улосъёсы ысъяй. Котькудӥз командировкаысь делегатъёс вайиз. (Огкылын вераса, «Дэменлэсь» ёзъёссэ кылдытыны уно кужым понӥм.)

Ӧтчамез дасян вискын пӧртэм ужрадъёс но ортчытъямы. Тани тодӥмы: элькунысьтымы Вылӥ Кенеш аслаз сессияз элькунмылы Президент быръён ужпумез эскерыны пыртэм: удмуртэз яке ӟучез быръёно, пе? Сессия ӵуказеяз усьтӥське. Ма кароно? Ӝогак гинэ люкаським. Кенешим: пикетирование ортчытоно, кин кызьы быгатэ али ик удмуртъёслы ивортоно. Мон эфире потай: радио но телевидение пыр калыкез ӧти пикетирование лыктыны. Телефон пыр тодмоосме, родняме ӧтчай на. Выны Рево Алексеевич уй ӵоже, удмурт Президентэз бырйыны, удмуртлыкез, вашкала культураез, удмурт кылэз утьыны ӧтьыса, вить плакат дасяз.

Ӵуказеяз Правительстволэн юртэз азе 300-400 адями люкаськиз. Ижкарысь сяна, вить районъёсысь удмуртъёс асьсэ коньдонэнызы автобус медъяса лыктӥллям, кузёбайёс кык плакат вайиллям, одӥгаз гожтэмын: «Удмурт депутатъёс, чурыт кылдэс вералэ». Мон соосыз Правительство юртлэн фойеяз пыртӥ но, удмурт дэремзы мед адӟиськоз шуыса, кылиськыны косӥ. Депутатъёс соос вискытӥ, строй пыртӥ кадь, сессиязы пыризы.

Удмурт дуннеын пикетирование ӧй вал на. Ваньзэ тае телевидение пыр возьматӥзы, газетъёсы гожъязы. Соку куд-ог ӟучъёс пештыртӥськизы. Мар та таӵе — удмуртъёс йырзэс ӝуто? Йӧспортэм дуннее вуиськиз, пе.

Пикетированилэн пайдаез луиз. Огласянь ке чаклано, сессиын нокыӵе решение ӧз кутэ: ӟуч Президент пала но, удмурт пала но. Мукет ласянь, удмуртъёс кужымзэс валаны шӧтазы, асваланзы будӥз.

Нош «Дэменмы» пумен тырше: «Удмурт кенешез» дасянэн выриськомы, пуштроссэ кызьы карыны чакласькомы, эскериськомы. Сое политикаен вырись огазеяськон карыны кенешимы. Уставезлэсь инъетсэ мон лэсьтӥ — съездын сое волятӥзы на. Нимзэ но структуразэ Алексей Шкляевен ӵош малпамы. Милям чакламмыя, луыны кулэ на вал «Гурт кенеш». Нош «Ёрос кенеше» пырыны кулэ вал котькуд «Гурт кенешлэн» тӧроез. Жаляса верано луисько, таин бӧрысь нокин ӧз ни выры — соин валче «Ёрос кенешлэн» кивалтэтаз гуртъёсысь нокин уг пыры шуыны яра.

«Удмурт вӧсез» кылдытон но Бадӟым ӧтчаммес дасяку кутскиз. 21-23 гудырикошкон нуналъёсы (чапак ГКЧП дыръя) Гольянылэн улланязгес Кам шур дурын вӧсяськимы. Шулдыр интыез азьвыл нунал лумбыт ветлыса, Владислав Якуповен бырйимы. Вӧсяськеммы кабыл луиз – «Дэменэз» юстиция министерствоын вӧй вылтӥ кадь регистрироватъ каризы. Вӧсяськонамы ветлӥзы кык журналистъёс: радиоысь Александр Овчинников но туспуктӥсь Михаил Егоров. Соос пыр вӧсяськон быдэс дуннее вӧлмиз. Правительствоысь Антонида Лисина но монэ кабинетаз «ковёре» ӧтиз, кылме юа, визь тыре. «Ох, Разин, тонэн олома адӟод»,- шуэ. Нош вуоно араз, вӧсяськыса, Кузёбайын Гербер праздник ортчытӥмы — Антонида Михайловна Правительствоысь коньдон висъяз, ачиз но отын шумпотыса кунояськиз.

Бадзым ӧтчамез дасясьёс пӧлысь Лидия Крестьяниновалэсь, Николай Симановлэсь, Елена Ботниковалэсь, Василий Кузьминлэсь нимъёссэс шараяме потэ на. Тужгес но зол юрттӥз, тыршиз Лидия Орехова. Анатолий кузпалзэ но ужатӥз. Таид съезд азьын уйзэ но ӧз кӧлы, съездлы дасям ваньбурез (сценаез чеберманы дасям киын куэм но пужъятэм дуноесь ковёръёсыз, чалмаосыз (ӵушконъёсыз), делегатъёслы люкылыны дасям пакетъёсыз) возьмаз, дунтэк ужаз. Пакетъёс бадӟымесь луизы, отчы тыремын вал книгаос но, колбаса но, конфет но, сигарет но — салам-кузьымлы делегатъёс юн шумпотӥзы. Орехова ачиз съездэз адӟыны ӧз ик ваньмы, угось ваньзэ радъяно, делегатъёсыз пумитано, интыяно, удостоверенизэс пусъёно — котькытчы пыриськоно.

Съезд туж зол ортчиз. Сценарийзэ ачим лэсьтӥ, кутсконзэ тунсыко кари: тылэз кысэм бере крезьлэн куараез чузъяськиз, собере прожектор сцена вылэз пиштытӥз – отын тӧдьы дӥськутэн адямиос Инмарлы вӧсяськизы. Валамон, таӵе кутскон залын пукисьёслэсь лул-сюлэмзэс вырӟытӥз.

Отчам кык нунал кыстӥськиз. Лэчыт доклад лэсьтӥзы кык историкъёс, кык профессоръёс. Карл Пономарёв но Маргарита Гришкина. Залысь калык воксё палёмиз Гришкиналэн визьмызлы но, йӧноезлы но, чеберезлы но – удмуртъёслэн таӵе нылкышнозы но вань шат, пе. Тае азьвыл чакласа ик угось мон сое докладчик кари вал. Прениосын вераськыны нырысь кыл сетӥ етӥз сямо Мария Ишматовалы. Со азьвылгес Дэри ёросын КПСС-лэн райкомаз идеологиен кивалтӥз. Соку но кивалтӥсьёслы (аслаз кузёезлы Узловлы но) мытылыны дӥсьтэ вал. Вераськиз кылзӥськымон, синмаськымон, залын пукисьёслэсь мылкыдзэс уката бугыртӥз, мукетъёслы кызьы вераськыны сюрес возьматӥз. Кык нунал ӵоже трибуна сьӧры уно удмуртъёс потазы, туж ӟырдыт вераськизы.

Съездлэн пумаз кылдытэмын вал выль огазеяськон «Удмурт кенеш». Солы тӧро (президент) быръемын М. И. Шишкин профессор. Кивалтон опытэз бадӟым: КПСС-лэн Удмурт обкомаз кыкетӥ секретарьын но ужаз, элькунмылэн Госпланэныз но кивалтӥз. Президентлы кандидатъёс пӧлын вал: Роза Яшина, Виктор Туганаев, Георгий Данилов, Карл Пономарёв.

Оглом вераса, «Металлург» культура дворецын удмуртъёслэн бадӟым праздниксы гудыръяз. Фойеын делегатъёсыз уно ансамбльёс шулдыртӥзы. Кык ӝытаз ик бадӟым концерт вал: тодмо артистъёс, «Италмас», «Айкай» но гуртъёсысь лыктэм ансамбльёс усто кырӟаны но эктыны быгатэменызы паймытӥзы — учкисьёс киоссы пульдымон чабизы. Делегатъёс ӧтчамын укыр дӥсьтӥсесь луизы, доразы лопыръяськись мылкыдын бертӥзы.

Жаляса верано луисько: туж зол ортчытэм съездмылэн огез но решениез улонэ ӧз пыӵа… Удмурт театрлы выль юрт ӧз пуксьы, Кузёбае (Дэбесэ, Глазкаре) удмурт культуралы сӥзем центръёс ӧз кылдэ, удмурт кылэз кун кыл карон но школаын дышетон сярысь Закон ӧз кутэ. Соку Вылӥ Кенешын 52 удмурт депутат вал – удмурт кылэз утись Законэз кутыны луысал.

Вылӥос, удмуртъёс вылэ ужам интые, удмуртъёсыз ултӥясь Евгений Шумиловлы черкъёс сярысь книга поттыны 200 миллион манет висъязы. Со сяна, 200 миллион манет шедьтӥзы «Колосс» кинотеатрез черк карыны (бӧрысь эшшо ватсаса висъязы на).

Нош ми ӟечезлы оскыса ужамы: а) Удмурт театрлы выль юрт пуктон проектлы сӥзьыса, конкурс ортчытӥмы — куать проект пӧлысь вормисе потӥз Касим Галихановлэн проектэз; б) удмурт кылэз кун кыл карон сярысь Законлы туж ӟеч проект пӧрамы; в) Алнаш ёросысь Кузёбай гуртэз удмурт центр карыны Программа кылдытӥмы, отчы выль школалы нимысьтыз проект дасямы. Но ужам ужмы соку бушлы кылиз — проектъёсмес улонэ ӧз пыӵатэ. Соку мынам солы осконэ быриз.

* * *

Шумпотыса вераме потэ: выльдӥськонэн (перестройкаен) валче мон быгатӥ Герберез кылдытыны. Нимзэ но концепцизэ ачим утчай, шедьтӥ. Мон малпай: Герберын удмуртъёс, вашкала дыръёсы сямен, вина юытэк, чебер инкуазьын мед шулдыръяськозы (кырӟалозы, эктозы, калык шудонъёсын шудозы); пӧртэм ёросъёсысь лыктэмъёс матысь кусып мед тупатозы.

«Шундыез» кылдытонэ но пыриськи. Нимзэ ми Татьяна Корнилова радиожурналистэн малпамы. Та ужрад борды тазьы кутскимы. Котырамы люкамы етӥз удмурт пиосыз, соос пӧлын тужгес но висъяськизы «Катанчи» ансамбльысь артистъёс. Выль арлы сӥзем удмурт дискотека дасямы. Мон ачим но 5 общежитиосысь комнатаостӥ егит удмуртъёслы билет вузаса ветлӥ. (Зэм, мон дискотекалы нырысь пумит вал, но берат ӧй ни пумитъяськы — малпай: «кутсконаз ярам ини»,  но сётски юнме.) Удмурт егитъёс каллен вырӟылыны шӧтазы.

Тулысаз «Октябрь» Культура юртын егитъёслэсь конференцизэс ортчытӥмы. Соин Корниловаен кыкнамы кивалтӥмы. Отын «Шундылэсь» правленизэ бырйимы, Уставзэ кутӥмы, пуштроссэ юнматӥмы. Котькуд общежитиын, пӧртэм предприятиосын «Шундылэн» ёзъёсыз (сиосыз) луыны кулэ на вал — тазэ малпанэз ӧз быдэстэ.

Шараяме потэ на «Удмурт вӧсь» огазеяськон кылдэмлэсь историзэ. Кам дурын вӧсяськонамы вӧсясьмы вал Варклет-Бодьяын вордскем Максимов фамилиё Вася агай. Сое Семён Виноградов  профессор вайиз. Вася агаез Совето власть дыръя вӧсясь луэмез понна зол кыскаллям, кышкатъяллям. Виноградов сое, лӥятыса,  мырдэм вайиз. Соин валче милям вӧсяськонмы радызъя пӧрмиз.

Семён Николаевич — дунне адями: йӧно, лякыт, сэбедъёслэсь радзэс валась, удмуртлыкез утён сярысь сюлмаськись. Суредьёс но ваньмыз сямен удмурт сямез возьматонлы сӥземын. Ас поннам малпасько: со «Удмурт вӧсьлы» тӧрое тупа. Дэмласько солы: ойдо «Удмурт вӧсь» кылдытом но тонэ тӧро каром. Соглаш ӧз луы. Кык ар пала котыртӥз бергай, мырдэм лӥятӥ. Уставзэ лэсьтӥмы Рево выныным. Владислав Якупов дорын, филармони юртаз, собрание люкамы. Собраниез нуиз мынам двоюрод братэ Станислав Камитов. Виноградовез бырйим тӧрое, кивалтӥсез луиз Якупов. Протоколзэ мон йӧндыри.  Ӝоген «Удмурт вӧсез» регистрировать каризы.

Йылпумъяса вераме потэ: выльдӥськонын уноез мыньм ӧз кельшы ке но, мынам азьвыл улонэ но берытскеме уг поты. Шумпотӥсько: выльдӥськонэн валче удмурт калыклэсь асваланзэ  будэтонэ пыриськыны луонлык кылдӥз — пичи ке но шапык уськытыны быгатӥ. Выльдӥськонтэк удмуртъёслэсь Бадӟым ӧтчам люкан сярысь кылпум поттаны ик ӧй луысал.

Статья «Удмурт кенеш» – 20» книгаысь басьтэмын

Удмурт Дунне
By Удмурт Дунне 1 декабря, 2012 14:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<