Кеньыро Орина

Удмурт Дунне
By Удмурт Дунне 28 декабря, 2012 12:15

Кеньыро Орина

Орина

Юмореска

Тодмады-а? Ма, Коӵыш гуртысь Вася-Марья-Сергей Женялэн берпуметӥ удалтымтэ нылыз ук мон! Якшурысь Пислег Мишалэн «гур суран» кенэз, Селей пиезлэн горлопан кышноез. Куарае удалтэмын ке удалтэмын. Та дуннее потыкум ик, роддом тыр, пе, кесяськисько, ява. Врач, палатае пырыса, «кто тут так орёт», пе, шуэ. Соин сэрен анае ним но кема бырйыса ӧвӧл улэм, озьы ик нимам — Орина. Нош ӟучъёс шуо ук: «Как вы яхту назовёте, так она и поплывёт».

Анай малпам вылэм, мон кырӟась луо шуыса. Кытын пе! Адямилы пель вылаз гондыр лёгиськем шуо, нош мыным парсьпи лёгиськемен но окмем. Кырӟаны кутскисько ке, бускельёсмылэн курегъёссы пузамысь напрочь дугдо. Соин ик мон али, гуртамы проводной радиоез быдтэмен, местной громкоговоритель интыын ужасько. Вылӥе тубыны йыры пороме, соин ик кыед люк вылэ тубисько но вань иворъёсты супыльтӥсько. Макмыр Васи монэ со понна «гений из навозных удобрений», шуэ. Нош апайёссы шузи, шуо: та Оринамылэн йыраз воксё, пе, кеньырез ӧвӧл, лэся. Ванез но уг пӧзьы.

Вот монэ шузи шуо, нош асьсэос сое гинэ но уг тодо. Кӧня градус кулэ кеньыр мед пӧзёз шуыса? Самой ичизэ — сю градус, нош мынам висьыкум но ньыльдонозь гинэ вуэ. Кызьы со пӧзёз? Паймод но бырод, ява.

Одӥг пол, исамзылы чидатэк, кеньырме одно ик пӧзьтыны малпай. Лыдьяй: аслам градусъёсы борды анайлэн шыкысысьтыз ватэм градусъёсты йылтӥ ке, кеньыре одно ик пӧзьыны кулэ.

Кема ӝегаса ӧй улы, фунфурикез пушкам бушатыса, мунчое мынӥ. Пар кисьтӥ но полать вылэ выдӥ. «Ой, тӥ чебер нылъёс» но кырӟаса ӧй вутты, кеньыре пӧзьыны ӧдъяз. Пӧзем гинэ ӧвӧл, сотона, уртчыны кутскиз! Мон ымме пытсасько, со ныртӥм потэ… Ваньзэ мадьыса уг улы, вакчияк верало: мугорам кӧня пасез вань, ваньмытӥз ик потӥз, лэся.

Табере апайёссы шузи шуизы ке, кин-о, пӧй, виноват? Сомында кеньырез йырам вань вылэм, нош тӥледын сэрен одӥг пырыез но ӧз кыльы. Одӥгтэм мунчо выж улэ быриз!

Ирина Эсенкулова

Удмурт Дунне
By Удмурт Дунне 28 декабря, 2012 12:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<