Кыйлудын кыйёс ӧвӧл ни

Удмурт Дунне
By Удмурт Дунне 28 декабря, 2012 11:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кыйлудын кыйёс ӧвӧл ни

Гуртэн тодматӥз В. Лыткина

Ува ёросын трос тунсыко гурт нимъёс пумисько: Парсьгурт, Скалгурт, Кечгурт, Куака. Вань татын Кыйлудзы но, одӥг гинэ ӧвӧл — кык. Вуоно ар Кыйлэн бере, ми Ува районысь Кыйлуд черкогуртэ ик вуылоно кариським.

Чилясь лӥялъёс
Кыйлудэз пичи уд шуы. Сое шори пильыса но кый сямен ик позыръяськыса, Нылга шур бызе. Гурт пасьтана интыяськемын, ӝыныез улыгын, ӝыныез гурезь вылын, лек тӧлъёслэсь утьыса кадь, Кыйлудэз котыртэ нюлэс.

Нырысь ик пыримы гурт администрацие, азьло сямен сельсоветэ. Кивалтӥсез, Сергей Кирпичниковез, интыысьтыз ӧм шедьтэ, Увае, пе, совещание кошкем. Но воштӥсез Татьяна Телицына вераськыны пумит ӧз луы.

— Кыйлуд черкогуртлэн тунсыко историез, — веранзэ мытэ Татьяна Дорофеевна. — 1780-тӥ арын та музъем пыре вылэм Сарапул уездысь Нылга-Жикья волосте, 1908-тӥ арын ини со луэ Кыйлуд волость, собере Вавож ёрослэн лыдъяськем, нош 1962-тӥ арысен пыре Ува ёросэ. Совето власть Кыйлудэ вуэм 1918-тӥ арлэн пумаз. Граждан ож дыръя, 1919-тӥ арын 12-тӥ феврале, Кыйлудэ люкаськылэм волостной кенеш. Отын вераськиллям 990 пуд нянен Кыйлудысь делегациез Москвае ыстыны. Озьы удмурт гуртысь адямиосты Кремльын Ленин пумитам.

Колхоз Кыйлудын кылдэм 1929-тӥ арын. Туннэ нуналлы «Кыйлудское» муниципал кылдытэтэ пыро Вишур но Кыйлуд черкогуртъёс, Гаи, Выль Кыйлуд но Сяртчыгурт. Татын вань шор ёзо школа, нылпи сад, ФАП. Газ пыртэмын ини 1987-тӥ арын. Кыйлуд черкогурт нимаське ке но, черк кемаласьгес ини ворсамын. Черклэсь юртсэ клуб каризы. Туннэ нуналлы Кыйлудын 750 адями улэ. Тужгес арлыдоез — Евдокия Васильевна Бородина, солы 96 арес. Нош Полина Березиналы одӥг толэзь гинэ ай. Сергей Витальевич но Ирина Александровна кузпалъёслэн та ньылетӥ нылзы.

— Татын кыйёс трос-а, малы гуртты озьы нимаське? — юасько Татьяна Дорофеевналэсь.

— Гуртлэсь историзэ тӥледлы пыр-поч вералоз, дыр, Валентина Петровна Лыткина. Со азьвыл дышетӥсь, трос тунсыкозэ тодэ, — шуэ Татьяна Телицына.

Валентина Петровнаез утчано ӧз луы, со ӵапак гурт администрацие пыриз. Милемлы одӥг нуналлы экскурсовод луыны пумит ӧз кариськы.

— Мон но, атае но, солэн айиз но татын вордскемын, — веранзэ мытэ Валентина Лыткина. — Азьло, пе, татчы Мӧляныре тэль кораны ветло вылэм. Кызъёсыз погырто, нош ӵуказеяз ӵукна лыкто но, котькуд лӥял вылын кый, пе, кылле, шунды шорын шунскыса. Гурт вӧзын ик Ӟаблык ошмес вань. Со жоб, лек шуэмлэсь потэмын, но ӟуч манер Ӟаблык луэм. Та ошмес дорын вашкалаослэн мунчозы вылэм. Гуртоос, пе, ӝытаз мисьтӥськыны ветло но, ӵуказеяз шуныт пень пӧлын макемында кыйёс изё. Но али Кыйлудын позыръяськисьёс уг адско ни кадь, Вало шур дурын вань ай, тапалан уг шӧдӥсько ни.

Насьта апай доры газ ӧз вуы на

Насьта апайлэн сизьым нылпиез
Гурт — со, нырысь ик, гуртын улӥсьёс. Валентина Петровналэсь юасько, кин сярысь газетэ гожтыны луоно меда. Кема ик ӧз малпаськы, шуиз: ойдолэ мыном Анастасия Лукояновна Трофимова доры. Та удмурт кышномурт сизьым нылпи будэтӥз, пиналъёсыз визьмоесь, ужасесь.

Озьы, гурт администрациысь потыса, нырысь гурезь уллань, собере гурезь выллань вамыштӥм Насьтапай доры.

Вуимы, капкаез ворсамын, укноосыз кынмемын. Кема йыгаськыса сылӥмы, ярам, кылӥз, милемды пырыны лэзиз.

— Пуны но кынме, лэся, караз гинэ утэ, мон соку ик ӧй но кылы, — корказ ӧтьыса, шуэ Насьта апай. — Та урамын гинэ газ ӧвӧл, таӵе кезьытэн коркаме нуналаз кык пол эстӥсько, вае ай сапегъёстэс гур вылэ пуктыло.

Насьта апай, малы лыктэммес тодыса, нырысь йырыныз шоназ: малы, пе, монэ газетэ гожъянэз, калыклэсь номырин уг висъяськиськы. Но ми сое патретэ но пуктом ай шуэммы бере шифоньерысьтыз выль кышетсэ поттӥз:

— Кышетэ жаг мында, дорын вужъёсыныз ик ветлоно кожасько кадь. Егит дыръям мон таӵе страшной ӧй вал. Пересьмыса чеберлык бездэ вылэм. Картэным туж ӟеч улӥм, табере тани укмыс ар огнам ини, инфаркт погыртӥз сое. Сизьым нылпи вордӥмы.

Пичиоссэ, кыкто пиосме, 50 аресам мыныкум, вайи ини. Бадӟымез, Люба нылы, Ижын улэ, мотозаводын ужаз. Кыкетӥез, Николай пие, УдГУ-ын студентъёсты суредаськыны дышетэ. Куинетӥез нылпие — Миша пие, таиз спортсмен, солы куасэн бызьылон медло, муш но вордэ. УдГУ-ысь спортфакез быдтыса, Уваын студентъёсты дышетэ. Собере Таня но Надя нылъёсы мыно. Таняе модельер-конструктор, Надяе пинь эмъясь, кыксы ик Череповец городын уло.

Кыктоосы — Володя но Саша — тожо дышетӥсьёс. УдГУ-ын тодон-валан люкаса, Володя биологияя, химияя дышетӥсь луиз, Завьялын улэ, корка пуктэ. Саша Ува ёросысь Мултан школаын дышетэ. Таиз гинэ кышнояськемын ӧвӧл на, кузпалъяськиз ке, чорыганы уз лэзе ни кожа, лэся. Кезьыт-а, пӧсь-а — весь чорыга. Сашаен Миша дорам ӵемгес бертало, матынгес уло бере. Зол пелляське ке, ӝыт лымы мычыны вуо, пу пильылыса кельто. Пудо уг вордӥськы ни, курегъёсы но пуные гинэ вань. Пуны утэм куара азбарез шулдыртэ кадь потэ. Соин ик, парсь кӧйын ӝук пӧзьтыса, корка возьмасьме сюдӥсько, — шуэ Насьта апай.

Со куспын ик телефонэз жингыртӥз. Кышномурт вакчияк отчёт лэсьтӥз: «Коркае шуныт, Саша бертаз, пу пыртаз. Таӵе кезьытэн эн ветлы, эн ёрмы монэн. Ярам, иське». Тазьы шуиз но телефонзэ куштӥз. Собере пальпотыса вера:
— Мишае жингыртӥз, 31-тӥ декабре, пе, лыктом, Выль арез огнад медад пумита. Оген шулдыр ӧвӧл, нош нылпиосы ог-огзылы эш но, юрттӥсь но. Пиналъёс визьмоесь, шудоесь, ужез гажасесь ке, анайлы мар кулэ на.

Тодэ лыктэ Ахматова
Анастасия Лукояновна дорын шунтӥськыса, нош ик азьланьтӥм Кыйлудэн тодматсконмес. Гурезь уллань васькыку, син шоры йӧтэ лымыен шобыртэм кузь сюрес. Солэн кык палтӥз ик кызьпуос будо. Писпуос, калыкез витьыса, жадиллям но огдырлы умме усиллям, кожалод. Нош чебер, ӝужыт кызьпуо сюреслэн мышказ адско укнооссы но ӧсъёссы пуосын ӵогам юртъёс.
— Ӵапак отын вал милям «Кыйлудский» шутэтскон юртмы. Со усьтӥськиз 1931-тӥ арын.

Трос лэсьтӥз Арсентий Агафонов. Со кивалтыку, татын пуктэмын вал библиотека, клуб, нылпи площадка, спортзал. Котькуд кык арнязэ 800 мурт ӵыдэтскиз, татысь калык ӧз бырылы. Арсентий Константинович ужаку ик, та кызьпу аллея но мерттэмын вал. Но 1990-тӥ аръёслэн пумазы шутэтскон база нокинлы кулэ ӧз луы. Табере, куке но чебер но шулдыр инты шоры учкыса, Анна Ахматовалэн кылбур чуръёсыз гинэ на тодэ лыкто: «Всё расхищено, продано, предано…», — лулӟе Валентина Лыткина.

Кыйлудлэн паллян палаз ворсаськем, куашкам коркаос пумисько ке, гурезь йылын, шур сьӧрын соос жингыртыса кадь сыло. Кибашлыос татын вань гинэ. Кылсярысь, Евгений Ивановлэн котьмалы киыз мынэ, пиосмурт муш но вордэ, пӧртэм пумо бекчеос но лэсьтэ. Мукетызлэн усточилэн, Владимир Горячихлэн, юртъерез синэз шумпоттэ. Кибашлы воргорон бадӟым корка пуктӥз, семьяез но пичи ӧвӧл уго.

— Гуртын урод уло шуыны уг луы, — веранзэ азьланьтэ экскурсоводмы. — Хозяйствомы начар ӧвӧл, уждун тыро, «Ленин нимо колхоз» СПК-ен дас арлэсь кема кивалтэ ини Любовь Белкина. Тросэз воргоронъёс Уйпала ужаны ветло, корка пукто, семьязэс сюдыны сюлмасько. Кыйлуд умой интые пуксемын. Уваозь но матын, Ижевскозь но кема мыноно ӧвӧл.

Удмурт кылэз уг дышето
Урамын адямиосын удмурт кылын вераським ке, школае пырыса, «умоесь» шуэмме мынэсьтым ӧз валалэ. Но удмурт сямен вераськись дышетӥсьёс сюризы ик. Директорлэн воштӥсез Лариса Ивановна Эшмакова лад-лад но чебер вераськиз.

— Таиз школамы пуктэмын 1982-тӥ арын, адӟиськоды, дорамы шуныт, югыт, куинь ар талэсь азьло спортзалмес выльдӥзы, табере со выль школаын кадь ӟеч. Туннэ нуналлы татын 116 пинал тодон-валан басьтэ. Шумпотымон, дышетскисьёслэн лыдзы милям уг усьы, туэ нырысетӥ классэ лыктӥз 12 тэшкыли. Пиналъёс усто тодон-валанъёс возьмато. Кылсярысь, кылем арын зарни медален школаез быдтӥз Настя Повышева. Али дышетске Казаньысь искусствоосъя но культурая институтын.

Сюлмаськонъёс но вань. Ми туж возьмаськом егит дышетӥсьёсты, уго физикая, информатикая но англи кылъя урокъёсты нуо пенсионеръёс. Выпускникъёсынымы данъяськиськом. Кылсярысь, Николай Пислегин, история наукаосъя кандидат, ужа Историяя, кылъя но литературая Удмурт институтын. Подполковник Михаил Тараканов Санкт-Петербургын улэ, Константин Зворыгин ИжГТУ-ын дышетэ, — мылкыдзэ усьтэ Лариса Ивановна.

Татын, огшоры гурт школаын, вань психологзы. Светлана Николаевна Кирпичникова доры нылпиос но пӧртэм юанъёсын вазисько, дышетӥсьёс но визь-кенеш куро.

— Куд-огез дорам сюлэмшугзэ вераны вуэ. Ваньмызлы котьмае уд усьты ук, ӵем дыръя адямиез кылзӥськод но, солы капчи луэ ини. Собере, мон тазалыкез юнматонлы сӥзем уж нуисько нылпиос но дышетћсьёс пӧлын. Школаямы, ёросысь гинэ ӧвӧл, республикаысь куноос вуыло пӧртэм семинаръёсы пыриськон понна. Милям татын тренажёр залмы но вань. Кыйлуд школа пыриськиз «Газпром — детям» конкурсэ. Отчы ыстӥм «Тазалык» программамес, со вормисе потӥз. Озьы 250 сюрс манет тыр 12 тренажёр басьтэмын вал.

Озьы ке но маза уг сёты одӥг юан: малы татын уг дышето анай кылэз? Директорлэсь ужзэ быдэсъясь Елена Васильевна Зорина верамъя, азьло татын удмурт кылъя но литературая дышетӥсьсы ӧй вал. Табере дышетӥсь вань.

— Анай-атайёс но пумит ӧвӧл кадь, нылпиоссы удмурт кылэз мед дышетозы шуыса. Оло, факультатив амалэн ке но удмурт кыл борды басьтӥськом, — шуиз Елена Зорина.

Кыйлудысь кошкумы ини, Валентина Лыткиналэсь юасько, Кыйлэн арез вуэ ук, гуртоосты кызьы пусйыны дасясько?
— Ма, со милям йырамы ик ӧй вал ай. Выль арез аспӧртэмгес пусъёно шуыса улӥськом, нош кыен «шудыны» луэ шуыса, ӧм ик малпаське. Туж ӟеч малпан ук со, одно ик эшъёсын кенешомы ай, — шуиз Валентина Петровна.

* * *
Ува ёросысь Кыйлудлы синмаським, инкуазезлы но, татын улћсьёсызлы но. Но сюлэмын пичияк чепыллясез но вал. Выль ар номермес гуртоос уз адӟе, дыр, татысь почталэн кивалтӥсез Валентина Симакова верамъя, Кыйлудын, пе, одӥг мурт гинэ «Удмурт дуннеез» басьтэ.

Галина Семёнова

Туспуктӥз Владимир Беломорских

 

Удмурт Дунне
By Удмурт Дунне 28 декабря, 2012 11:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<