Ӟеч но шуныт армия

Удмурт Дунне
By Удмурт Дунне 2 ноября, 2012 07:35

Ӟеч но шуныт армия

В. Зубков визьнода усточи пиналъёсты.

Республикаысьтымы усточи нылпи школа-интернатысь национальной кадръёсты дасян бордын ужась дышетӥсьёс туэ пусъемын Кун премиен. Дунъямъёс пӧлын вань удмуртъёс но: Владимир Зубков, Василий Морозов, Нина Устюгова.

Школа-интернат алигес пусйиз 25 ар тырмонзэ. 1970-тӥ аръёсы удмурт интеллигенция пӧлын вераськонъёс пуромизы: удмурт культуралы пинал специалистъёс кулэ. Ӝужась кизилиос — писательёс, крезьгурчиос, суредаськисьёс —  пыдлось гуртъёсын будо. Соосты огазеяно но визьнодано. Та пумысен уно ӧсъёсы йыгаськылӥз республикамылэн дано муртэз, композитор Г. Корепанов-Камский, Удмуртиысь культура удысысь дано ужасьёс И. Главатских, В. Зубков но трос мукетъёсыз. Таосты кылӥсь луиз. 1987-тӥ арын Удмуртиысь Министръёслэн Кенешсы усточиослы школа-интернат усьтон сярысь постановление кутӥз.

Со гужем ик Культурая министерствоысь специалист Г. Дресвянская гуртъёсы нылпиосты утчаны потӥз. Туннэ школаын будо-ӝужало 11 гуртысь 9-сен 17 аресозь усточиос. Усьтэмын татын инструментъёсын шудонъя, хорын кырӟанъя, суредаськонъя но хореографияя ёзъёс. Дышетскем сяна, нылпиос тодматско Удмуртиысь культура но искусство удысысь дано адямиосын. Асьсэос концертъёс но адӟытонъёс радъяло.

25 ар ӵоже интернат-школа пыр потӥз 307 пинал. 500-лэсь уно данъян грамотаос но дипломъёс вайизы соос, республикаысь, Россиысь но калыккуспо ӵошатсконъёсы пыриськыса. Школа-интернатын дышетскисьёс Удмуртилэсь данзэ утизы Венгриын, Финляндиын, Чехиын, Япониын, США-ын но мукет кунъёсын. Уноез тодон-валанзэс азинтӥзы Санкт-Петербургысь, Казаньысь, Уралысь консерваториосын, художествоя академиосын.
Туннэ школа-интернат туж данъяське аслаз выпускникъёсыныз. Соос пӧлын: Удмурт кун филармонилэн директорез Алексей Фомин, Операя но балетъя театрысь дирижёр Андрей Гордеев, искусствоосъя 6 номеро нылпи школалэн директорез Алексей Захаров, «Арсенал-Бэнд» группаысь духовик Михаил Исаков но мукетъёсыз. Тани кызьы тодазы ваё соос школаын ортчытэм вакытсэс.

Андрей Гордеев:
— Интернатэ монэ кутӥзы 5-тӥ классысен. Атаелэсь адӟем карыса, Пичи Пурга урамъёстӥ арганэн шудыса ветлӥсько вал уго. Ӵыжы-выжыосы оскытӥзы: Ижын котыр ласянь будод, крезьгурез валаны дышод, калыкъёсты паймытъялод. Эх, малпасько, собере культурая юртлэн сцена вылаз но возьматӥськыны возьыт уз луы!

Но школае вуи но, вань мылкыд сӥяз. Монэ воспитательёс но дышетӥсьёс буйгатыны выризы ик:  гуртысь городэ выжеменыд сюлэмыд вузэ, мӧзмонэд ӝоген небӟоз. Но мон воксё мукетыз пумысен бӧрдӥ. Монэ хорын кырӟаны косӥзы. Соку А. Щербаков крезьгурчи милемыз 28 кузя люказ вал. Пӧламы 2 ныл сяна ӧй вал. Осто Инмаре, малпасько, малы монэ татчы лэзизы? Мон арганэн шудонме волято кожасько вал, нош кырӟась луыны ноку ӧй малпалля.

Оло, таин сэрен но нырысь-валысь мылкыдтэк дышетски. Ма, гурт школаын сярысь татын визь люканы секытгес но потӥз. Тодӥсько на: Операя но балетъя театре нуизы, кылзоды, пе, орекстрлэсь шудэмзэ. Оло жуммеменым, оло мӧзмытэныз, кресло вылэ ик умме уси.  Озьы огпол гинэ ӧй вал. Нош туннэ ачим татын ужасько. Туннэ огпол но ӧй жаля на, школа-интернат пыр потӥ шуыса.

Алексей Захаров:
— Иже монэ вайизы Можга ёросысь Бадӟым Сибы гуртысь. Армие сюрем кадь йӧтӥз, ява. Тазалыкмы сярысь сюлмаськыса, физкультураен дышетӥсьёс соку ик ялӥзы: 6 час 30 минутэ ӵукна зарядка лэсьтыны потоно. Тӧлаське-а, уг-а — ӧз учкылэ. Кин комнатаяз ватскыса кыле, сое ӵукна сиёнтэк кельто вал. Зэм, мон огпол но азьтэме вылэ ӧй чӧлскылы. Но чурытэсь куронъёсын сэрен ик пиос но нылъёс йыгмыт кариськизы. Соку ик мон дыши посуда, выж, дӥсь миськыны. Туннэ та ласянь кузпалэлы но куддыр юрттӥсько.

Огшоры предметъёсъя дышетӥсьёсын но туж удалтӥз. Соос валало вал: милям валтӥсь удысмы — крезьгур. Соин ик бере кылисьёсты ноку ӧз тышкаськылэ, «кык» ӧз пуктылэ.

Одӥг учыр тодам лыктэ. Удмурт литературая урок. Кылбур дышетыны косӥзы вал. Нош мон ӧй вутты. Дано Г. Корепанов-Камскийлэн урокъёсыныз «визьтэммылӥ». Со мон понна зэмос авторитет вал. Верамъёссэ кылзыса, ыммы ик усьтӥськылӥз. Хораз сюрымтэос милемлы туж вожъяськылӥзы. Нош ас дораз со кутэ вал тужгес чупресъёссэ гинэ.
Соин ик удмурт литературалы саклыкме дыраз ӧй висъя. Класс азьын дышетӥсь медаз возьдаськыты шуыса, ымы ачиз усьтӥськиз: кылбур интые мынам туннэ тӥледлы чебер гурез кырӟаме потэ. Огзэ гинэ ӧй — витьсэ гурлай!

Михаил Исаков:
— Анай-атайлэсь, шуныт дорлэсь люкиськем пиос но нылъёс огпол гинэ мӧзмыса ӧз бӧрдылэ. Соку пичиесь комнатаосын ӧм улэ. Вань пиос огазьын одӥг висъетын, мукетаз — нылъёс. Тыл кысэ ке, амалтэк выдоно ни. Куд-огез шобрет улын викышъялляз, куд-огез ӧз чидалля — гуртаз берытскылӥз.

Куинь ар школа-интернатын дышетскеме бере мынам но Алнаш пала бертыны мылкыды кылдылӥз. Но анае чурыт вераз: нырысетӥ араз куриськысалыд ке, лэзьысал, нош али дышетскондэ йылпумъя ни. Озьы нырысь баритонэн шудыны дышетски, собере тромбонэн. Со дыре ик капеллаын кырӟай.

Школа юрттӥз мыным возьдаськон сямылэсь куштӥськыны. Татын басьтэм тодон-валанэ туж зол юрттӥз Казаньысь крезьгуръя консерваториын дышетскыны.

Елена Сараматова

Туспуктӥз Владимир Беломорских

Удмурт Дунне
By Удмурт Дунне 2 ноября, 2012 07:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<