Ёк-коколёк, синмаським ми тыныд…

Удмурт Дунне
By Удмурт Дунне 28 декабря, 2012 12:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ёк-коколёк, синмаським  ми тыныд…

«Элькуновидение» џошатсконын 3-тӥ интые потӥз А. Леонтьев

Александр Леонтьевлэн лулыз-сюлмыз учкисьёслы вӧлак усьтэмын

«Элькуновидение» вожвылъяськонын куинетӥ инты басьтӥз Глазов
ёросысь Александр Леонтьев. Ӝуась синъёсыныз, задор мылкыдыныз быдэс залэз бугыртӥз. Ӧм чидалэ — «Удмурт дуннелэн» нимысьтыз кузьыменыз пусйим.

Кин со Саша Леонтьев, кыӵе ыльняньлэсь пыжемын? Та юанлы валэктон утчаса, уйпал шаеръёсы вуиськиз, ява. Глазов ёросысь Люм гуртэ, пе, Лӧпшо Педуньёс люкасько — пӧлазы луоз Александр но. Зэмен но, «Элькуновидение» дырысен Саша туш будэтыса вуттэм, йыраз — гын шляпа. Тани катанчи сьӧрын берга ни — сцена вылэ дасяське.

— Та ёросысь ик Кечпи гуртысь луисько, — пумен вера уйпал кизили. — Отын вордски, отын али но улӥсько. Кырӟаны, школаын дышетскыкум ик, йӧндырисько вылэм-а, мар-а. 8-тӥ классэз быдэстыкум, крезьгуръя дышетӥсьмы Валентина Петровна Ушакова юаз: Ижысь культпросветучилищее мынэмед уг поты-а? Потэ, пӧй. Мыным соку 15 арес вал.

Училищеын соку нырысьсэ усьтӥськиз оркестровой отделение. Бырйи сое. Экзаменъёсты пырпотыны юрттӥз удмурт кылэз тодэме: диктант интые изложение гожтыны луонлык сётӥзы. Нош изложение гожъяны яратӥсько-о-о вал! Э-э, нош кызьы сётӥ историен экзамен!

Билет сюриз: Брежнев вакытъёс. Историяя урокъёсамы со сярысь воксё ӧз мадьылэ. Мае телевизорысь кылӥ-адӟи, сое верасько ни ай. Дышетӥсьёс я сак кылзо, я гор-гор серекъяло. «4» пуктӥзы ик. Но бӧрысь гинэ тодӥзы, 8-тӥ класс бере лыктӥсько шуыса. Та экзамен 10-тӥез йылпумъямъёслы чакламын вылэм.

* * *
— Культпросветучилищеын дышетскон вискам ик сурон сапег но кутчалляй. Нош диплом басьтэме бере куриськи «Италмасэ». Кылзӥзы но яраськод, шуизы. Но соку кема ик ужаса ӧй вутты. Улонам секыт учыр луиз — дор палъёсы берытсконо луи. Кечпи гуртысьтымы ик клубын худрук но, директор но вал.

Нош «Италмасэ» мон бӧрысьгес ог куинь арлы вуылӥ на. Анатолий Мамонтов соку шуиз: лыкты, кутом. Анатолий Васильевичлы бадӟым тау карисько сценалы дышетэмез понна. Троссэ басьтӥ ӵош ужась эшъёсылэсь — артистъёслэсь. Училищеын визь люкакум ай, кырӟаны-эктыны дышетӥз Фёдор Иванов. Бӧрысьгес со «Танок» ансамбльзэ кылдытӥз. Мон тодӥсько вал «Шулдыр ӝытэн» кивалтӥсез Анатолий Ушаковез. Нырысетӥ кырӟанме гожтӥ — «Кыӵе со яратон». Возьматӥ сое Анатолий Алексеевичлы. Отын вань таӵе кылъёсыз:

Кышное ӵукна ик копаське, пуэд, пе, вандымтэ.
Аслад нош учкы ай,
полэд но миськымтэ…
Туннэ нош тышкаськом,
уйин нош чупаськом,
Ӵуказе но тэргаськом,
уйин нош яратском…

Ушаков шуэ: вульгарно! «Яратском» интые «тупаськом», пе, кырӟано. Кылзӥськи.
Ижын ужам аръёсы мон понна бадӟым школа луизы. Сцена вылэ потонлэсь кышкамысь дугдӥ…
* * *
— Э-э, пӧяськисько вылэм. «Элькуновидение» дыръя дыр-р куалекъяй: быдэс ёросмылэсь данзэ утёно ук. Ӵошатскон! Сьӧрам эшъёсы дасо пала — «группа поддержки». Эшшо артистъёс пӧлысь кудӥз ке валэктыны шедьтӥз: очкидэ, пе, кушты, сцена вылысь тылъёслэсь шугомод. Кырӟаны потӥ — ымныръёсты воксё уг адӟиськы, бус пӧлын ӵушъял кадь. Нош мон дышемын учкисьёслэн синъёсынызы вераськыны. Озьы гинэ валасько: пӧрме-а гуре, уг-а. Ма, кырӟакум тэтчаны но умой-умой ӧй дӥсьты ни — ӵемтод на эшшо. Но куинетӥ инты понна шумпотӥ!

Вераськон вискамы Александр нош ик уӵы кадь чирдыны ӧдъяз:

Ёк-коколёк, яратӥ
мон тонэ,
Ёк-коколёк, тон
кыткид ук монэ!
Мон уг мын палэнэ.
Ёк-коколёк, мар шедьтӥ синъёсад,
Ёк-коколёк, мар шедьтӥ тусбуяд —
Нош пыдъёс нуо дорад.

Собере нош азьланьтэ веранзэ:
— Пичи Пурга ёросысь одӥг тодмое вераз, коколёк со палъёсын серемес кыл луэ шуыса. Но милям со возьыттэм уг кылӥськы. Мамае ӟеч мылкыдыз дыръя но «ёк-коколёк» шуоз, тышкаськыкуз но «ёк-коколёк!» кеськоз. Куараез гинэ вошъяське.

Ма, пурга палъёслы возьыттэм кадь кылӥське ке, мед шуозы «ёк-моголёк» яке «ёк-ноголёк». Мон кельто та кылъёсты! Мон уйпал удмурт ук! Кырӟанэ ас диалектэным гожтэмын. Критика кулэ — тодӥсько, солы шумпотӥсько. Но ваменэс сямы но одӥг-ог потылэ — аслэсьтымзэ лэсьтон сямам пыӵамын. Аслам ымныры мед луоз.

Ӟуч кылын вераськисько ке, акцентэ, конечно, шӧдӥське. Но сое мон тупатыны уг выриськы. Тодам вайылӥсько на «Италмасэн» пӧртэм городъёсы вуылэмъёсмес.

Отысь калыкен тодматскиськомы вал, юалляммы но вань: укыр шӧтэм вераськиськом-а ӟуч кылын? Уд, пе, кин тӥледлы озьы шуиз? Котькуд калыклэн аслаз сямъёсыз, вераськон манерыз — сокем пӧртэмесь асьмеос. Шат со урод?

* * *
Александр Леонтьев та вакытэ Глазов ёросысь культураез азинтонъя центрын валтӥсь специалист луэ. Бадӟым сценаез со воштӥз гуртысь пичи клубъёсын, фермаосысь «горд сэрегъёсын».

— Быдэс районмес концертъёсын котыръяськом, — шуэ артист. — Уже туж кельше. Городысь кошки, улон инты ӧвӧлэн. Но одӥг но уг жаляськы — вань аслам хозяйствое. Уже ас машинаеным 25 иськемез солань-талань ширъясько. Одӥгез мӧзмыт: гуртъёсысь егитъёс кошко. Концертъёсамы лыкто мӧйыос гинэ. Эх, калык начар! Концертлы 50 манет ке но дун пуктӥськод ке, малпаськыны кутско ни: соин ведь кык колды нянь басьтыны луоз. Калык узырмиз ке, ми но ӟечгес улыны кутском.

Леонтьевлэн аслаз дасолэсь ятыр кырӟанъёсыз ни. Ваньмыз соос удмурт калыкен, вордскем палъёсыныз, асэныз герӟаськемын.

— «Автобиографичноесь» соос мынам, — вера Саша. — Выль кырӟанэ тани-тани гинэ кисьмаз, Глазов палъёсылы со сӥземын.

Глазов ёрос, чебересь
палъёс…
Татын лымыя на,
Ижын сяськая ни,
Кизё ни, кизё Алнашын.

Зэмен но озьы ук! Удмурт шаермы бадӟым ик ӧвӧл кадь. Но лымшор ёросъёсын уйпаланъёсызлэсь куазь но мукетгес. Бен, ваньмес асьмемыз герӟа ужез, вордскем палъёсмес, кылмес яратэммы.

— Яратон сярысь кырӟанъёсы сӥземын семьяелы. Куинь нылъёсы быдэ вуо: 17, 10 но 4 аресъемесь. Кырӟаны-эктыны соос но туж ярато!

Кузпалы мукетгес. Специальностез ик чылкак мукет, со мынам бухгалтер. Бен, концертъёсам одӥг-ог поталля, кырӟан но гожтӥсько ке, нырысетӥ дунъясе со луэ. Ольга Кечпие вуэмын Сьӧлта ёросысь Сюромошур гуртысь. Дорамы сое ыстӥллям направлениея.
Тодматскыкумы мыным 15 арес вал, солы — 18. Суббота-арня нуналъёсы, городысь бертылыкум, одӥг-ог дораз кожалляй. Собере озьы луиз: Ольга ужаз-ужаз-ужаз, мон городын йыромылӥ-йыромылӥ… Калыклэсь номыре уд ваты ук. Пелям сипыртылыны кутскизы: тынад, пе, нылыд будэ. Мынӥ музие доры но юасько: зэм ик-а со мынам? Зэм, пе. Ма бен ӧд вера? Керпотӥ…

— Сыӵеесь милям удмурт нылъёс — керпотӥсесь, чидасесь, мусоесь, ненегесь… Ольгалы соку ик семья кылдытыны џектӥ. Бен, вал, лэся, Казановалэн кадь вакытъёсы. Но мон шудо! Ольгаен паръяським шуыса, ноку жаляме ӧвӧл. Маиз но улонам ӧй вал ни. Культураысь но кошкылӥ. 8 толэзь пала ужай пилорамаын. Кышкыт со, ас ӧрысьтыд потӥськод ке. Адями огпол тодэ ке, мар со сцена, сотэк уг быгаты ни…

***
Ӝыны час пала вераськонмы кык-куинь минут кадь ортчиз. Александрлэн кыл висказ пырыны кышкай — сокем со нялмыт, тунсыко бӧтьыртэ. Кыӵе вань — сыџе: лулыз-сюлмыз вӧлак усьтэмын. Отын ик гор-гор серектэ, отын ик йӧн-йӧн кариське. Вераськон висказ, киоссэ вӧлъяса, пыдъёссэ лёге но э-э! кырӟаны ӧдъя… Сцена вылын гинэ ӧвӧл, катанчи сьӧрын но со задор мылкыдо, ӝуась синмо вылэм. Синмаськымон, ёк-коколёк!

Элина Кумачёва

Туспуктӥз Владимир Беломорских

Удмурт Дунне
By Удмурт Дунне 28 декабря, 2012 12:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<