Юра тодматскиз Ленаен

Удмурт Дунне
By Удмурт Дунне 27 ноября, 2012 11:48

Юра тодматскиз Ленаен

Тодматсконлы сӥзем конкурс

«Удмурт дунне» но «Мылысь-кыдысь» юртто… семья кылдытыны!

«Удмурт дунне» газетысь «Тодматскон сэреглы» туэ 25 ар тырмиз. Огназы кылем нылкышноослы но пиосмуртъёслы ог-огзэс газет пыр шедьтон борды 1987-тӥ арын басьтӥськиз журналист но писатель Римма Лаптева.

Римма Серафимовнаез таӵе малпанэ ӝутказ Ижысь «Металлург» культура юртын со аръёсы усьтӥськем тодматскон салон. Палтуриослэн ялонъёссы соку печатласькизы «Советской Удмуртия» газетысь «Семья» бамын. Огдырлы вис карылыса, «Палтури» сэрег выльысь улӟиз семьялы но нылкышноослы сӥзем «Наталь» бамын, отӥяз со мукет бамъёсы вамыштӥз.

Берло кызь аръёсты верано ке, «Тодматскон сэреге» 800-лэсь ятыр ялон печатламын. Нош кӧня мурт вазиськиз, соиныз яке таиныз абонентэн тодматыны курыса, соиз сярысь вераны ик шугъяськоно. Ум тодӥське газет юрттэмъя кӧня семья кылдэм сярысь но. Ог-огзэс шедьтэмъёсты олокызьы но гочатыны вырылӥм, таяз учыре соосын тодматскыны мылкыд карыса. Вазиськизы Шаркан ёросысь Мувыр сельсоветэ пырись гуртъёсын улӥсьёс.

2001-тӥ арын Кулак-Кучес гуртысь культура юртын ужасьёсын ӵош ортчытӥмы газет пыр тодматскемъёсын пумиськон ужрад. Сое радъяны юрттӥзы Шаркан ёрос администрация но Шарканысь керттӥськон фабрика. Клуб тыр люкаськем калыклы ньыль семья ас быгатонлыкъёссэ возьматӥз. Аръёс ортчыса, выльысь тодэм потӥз та семьяос сярысь.
Галина Воронцова газет юрттэмъя Дэбес ёросысь бызиз Кусогуртэ, кӧня ке аръёс ӵоже кивалтӥз колхозэн. Кык нылпиез вал ни, кузпалэныз Виталий Венедиктовичен кыкто ныл вордӥзы. Нылъёссы та дыре дышетско Чайковский городын, Анфиса — суредасе, Лиза — англи кылъя дышетӥсе.

— Ньыль семья пӧлысь кыкез ӵош кылиз. Кык Галяос кузпалъёсынызы тупаса уло, Тоняос люкиськизы, — шуэ Галина Михайловна. — Галина Широбокова Юра кузпалэныз улэ Кулак-Кучесын. Со Шарканэ вуиз Балезино ёросысь, одӥг нылпиез вал ни, эшшо кык пиналзы вордӥськиз.

Ма, редакциын ужасьёс пӧлын но газетмы пыр тодматскем кык семья вань: Валентина но Николай Емельяновъёс, Ольга Корепанова но Николай Васильев. Соин но мыло-кыдо басьтӥським «Мылысь-кыдысь» телепрограммаез радъясьёсын ӵош «Тодматскон дунне» ужрад ортчытыны. Таяз учыре но, Ижысь сяна, «Удмуртия» кинотеатрлэн юртаз пӧртэм ёросъёсын улӥсьёс вуиллям.

Ӝыт тодматсконэн герӟамын вал бере, «удмурт дуннеос» люкаськемъёсты «гордъёслы», «вожъёслы» но «тӧдьыослы» люкизы, гадязы буёл тодметъёс бырттыса. Горд возьматэ кузпалъяськемез, вож — огнын луэмез, нош тӧдьы буёлъёсын тодматскыны яра. Залын тросгес вал нырысетӥосыз но кыкетӥосыз. Но 230 пала люкаськемъёс пӧлын 30 ке но воргорон вал меда? Соос но ӝыныезлэсь тросэз кузпалъяськемын яке тодмоосынызы лыктэмын.

Озьы ке но шулдыръяськон удалтӥз. Пӧртэм конкурсъёс, шудонъёс радъямын вал, калык эктӥз, кырӟаз. Люкаськемъёсты шулдыртӥз Геннадий Ганьков, ӧтемын вал Якшур-Бӧдьяысь «Туривесь» фольклор ансамбль но маскарчи Ирина Эсенкулова.

Анна Федотоваен но Валерий Сидоровен ӵош калыкез гомӟытъязы «удмурт дуннеос». Юан-веранъёслы валэктонъёс сётӥз сексолог Анатолий Бубин. Озьы куд-огезлэн палтуриослэн ог-огзы пала сюлэмъёссы кыстӥськизы. Нош ог-огенызы матэгес тодматскемъёс кузьым но басьтӥзы.

Ижын улӥсь Юрий Колесников та ӝытэ нырысьсэ лыктэм, юри тодматскыны шуыса. Нош Ижысь ик Елена Охотникова «мылысь-кыдысьёсын» кемалась эшъяське, но нырысьсэ, пе, тодматскыны кылдӥз. Кин тодэ, оло, ог-огмылы зэмзэ ик тупалом, шуо Ленаен Юра. Та љытысь соос џошен кошкизы.

Лия Малых

Туспуктӥз Владимир Беломорских

Удмурт Дунне
By Удмурт Дунне 27 ноября, 2012 11:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<