«Италмасэз» куинь кылын лыдӟизы

Удмурт Дунне
By Удмурт Дунне 10 декабря, 2012 11:27

«Италмасэз» куинь кылын лыдӟизы

М. Плоскова

Шумпотымон ивор: табере М. П. Петровлэсь «Италмас» поэмазэ удмурт кылын гинэ ӧвӧл, коми сямен но лыдӟыны луоз. Ваньмыз со Сыктывкарын улӥсь М.А. Плосковалы луыса. Паймоно кадь, та кышномурт, ачиз коньдон шедьтыса, укмысэтӥ книга поттӥз ни. Кӧня ке ар талэсь азьло удмурт кылысь ик «Идна-батырез» берыктӥз ни вал.

Вылезлэн книгалэн – «Италмаслэн» — презентациез 6-тӥ шуркынмонэ Сыктывкарын интыяськем Россиысь Фин-угор центрын радъяськиз. Татчы вуылӥзы 30 пала адямиос, шумпотымон, ӝыныез дыр, соос пӧлысь егитъёс вал. Ужрад кутскыку, люкаськемъёслэсь юазы, тодо-а соос, мар со сыӵе италмас? Веразы сяськаез, выль потэм книгаез, бальзамез, ансамблез. Собере нуись ватсаз на Дэри ёросысь черкогуртэз, гостиницаез, вашкала удмурт нимез.

Ужрадын Мария Алексеевналы тау карон кылъёссэс школаосысь но гимназиосысь дышетӥсьёс, библиотекаосын ужасьёс, коми гожъяськисьёс веразы, азинсконъёс но выль малпанъёс сӥзизы. М. А. Плоскова одӥгез сыӵе адямиос пӧлысь, кудӥз кылъёс вылын гинэ ӧвӧл, уж пыр возьматыны тырше перм кылъёслэсь матын луэмзэс: удмуртысь-а, коми-пермякысь-а берыктэ – одно ик ӵыжы-выжы луись кылъёслэсь кыллюкам дася (берыктӥсь сюлмаське, коми нылпиос асьсэ лулчеберетэз сяна, мукет перм калыкъёслэсь но мед тодозы, соос ӵыжы-выжы луо ук!) .

Выль «Италмас» книга но туж чебер, кие кутымон пӧрмиз: чурыт выло, яркыт буёло, удмурт шаерын лэсьтэм туспуктэмъёсын (Мария Алексеевна соосыз лэсьтӥз туэ тулыс Лудорвайысь «Гербер» шулдыръяськонэ вуылыкуз), коми-удмурт кыллюкамен. Тиражез – 500 экземпляр. Верано на, берыктӥсь поттэм книгаоссэ ноку уг вуза, школаосы, библиотекаосы, финн-угор центръёсы кузьма. Нош презентация дыръя пичияк лотерея но дасям: кинлы удалтӥз – со басьтӥз кузьым выль книга.

Нош малы меда Мария Алексеевна ӵапак Михаил Петрович Петровлэсь «Италмас» поэмазэ берыктӥз? Валэктонэз тани кыӵе вылэм: «2010-тӥ арын мон Ижкарын ортчись конференцие пыриськи, верай «Идна-батыр» поэма бордын ужакум пӧртэм фразеологизмъёсыз кылысь кылэ берыктон сярысь. Ӵапак соку мыным «Италмас» нимо бальзам но М. П. Петровлэсь поэмаен книгазэ кузьмазы. Пайми, малы удмуртъёс сыӵе со сяськаез ярато, со гостиницалэн но ансамбльлэн нимыз но, удмурт калыклэн аспӧртэмлыко символэз но. Соку ик малпай «Италмасэз» коми кылэ берыктыны».

Книга туж усто пӧрмем, соин тодматскон ужрад но тунсыко ортчиз: «Италмас» поэмаысь люкетъёсыз удмурт, ӟуч но коми кылын лыдӟизы, удмуртъёс сярысь вакчи но тунсыко фильм возьматӥзы. Малпасько, таӵе ужрадъёс мукет калыклэн культураеныз тодматскон гинэ ӧвӧл, солы гажан мылкыд пыӵатон но.

Лена Рябина

Удмурт Дунне
By Удмурт Дунне 10 декабря, 2012 11:27