Дэрем суредало… воргоронъёс

Удмурт Дунне
By Удмурт Дунне 12 декабря, 2012 10:46

Дэрем суредало… воргоронъёс

«Шаркан-трикотаж» фабрикаын вурем туала удмурт дэрем

Удмурт дэремен шоголляськыса ветлӥсьёслэн лыдзы арысь аре йылэ. Гербере, Воршудэ, Палэзянэ, Удмурт нылкышно кенешлэн ужрадъёсаз но мукет шулдыръяськонъёсы адямиос ӵемгес удмурт дэремъёсын пӧрмытско. Берло дыре город ульчаетӥ но ветлӥсьёсты адӟыны луэ.

Пусйыны кулэ, вашкала дыръя котькуд гуртлэн аслыз гинэ тупась дӥсез вал. Кылсярысь, артысь гуртъёсын улӥсьёс ик пӧртэм турлы дэремъёс дӥсяллязы. 1950-тӥ аръёсы ваньмаз сямен гуртъёсын улӥсьёс удмурт дэремъёсын ужаны но, юмшаны но ветлӥзы. Отӥяз ини — калык «ӟучъяськыны» кутскиз. Ярано коть, удмуртлыкмы чылкак бырыса ӧз вутты. Калык нош ик кыстӥськиз вашкала дӥсь борды, песянайёслэн шыкысъёсазы бугыръяськыса, куэм дэремъёслы кыкетӥ шокчон кузьмало: кин ке сое ас быгатэмезъя выльдэ, кин ке вашкалазэ утьыны тырше.

Калык вырӟиз. Удмурт костюмъёслы, дэремъёслы сӥзем адӟытонъёс берло дыре пӧртэм интыосын ортчыло. 21-тӥ даурысь костюмъёс возьматэмын вал Ижысь калык киужъёсъя юртын. Шаерысьтымы вань ёросъёсысь кибашлыос пӧртэм амалъя лэсьтэм дэремъёссэс вайиллям. Слобода удмуртъёслэсь дӥсьсэс быдэстэм Яр ёросысь кибашлы вуриськись Марина Данилова.

Уйпал удмуртъёс но бесерманъёс праздник нуналъёсы, пе, ӵем дыръя тӧдьы дэрем нуллӥллям. Отчы турлы пужыос пуктылӥллям, тужгес ӵем пумиськыло вылэм горд сӥньысэн пужъятэмъёсыз. Шаерысьтымы история наукаосъя доктор, профессор, этнограф Владимир Владыкин верамъя, ӵапак слобода удмуртъёс вашкалазэ тужгес умой утиллям.

Туала удмурт дӥсьлы бадӟым саклык висъяло УдГУ-ысь Искусствоя но дизайнъя институтын. Студентъёслэн ужъёсынызы адӟытонъёс радъям сяна, котырес ӝӧк сьӧрын кенешонъёс ортчыто. Бер сӥзьыл отчы люкаськылӥзы учёнойёс, дизайнеръёс, Ижысь Суредан искусствоосъя музейысь реставратор Татьяна Москвина, кырӟась-верасьёс, студентъёс но огшоры калык.

Ваньзы кылпум ӝутӥзы туала удмурт дэрем сярысь: кыӵе со луыны кулэ, шонер буёлъёсты, тупась басмаосты куто-а ужазы туала вуриськисьёс?

Бен, куэм дэремъёсын ветлӥсьёсты трос уд пумита, гольык вылтыр вылэ но дэраез уд дӥся. Сое вошто сатин, штапель но мукет басмаос, нош ӵем дыръя гуртоос яркыт буёло буртчинэз быръё. Таиз куддыръя укыр гольтрес но адске.

— Вашкалаезлэсь кыдёке палэнсконо ӧвӧл, — шуэ реставратор Татьяна Москвина. — Куамын ар пала удмурт дэрем вурисько бере, котькыӵе куронъёсын дорам вазисько. Нимаз адямиослэн куд-ог воштонъёс пыртэмзы потэ, кырӟась-верась коллективъёс яркыт буёло вурыны куро. Удмурт шӧмзэ гинэ быдтоно ӧвӧл вылэм. Дэремлэн котькуд итэтэз мае ке возьматэ. Шуом, ӝужыт сирес — со аспӧртэм утись — висёнъёсты палэнтӥсь.

— Мон туала удмурт дӥсь нуллӥсько, — вераськонэ итӥськиз филология наукаосъя доктор, Удмурт Республикаысь наука удысысь дано ужась Татьяна Владыкина. — Удмурт дэреме вуремын ас малпамея, вашкалазэ лыдэ басьтыса. Ветлыны эркын, вашкала удмурт пужыос дэремме шулдыргес каро.

Ужрадэ мыло-кыдо пыриськизы шаерысьтымы егитъёс. Искусствоя но дизайнъя институт киужлы усточи егитъёсты син азяз возе, кибашлыосын пумиськон ӝытъёс ортчытъяло, егитъёслэн ужъёсынызы адӟытонъёс радъяло. Пусйыны кулэ, туала дӥсь кылдытон уже вуоно кивоштӥсьёс сэзьгес пырисько.

— Кемалась ик ӧвӧл аслэсьтыз дӥсьёссэ возьматӥз студенткамы Елизавета Михайлова, — вера та институтысь доцент Ирина Сазыкина. — Арлы быдэ туала дӥсья курсовой я диплом ужъёс гожто. Пӧлысьтызы тросэз егитъёс удмурт дэремъёс кылдытон борды басьтӥсько. Уноез выпускникъёсмы Глазов, Вотка но Сарапул городъёсысь, шаерысьтымы куд-ог ёросъёсысь калык киужъёсъя центръёсын костюмъёсъя художник луыса тыршо. Озьы ик удмурт нылъёс Санкт-Петербург но Киев городъёсын ас быгатонлыкъёсынызы калыкез шумпотто.

Кенешонъёс ортчем бере удмурт дэрем кылдытӥсьёс огкылэ вуизы: туала дэрем данъяськымон луыны кулэ, со вакытэ ик вашкалазэ улӟытон сярысь сюлмаськоно. Удмурт культураен тунсыкъяськисьёслэн лыдзы йылэ, озьы бере анай кылмес гажасьёслэн шкафъёсазы одӥг ке но удмурт дӥсьсы одно ик луыны кулэ. Бен, куд-огезлэн шуэмез потоз, вуз карон юртъёсысь туала дэремъёсты шедьтыны уг луы шуыса. Но дэрем нуллыны мылкыд карисьёсты со уг сюлмаськыты, шӧдске. Соос ёросысьтызы кибашлыоссылы я киужъёсъя центръёсын ужасьёслы вазисько. Ӝоген вурем дэремъёс сяна, керттэм удмурт дэремъёс но калыке вуозы.

— Туэ чылкак выль коллекция кылдытон борды басьтӥськимы, — шуэ «Шаркан-трикотаж» фабрикаысь эксперимент ортчытонъя цехен кивалтӥсь Елена Вяткина. — Дизайнеръёсмылы тэк пукыны маза ум сётӥське. Соос арнялы быдэ выль ужъёссэс ӵекто нимысьтыз комиссилы. Валамон, вань ужъёссы калык доры уг вуо. Тужгес усто проектъёслы гинэ выль сюрес усьтӥське.

Шарканысь дизайнеръёс ас ужазы куто удмурт журналъёсты но калык пӧлын вӧлмем пужыосты. Тупасьсэ ас удысазы кутыса, «Емышо гуждор» коллекция кылдытӥз. Выль ужзэс туэ сентябре Сочиын ортчем адӟытонэ нуллӥзы. Та ужрадын Шарканын керттэм дӥсез вылӥ дунъязы. Суредасьёс но дизайнеръёс Ирина Кондратьева, Александр Исаев но Сергей Янков туала егитъёслэсь куронъёссэс котыр ласянь лыдэ басьтӥзы. Шарканъёслэсь удмурт пужыё дӥсьсэс, пе, тулыс шаерысьтымы лавкаосысь шедьтыны луоз ни.

Валентина Емельянова

Удмурт Дунне
By Удмурт Дунне 12 декабря, 2012 10:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<