Зарнивуам киросъёс люкалозы ай калыкез…

Удмурт Дунне
By Удмурт Дунне Ноябрь 27, 2012 11:48
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Зарнивуам киросъёс люкалозы ай калыкез…

Кез ёросысь Тортымысь черклэн вашкала тусыз

Малпаськонэ уськытӥз газетысь 12-тӥ коньывуонэ потэм ивор. Отын вераськон мынэ Кез ёросысь Тортым гуртысь Инмармумылы сӥзем храм сярысь. Туспуктэмысь адӟиське: куать черк йылъёс пӧлысь кыказ киросэз ӧвӧл.

Ог кызё ар талэсь азьло та гуртэ вуылэме вань шаертодонъя экскурсиен. Храмлы матын улӥсь мӧйы кышномуртлэсь соку трос паймымонзэ тодӥм. Киросъёсты, пе, 1980-тӥ аръёсы куяны косӥллям, храме егитъёслы клуб усьтоно шуыса. Черк йылэ тубем мурт кыкетӥзэ киросэз куштэм но, ачиз но усем. Ярам, пыдыз гинэ чигем.

— Инмар тазьы адӟытӥз сокем бадӟым сьӧлыке понна, — кайгырем воргорон. Со дырысен нокин но дӥсьтымтэ ни косъяськыны но, черк вылэ тубыны но.

Ӧсъёс ваменпуэн гинэ пытсамын вал. Сое усьтыса, черклэн пушказ но пырам. Син азе соку ик сюризы борддоре пыкъям кык киросъёс. Кылзӥськыса сыло кадь, кызьы пильылэм укноостӥ тӧл поръя, пась липет пыр зор шапык усьылэ.

1991-тӥ арын тупатъян ужъёс борды басьтӥськиллям Меньшиковъёс, Тортымысь Киров улосэ кошкемъёс. Но кунмы секыт вакытъёсы зымыса, татын но лэсьтӥськон дугдӥз. Улӟыны кутскем храм нош ик куштӥськем тусо луиз. Куакаос гинэ котыртӥз каргето. Нош палэнысь вуэмъёс утчасько, бугыръясько пушказ но, котыраз но. Храмез эскерись песянай шоры киосынызы гинэ шонто, сьӧлык шуэмезлы пумит мыскылляса горо.

1866-тӥ-1913-тӥ аръёсы храмлэн юртэз пулэсь вал. Выльзэ ӝутӥзы горд кирпичъёслэсь. Соосты та гуртын ик шуккизы, гурын ӟырдатӥзы. Приходэ пырись 28 гуртын улӥсьёс юрттӥськизы коньдонэн но, курегпузэн но. Курегпуз мынӥз кирпичъёсты тырон сурет лэсьтонэ. Сюлмазы Инмарлы юн осконэн улӥсьёслэн тыршемзы синмаськымон пӧрмиз.

Храм ӝутӥськиз вить йыло, куатетӥез — гырлы кокан вадьсын. Соосты чагыр инбам тусо буязы, липетсэ — тулыс ӝужась ожо кадь, дуннелэн ньыль палаз ик учкись укноосты — тӧдьыен. Зарнивуам куать киросъёс инбамын воректӥзы, трос иськемъёсы адӟиськымон луизы, калыкез доразы кыскизы кадь. Вань гуртъёсы кылӥськылӥз гырлыослэн шулдыр шудэмзы. Шумпотон-куректон вакытъёсы гуртоос татчы лыктылӥзы, сюсьтылъёс пуктылӥзы, баӵкоен ӵош чирдӥзы-вӧсяськизы. Храмысь потылӥзы выль кужымен, юнмам мылкыдын, чебер лулпушен. Та ик юрттылӥз азьлань улоназы.

Но 1936-тӥ арын храмез пытсазы, колхозэн выль улонлы уг тупа шуизы. Котькытын сямен ик, тазэ но черкез сэрттыны косӥллям. Нош гуртоос пумит ӝутскиллям — кинлэн Инмармумылэсь такем чебер юртсэ куашкатыны сётэмез потоз? Озьы юрт интыяз ик кылиз.

Интылы ёрмыса, татын ю тысь но возизы. Лушкаськыны вӧсяськон интые нокин ӧз пыра — сьӧлык. Алтарь вадьсысь Инмар мудоръёс куямын ни ке но вал, калык лушкем вӧсяськыны ветлӥз храмлэн саюлаз. 1941-тӥ арын но пиосъёс ваньзы сямен ик татын сылӥзы сюсьтылъёсын. Луло бертон курылӥзы Инмармумылэсь. Но тросэз ӧз берытске. Озьы ке но храмзы ӧз кушты соосты — ож бусыын быремъёслэн лулъёссы бертӥзы киросъёс пыр.
Ми ветлыку, мудоръёс ӧй вал ни. Кытчы ышиллям — нокин уг тоды. Йӧназлы вылымтэ со: калык но кошкыны кутскиз гуртысь. 130 аръем школа но пытсаськиз. Кӧня ке дасо корка кылиз на.

Но быронлы пумит котьку ӝутӥське оскон. Тортым школаысь дышетӥсь Сергей  Миронов юрттӥсьёсыныз Кезэ черк ӝутӥз. Баӵкоез — отец Сергий. Татын сяна, со служба нуэ Тортымысь черкын но. Та гуртысь куке но кошкемъёслэн нылпиоссы кузпалъяськон кыл куто Инмармумылэн храмысьтыз мудоръёс азьын, басьто причастие, пересьёссылэсь кибервылзэс утьымтэзы понна сьӧлыкъёссэс куштыны куро. Сергий баӵко шумпотэ Тортыме ӧтисьёслы, кыдёкын ке но Кезлэсь, одно ик дыр шедьтэ. Липет, укноос ке но пасесь — ӵок.

Черкез улӟытон мылкыдын гомӟемын та ёросысь ик Кузьма гуртысь дышетӥсь Нина Хохрякова. 2008-тӥ арын «Истоки» волонтёр отряд кылдытыса, котькуд гужем вуыло Тортыме. Озьы нылпиослы пыӵало инкуазез гажан, шаердэ тодон, вашкалазэ утён сям.

Храмез утён вылысь Нина Хохрякова вазиське огшоры калыклы, кивалтӥсьёслы. Интыысь но ёрос администрациысь кивалтӥсьёс маин быгато, юрттӥсько. Озьы пиналъёс выльдӥзы храмлэн азбарысьтыз синпелетэз, сӥземын со Граждан ожын быремъёслы. Черкез кенерен котыртӥзы, буязы. Отчы табере пыд ачиз коже — сокем шулдыр но учкымон луиз та инты.

Но таин Нина Ивановна уг буйга: лэсьтымтэ на липет.
— Сое выльдыны луысал ке, зор-кот но ӧй сюрысал пушказ. Одӥг люкетаз музей усьтысалмы, мукетаз служба нуысалзы, — вера со. — Ёросысь но, сьӧрлось но калык вуылысал соку храме.

Нина Ивановна гожтэтъёсын вазиськылӥз ни  Кун Думаысь депутатлы В. Шудеговлы (вордскемын со Тортымын), Культурая, печатья но иворъёсъя, Дышетонъя но наукая министерствоосы, Москваысь патриархие, Ижысь епархие. Котькудӥзлэсь вуизы сюлмаськемез понна тау карон кылъёс, нош зэмос юрттэт — ӧз. Ог-огзы вылэ чӧлско, лэся. Ижысь епархия гинэ но шуэ: пытсам храм кунлэн ваньбурез луэ, со ик мед юрттоз. Черкез историяя синпелетэ но пыртыны дыртӥсь ӧвӧл. Та уж борды нокин но уг басьтӥськы.

Иське, храмез утён та кышномурт но огшоры калык вылэ кыле. Но соослэн гинэ коньдонзы уз тырмы ук тупатъян ужлы!

Оскон быре ке, лулчеберет но бездэ. Калык пашме, пазьгиське кузётэм уллё музэн. Выльысь сое люканы туж секыт. Сое асьме выламы шӧдӥськом ни. Улонамы курадӟонъёс пыр мырдэм валаны кутскиськом ни осконлэсь огазеясь кужымзэ.

Та пумысь вераме потэ Кияса ёросысь Данилово гуртысь Никольской черк сярысь. Вылыз но, пушкыз но солэн шимес таркамын вал. Нош Анатолий Липин бызьылэмъя 1991-тӥ арын сое усьтӥзы. Зарнивуам киросъёсыныз, гырлы куараеныз черк сайкатэ ни калыкез, люка котыраз.

Валерий Баймурзин

Удмурт Дунне
By Удмурт Дунне Ноябрь 27, 2012 11:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<