Кивалтэ асэныз ачиз

Удмурт Дунне
By Удмурт Дунне Декабрь 7, 2012 18:27

Кивалтэ асэныз ачиз

Почтальон Л. Щепина

Глазов ёросысь Люм почта ёзэн кивалтэ Людмила Щепина, ачиз ик почтальон но. Ӧжыт уждунэн нокинлэн пыдзэ жугемез уг поты, коркась корка ветлыса.

Людмила Геннадьевна почта удысын ужа ни 1978-тӥ арысен, куать арзэ — кивалтӥсьын. Табере тани почтаез но аслыз нуллоно луэ. Отпуске но лэземзы уг, пе, поты воштӥсь ӧвӧлэн. Яке вис карылыса шутэтсконо луэ, интыяз ужась уг ке шедьто.
Алигес Россиысь почталэн Удмурт ёзаз ужасьёс ивор вӧлмытӥзы: шаерысьтымы 1 сюрс 500 почтальонъёслы  пыдкуксы борды венё пыдэсъёс — подошваос — висъямын. Тӥ доры вуиз ни-а шуыса юанлы, нылкышно паймиз: сое, пе, милемлы дасо аръёс талэсь азьло висъязы ни. Возьматӥз, мар со сыӵе. Йӧвалег дыръя, резиналэсь лэсьтэм арбериез пыдкутчанэз борды юнматыса, люкылэ почтазэ.

Почтальонъёслы озьы ик висъяны чакламын толлы шуныт ужан дӥськут, пыдкутчан. Таяз арын басьтэмын 600 куртка, 900 куз шуныт сапегъёс но ботинкаос, пӧзьёс. Пеймыт куазен ужано луэ шуыса, ужасьёслы фонарикъёс сётъяло.
Таӵе сюлмаськон мултэс уз луы Л. Щепиналы но. Люме сяна, почтаез нуллоно луэ 5 иськеме интыяськем Шудӟа гуртэ. Ярам, отчы  автобус ветлэ. Соиз но вань: азьло сямен газет-журналлы гожтӥськисьёс ӧвӧл ни.

— Валлё аръёсы пачкаен-пачкаен нуллоно вал, — шуэ Людмила Геннадьевна. — «Удмурт дунне» газетэз но яратыса лыдӟизы. Табере 500-лэсь ятыр улӥсьлы куинь газет гинэ вуэ. Котьку сямен удмурт газет-журналъёслы гожтӥське Люмысь удмурт кылъя дышетӥсь Раиса Ивановна Резенова. «Удмурт дуннетэк» улэмез уг луы Ольга Степановна Ивакиналэн: укмыстон арес ке но, яратыса лыдӟе газеттэс. Шудӟаын вань на одӥгез гожтӥськись — пенсионерка Анна Трофимовна Резенова.

Гуртоослэн лыдӟись-кемзы уг поты, нылпиоссылы гинэ но нокыӵе газет-журнал уг басьто. Глазовын потӥсь «Иднакар» газетлы кӧня ке адями гожтӥське ик, пе. Озьыен, Люм быдэсак ӟучомемын ӧвӧл на.

Лия Малых

Туспуктӥз Владимир Беломорских

Удмурт Дунне
By Удмурт Дунне Декабрь 7, 2012 18:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<