Тямыс полэс песянай но кык полэс ӵужай

Удмурт Дунне
By Удмурт Дунне 13 декабря, 2012 13:26

Тямыс полэс песянай но кык полэс ӵужай

Ю. Бусарева

Анайлэн нуналэз азьын элькунысьтымы 35 нылкышноослы Удмуртилэн Президентэз Александр Волков «Анаез данъян» пус сётӥз. Соос пӧлын вал Алнаш районысь Вуж Ӟуння гуртысь Юлия Бусарева. Таӵе медален пусъемъёс табере алнашъёс радын 12 луизы.

Бусаревъёс вить нылпи будэтӥзы — ваньзы жильк-жильк экеос. Но ю октон вадес огез пизы шудонъяз шудтэм учыре шеде. Та кайгузэс кызьы ке вунэтон вылысь семья, кӧня ке ар ортчыса, нылпи юртысь 7 аресъем нылашез вордыны басьтэ. Угось кулэм пизы но ӵапак та быдӟа ик вал. Озьы семьяын нош ик вить кузя пиналъёс луо. Агай-вынъёслэн сузэрзы кылдэ, нош анай-атайлэн — нылзы.

— Али нылпиосы ваньзы ас семьяосынызы уло ни, — вера Юлия Васильевна. — Пересьёсмы ӧй вал бере, пиналъёс, ог-огзылы юрттӥськыса, будӥзы. Дорысь ужъёсты ваньзэ быдэсъязы. Огез коркаез утялтэ, мукетыз пу дася, куинетӥез посуда миське. Ужаны дышыса будӥзы.

Бусаревъёслэн нылпиоссы али быдэс кунмылэн пӧртэм сэрегъёсаз пазьгиськемын. Евгенийзы столяр-плотник луыса ужа Яраславль улосысь Ростов Великий городысь Свято-Троицкой Варницкой монастырьын. Кыкетӥез Олег пизы шофёре но мушкасе дышетскиз. Но яратоно удысаз кема ужамез ӧз луы — шудтэм учыре шедьыса, инвалид кылиз. Леонид Краснодар крайын бетон лэсьтӥсьын ужа. Валеразы кемалась ик ӧвӧл йылпумъяз Асан агротехникумез, собере ветлӥз армие. Али Ижысь одӥгаз автосервисын тырше. Нылзы Татарстанэ бызиз. Юлия Васильевналэн но Владимир Васильевичлэн пиоссы кылзӥськисез, ужез гажасесь. Дышетскыкузы пӧртэм грамотаосын пусйылэмын. Соос уго котьку но мыло-кыдо пыриськылӥзы школалэн улоназ.
Та вакытэ Юлия Васильевна 8 полэс песянай но 2 полэс ӵужай ни. Тэк улонэз тодӥсьтэм нылкышно 61 аресаз но ужа на: гурт калыклэсь мултэс йӧлзэ люка, собере сое райпо машинаен келя.

— Улытозям пӧртэм интыосын ужано луиз. Нылпиосыным пукыны дыры чик ӧй вал. Ваньзэс сюдоно-кутчано, дышетоно. Али сямен декретной отпуск но ӧз сётылэ. Та дыре нылпиосты будэтыны вань луонлыкъёс кылдытэмын. Мон али но пиясал на, — серекъяса шуэ Юлия Васильевна. — Нош мурт нылпиез будэтон капчиен уг сётӥськы. Одӥгзэ басьтэм нылпиез будэтытозь, дассэ аслэсьтымзэ вордо.

Али Бусаревъёслэн коркаязы, азьвыл аръёсы кадь, ӵаш уг ни вазьы. Вань ужзэ лэсьтэмез бере нылкышно киужен вырыны дыр шедьтэ: ковёръёс пужыятэ, керттӥське. Нош кыӵе со ческыт пыжиське-пӧра! Нылпиоссэ но тыр ӝӧкен котьку пумита. Вордэм пиналъёсыз но анай-атайзэс уг вунэто. Жингыръяло, чакланы бертало.

Людмила Сурчакова

Удмурт Дунне
By Удмурт Дунне 13 декабря, 2012 13:26