Данъяськонэз валасьтэм

Удмурт Дунне
By Удмурт Дунне 13 декабря, 2012 16:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Данъяськонэз валасьтэм

Дэри ёросысь Юськи школаын удмурт кылъя но литературая урокъёсты нуэ туж адӟем карымон, ас удыссэ пыр-поч тодӥсь П. Давыдов.

Пётр Владимировичлэн нимтулыз ас школаяз, ёросаз гинэ ӧвӧл, быдэс шаерамы тодмо. Удмуртлыкен герӟаськем одӥг ужрадлэсь но со палэнэ уг кыльылы. Быгатонъёсыз-тыршемез пусъемын данъян грамотаосын, премиосын. «Дышетон» нацпроектын нюръяськыса, Пётр Давыдов Россиысь устоосыз визьнодасьёс пӧлы шедиз.

Но котьма ке но, адямилы тужгес шонер дунъет сётыны быгато ӵош ужась эшъёсыз. Юськиысь дышетӥсьёс со сярысь шуо: йӧн-йӧн. Директорлэн воштӥсез Елена Анохина ушъя:

— Котькыӵе ужзэ одно йылаз-пумаз вуттэ, чыры-пырыосты но синйылтэ, сётэм кылзэ быдэстытэк уз кельты, урокъёсызлы тыро-пыдо дасяське, дышетӥсьёс гажало, нылпиос ярато…

Нош ачиз Пётр Владимирович данъяськонэз уг вала. Шыпыт мынэ улон кузя. Школае вазь ӵукна ик йыгмыт вамыштэ ни: отын сое витё ужъёс. Туннэ йылыз-пумаз вуттоно «Вуюись» бордгазетэз, ӵуказе люкано творчествоя кружоке ветлӥсь нылпиосты. Бурдъяло соос дышетӥсьсэс! Ужъёссы, эсьма, «Ӟечбур!» газетын но печатласько. Нош макем шумпоттӥз Вадим пиез! Та нуналъёсы со пусъемын Герман Ходырев нимо премиен.
Юськиын улэмъёс но улӥсьёс сярысь Пётр Владимировичлэсь ӟечгес нокин уг тоды, дыр. Со тунсыкъяське гуртэн герӟаськем инты нимъёсын но. Гожъямъёсыз-эскеронъёсыз быдэс книга поттымон люкаськемын ни, шуо гуртоос. Мед, пе, сыӵе бичет поттыны быгатоз — Пётр Владимировичлы таӵе сӥзёнзы.

Светлана Итешина

Удмурт Дунне
By Удмурт Дунне 13 декабря, 2012 16:24