Чупчи уӵы

Удмурт Дунне
By Удмурт Дунне Декабрь 21, 2012 16:47
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Чупчи уӵы

Е. Миронова, Т. Дьяконова С. Широбоковез буре ваён пул азьын

Дэбесысь политехникумын, Удмуртиысь калык кылбурчилэн Степан Широбоковлэн 100 ар тырмонэзлы сӥзьыса,  «С. Широбоков — кылбурчи но адями» конференция ортчиз. Солэн ужаз пыриськизы шаерысьтымы тодосчиос, дышетӥсьёс, нылпиос но культура удысын тыршисьёс.

Ужрад усьтӥськиз ульчаын. Политехникум борды юнматэмын Степан Широбоковез буре ваён пул. Уго кылбурчи Дэбесысь педучилищеын (али политехникум луэмын) тодон-валан люказ, та юрт интыын азьло вал солэн коркаез, татын будо солэн мерттэм писпуосыз.

Конференциын трос вераськизы Степан Павловичлэн творчествоез но улон-вылонэз сярысь. Удмурт кун университетысь филология наукаосъя кандидат Виктор Шибанов верамъя, «Дэбес» но «Широбоков» кылъёсты ог-огзылэсь нокызьы но люкыны уг луы. Шаркан ёросын вордӥськем кылбурчи Дэбесын дышетскиз, татысен пумитаз нырысетӥ яратонзэ, вордскизы нылпиосыз. Творчествозэ эскероно ке, Степан Павловичлэсь кылбуръёссэ учкыса, нырысь валаны уг луы, кышномурт-а, пиосмурт-а соосты гожтэ. Чупчи уӵылэн кылыз, образъёсыз, эмоциосыз туж узыресь.

— Жаляса верано, удмурт филология факультетысь студентъёс та кылбурчи сярысь дипломъёс шер гожъяло. Но мыным потэ: Алнаш яке Яр ёросъёсысь егитъёслэн солэсь творчествозэ мур но котыр ласянь эскеремзы уз луы. Степан Павловичлэсь удмурт литератураын интызэ чакланы-дунъяны кулэ Дэбес ёросысь ик яке Широбоковлэн произведениосызлы зэмос синмаськем муртъёс, — шуэ Виктор Шибанов.

Дэбесын сыӵе адямиос вань. Кылсярысь, конференциын «Тодмо но тодмотэм Широбоков» секцилэсь ужзэ радъясь шаерчи Павел Роготнев. Павел Васильевич та юбилейлы поттӥз удмурт кылбурчилэн статьяосыныз но кылбуръёсыныз сборник.
— Широбоковлэсь юбилейзэ аспӧртэмлыкогес пусъён понна малпамы: солэсь Дэбес ёросысь газетын редакторлэн воштӥсез луыса ужамзэ тодамы ваёмы, соку гожтэм чуръёссэ шедьтомы но сборникен поттомы. Уго Степан Павловичлэсь та вакытсэ тросэз уг тодо.

С. Широбоковлэн 1965-тӥ-1967-тӥ аръёсы гожъямъёсаз ӝутскем мылкыд шӧдӥське. Быдӟым ож бере гурт удыс, экономика пыд йылазы султыны кутско, колхозъёсын нырысьсэ уждун сёто. Скал кыскисьёс, колхоз кузёос, нянь будэтӥсьёс, кивоштӥсьёс сярысь очеркъёссэ, зарисовкаоссэ ми, куд-ог янгышъёссэ тупатъятэк ик, печатлам. Отын черкогуртмы но «Дебёсс» гожтэмын ай. Ваньмыз та возьматэ со вакытлэсь тодметъёссэ, нош статьяос луо ини ёросмылэн историез, — шуэ Павел Васильевич.

Степан Широбоков тракторист сярысь ке гожтэ, одно ик, бусые мыныса, трактор сьӧры пуксе но кӧня ке гыре вылэм, сотэк, пе, уд шӧды музъем гырисьлэсь ужзэ. Редакторлэн воштӥсез луыса ужаку, со материалъёс удмурт кылын «Выль сюреслы» гожъям, бӧрысь ини берыкъям ӟуч кылын потӥсь «Новый путь» газетэ. Со вакытэ газет туж тунсыко вылэм, лыдӟисьёслэн лыдзы но будэм. Нош Степан Широбоков кошкем бере «Выль сюрес» мӧзмытгес луэм.

Удмурт кылбурчилэсь мытэм ужзэ азьланьтӥз Валерий Нуриахметов, «Байгурезь» газетлэн редакторез.
— Редакцие лыктӥ но, мыным шуизы: тон пукод Степан Широбоковлэн љӧк сьӧраз, — вера Валерий Нуриахметов. — Туж жаль, Степан Павлович дневник ӧз нуы шуыса. Но мылкыдъёсыз, сюлмаськонъёсыз усьтӥсько гожтэтъёсаз. Кылсярысь, огаз со тазьы гожтэм эшезлы: «Мон — газетчи. Толон уйин 2 часозь ужамы. Отпуске быриз: табере нош ик йӧл, сӥль, курегпуз но мукетыз сярысь гожъяно».

Но мынам али вераме потэ пьесаез сярысь. Дэбесын 1985-тӥ арын Широбоковлы сӥзем лыдӟонъёс ортчытъяны кутскеммы бере уката но матысь эшъяськимы солэн кышноеныз Тамара Степановнаен. Иже вуылыкумы, одно ик дораз пыриськом вал. Соку ик книгаосын ӝажы вылысь син шорам йӧтӥз «Выль кузё» гожтэмен папка. Сое усьтыса, пайми: пьесаын геройёс «Яратон ке ӧвӧл» произведениын кадесь ик, нош пуштросэз чутрак мукет. Ваньмыз валамон луиз, со папкаысь ик договорез адӟыса. 1957-тӥ арын шаерысьтымы Культурая министерство Степан Широбоковлы «Кузё» пьеса гожтыны заказ сётэм. Драматург куронэз быдэстэм.

Со пьеса понна Степан Павловичлы 15 сюрс манет гонорар но тыриллям, но Удмурт театрлэн сценаез вылэ та спектакль ӧз вуы. Кивалтӥсьёслы со сюлэмзыя луымтэ. Соку Степан Широбоков со геройёсын ик гожтӥз «Яратон ке ӧвӧл» произведенизэ.
Вераны кулэ, кылбурчилэн статьяосыныз сборник сяна, тодмо драматурглэн юбилеезлы сӥземын вал «Байгурезь» газетлэн быдэс номерез. Тодэ ваёнъёсын, Широбоковлэн кылбуръёсыныз но «Кузё» пьесаеныз, тунсыко туспуктэмъёсын газетэз залын пукисьёс мыло-кыдо кутылӥзы.

Та конференциын озьы ик ужазы на мукет секциос но. Кылсярысь, «Егит гожъясьёс» нимояз люкаськемъёслэсь нырысетӥ кылбуръёссэс эскеризы дышетӥсь Галина Образцова но кылбурчи Владимир Котков. Галина Азарьевна пусйиз, тросэз чуръёс сӥземын вордӥськем шаермылы.

— Тужгес тунсыко милемлы потӥзы Якшур-Бӧдья ёросысь 11-тӥ классын дышетскись Ольга Лебедевалэн яратонлы сӥзем кылбурез но Можгаысь 1 номеро школаысь Юлия Осиповалэн инкуазь сярысь чуръёсыз, — шуиз Галина Образцова.

Озьы ик та конференциын С. Широбоковлэн кырӟанъёсызъя секция ужаз, кылбурчилэн творчествоезъя конкурс-презентация ортчиз. Писательлэн произведениосызъя лэсьтэм нылпи суредъёсъя конкурслы йылпумъянъёс лэсьтэмын. Конференция йылпумъяське бере Удмурт театрысь артистъёс возьматӥзы С. Широбоковлэсь «Ой, чебер нылъёс» комедизэ.

Тодэ ваёнъёс

Выж лёгет
Та пумиськонын трос тодэ ваёнъёс чузъяськизы. Соосты кылзыса, син азе пуксиз кылбурчи но драматург, кузпал но атай, фронтовик но ӟеч эш Степан Широбоков.
УдГУ-ысь журналистикая факультетысь кафедраен кивалтӥсь, литературовед Александр Шкляев.
— Степан Широбоковен туж трос пол пумиськылӥ, жаль, солэсь вань верамъёссэ гожтыса ӧй кельты. Со мыным Василий Тёркин кадь потылӥз. Степан Павловичлы пересьмемъяз гуртын улыны секытгес луиз, со Иже выжиз. Квартиразы вал Молодёжной ульчаын, укнооссы учкизы бусые. Соослэн выжзы туж кезьыт вылэм. Кылбурчилы Писательёслэн союззы пыр огшорыгес выж лёгет сётӥллям. Огпол тодмоез драматурглы, пе, шуэ: «Степан Павлович, узыр улӥськод, дыр, ковёр вылын ковёр, котыр выж лёгетъёс, адӟоно вал». «Ма, о-о выж лёгетэ вань», — шуэм кылбурчи. Тодмоез учконо кожам. Широбоковъёслэн квартираязы пырем но шуэ, пе: Степан Павлович, кытын-о ковёръёсыд-выж лёгетъёсыд? Кылбурчи сое укно доры нуэм но возьматэм: тӥни отын ӵуж ковёр пиштэ — ӟег вуэ ке, куренез выж лёгетэ — гырем бусы, нош вож буёлоез — кизем юос пушъён дыръя, тӥни кӧня ковёръёсы.

Кушем нимъёс
Степан Широбоковлэн нылыз, англи кылъя дышетӥсь Елена Миронова.
— Со туж умой атай вал, но малы ке монэ удмурт кыллы дышетымтэ. Кык пол кышнояськемез пумысен ке, тросэз тодмо писательёс кӧня ке кышно возьылӥзы, та ласянь мынам атае востэм ай, шуысал мон. Шонерзэ верано ке, со ноку ӧз висъялля нырысетӥ семьязэ но милемыз, кыкетӥ семьязэ. Котьку одӥг кадь яратӥз, кузьым октӥз. Солэн нылпиосыз ми дорысь уг кошкыло вал, мон апайёсыным (нырысетӥ кышноезлэн пиналъёсыныз) туж тупаса улӥмы, соослэн нылпиоссы анайме бабуш гинэ каро вал, малы ке шуоно мемее туж кузязы мынӥз. Атай кулэм бере но ми эшъяськемысь ӧм дугдэ, али но кусыпъёсмы матынэсь. Та ужрадэ апайёсы ӧз бертэ, арлыдзы бадӟым ини, но мон одно ик соослы мадё атайлы сӥзем праздник сярысь.
Атай сярысь трос вераны луоз. Укномы ултӥ котькуд кошкисьлэн кушем нимыз вал. Атай адямиосты урод карон вылысь озьы ӧз даурты, котькудӥзлэсь кыӵе ке сямзэ серемпыр пусйылӥз. Ӧз яраты со коммунистъёсты. Ялан шуылоз вал: ушъясько, ушъясько, нош огшоры калык курадӟыса улэ, нянь басьтыны гинэ кыӵе кузь черодъёсын сылоно. Кивалтӥсьёслэн шекъёссы ик возьматэмын вал «Кузё» пьесаяз но, соин ик сое пуктыны но ӧз лэзе, дыр.

Партбилет

Литературовед Александр Шкляев:
— Степан Широбоков нырысетӥ кышноеныз люкиськиз но кыкетӥзэ кузпалъяськиз. Со вакытъёсы таӵе вамыш понна кылэз зол юазы. Кышнодэ куштӥськод ке, партбилеттэ но ӝӧк вылэ пононо. Но кылбурчи ӧз чигиськы, кивалтӥсьёслэсь сэстэмзэс чидаз. Кыкетӥ кышноеныз туж шудо улӥз, трос гожъяськиз. Кӧня ке аръёс ортчыса, драматург пумиськиз адямиен, кудӥзлэн косэмезъя Широбоковез «миськизы». Со шуиз: «Степан Павлович, юнме асьмеос керетӥм, ойдо, гожты заявление, ми партбилеттэ берыктом». Кылбурчи пумитаз шуиз: Тау, мыным партбилет окопысен сётӥзы, нош тӥ киысь мон сое уг басьты.

Турилэн лобемез
Удмуртиысь культура удысысь дано ужась Алексей Шкляев:
— 1964-тӥ арын Дэбес педучилищее дышетскыны пырыса, эшеным Айбат Коляен патер утчаны кутским. Син шорамы йӧтӥз бадӟым корка, ми отчы пырим. Ӝужыт мугоро кышномурт шуиз: мынам картэ трос ужа, квартирантъёсты ум лэзе, дыр. Висъет сьӧрысь адӟимы: ӝӧк сьӧрын, маке гожъяса, пуке пиосмурт. Ми ӧм валалэ, гожъяськыса пукон — со секыт уж шуыса. Ӵуказеяз та кышномуртэ педучилищеысь адӟим. Историен дышетӥсь Тамара Степановна С. Широбоковлэн кышноез вылэм. Нош Степан Павловичен тодматски ёрос редакциысен. Мон отчы веросъёсме нуллӥсько, куд-огъёссэ печатлало но вал. Тодам лыктэ: нырысетӥ веросэ понна 3 манет гонорар сётӥзы. Со тырмиз ӝыны ар нылашен киное ветлыны. Дышетсконэ бырем бере но Казань университетэ пырыны рекомендация гожтӥз вал Степан Широбоков. Солэн визь-кенешъёсыз, верамъёсыз али ке но пель сьӧрам.
Кылбуръёсыз сярысь верано ке, нырысь ик тодэ лыктэ таӵе чур: «Кӧня пол адӟо на турилэсь лобӟемзэ». 13 аресын та кылбурез лыдӟиськод ке, малпаськод: лирика, нош 60 аресэд ортчем бере валаськод ини, макем мур пуштросэз та кылъёсын. Соос косо кадь котькуд нуналэз дунъяны.

Чорыгаку кылбуран
Тамара но Степан Широбоковъёслэн эшсы Галина Сунцова:
— Степан Павлович — инкуазь адями вал. Ми ваньмы ӵош туж ӵем чорыганы, шыд лым сиыны потамы. Тольёнэ, Чепыке ветлӥмы. Степан Павловичлэн чорыганэз уг удалты ке, визнанзэ ярдуре кельтоз но, киоссэ тыбыр сьӧраз кутыса, ярдур кузя солань-талань ветлоз вал. Ас понназ маке вералоз, утыр киыныз шоналоз, озьы кылбуръёсыз кылдылӥзы.

Галина Семёнова

Удмурт Дунне
By Удмурт Дунне Декабрь 21, 2012 16:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<