Юан-веран. Анайёслы дэмланъёс

Удмурт Дунне
By Удмурт Дунне 27 ноября, 2012 08:15

Юан-веран. Анайёслы дэмланъёс

Кытчы вазиськоно висись нылпиеным?
Кытын но кызьы эскеро покчи нылпиосты, инвалид группа сётон пумысен?
Осотова И.
Иж город.

Валэктэ Удмурт Республикаысь Медико-социальной экспертизая бюроысь валтӥсь эксперт Екатерина Мухаметгалеева.

Нылпилэсь инвалид луэмзэ эскере МСЭ-ысь педиатрияя бюро, интыяськемын со Ижысь Свердлов урамысь 22 номеро юртэ. Экспертизаез ортчыны висись яке сӧсыр пиналэз келя эмъясь учреждение, дася экспертизалы кулэ луись справкаос но документъёс.

Нылпиос понна юртамы висъямын нимысьтыз сэрег. Пиналъёсты эскерон ортче шудон сямен. Соосты чаклало, юрттэт сёто психологъёс, социальной педагогъёс. Арлыдоосын ӵошатыса, пиналъёслэсь ужаны быгатонлыкъёссэс уг чаклало, эскеро аслаз арлыдызъя мар карыны быгатэмзэ но тазалыксэ.
Пиналлы инвалид группа сётӥське одӥг, кык арлы яке дас тямыс арес тырмытозяз.

Анай капитал — куинетӥ пинал понна?

Анай капиталэз ӝоген тыремысь дугдозы, шуо. Зэм ик-а?
Ирина Н.
Иж город.
Валэктэ Удмурт Правительствоысь Семья ужпумъёсъя но демография политикая комитетлэн кивалтӥсез Ольга Лубнина.

Кык но солэсь тросгес нылпи вордэм нылкышноослы юрттон вылысь, 2007-тӥ арысен кутскыса ни, тыриське анай капитал. Туннэ солэн быдӟалаез 387 сюрс 640 манет луэ. 2013-тӥ арын 1-тӥ январьысен будоз 408 сюрс 900 манетозь. Нялтас тодады вайытом: сое кутыны луэ нылпиосты дышетонэ, улон интыез паськытатонэ яке анайлэсь пенсизэ будэтонэ.

Зэмен но, та программа пумтэм-йылтэм, оло, уз но луы. Туннэ тодмо: 2016-тӥ арозь кыстӥськоз на. Вераськонъёс вань, отӥяз отчы воштонъёс пыртэмын луозы шуыса. Кылсярысь, кыкетӥ нуны ваем понна со уз висъяськы ни, сётӥськоз куинетӥзэ но солэсь троссэгес пинал вордэмъёслы.

Быгато-а пенсие вазьгес потыны?

Вордӥ но будэтӥ куинь пинал. 2009-тӥ арын ноябре вордыны басьтӥ тылпуын сутскыса бырем сузэрелэсь огназы кылем куинь нылпиоссэ. Бадӟымез дышетске техникумын, Ваня — 4-тӥ классын, Даша — 3-тӥ классын. Ваня сутскыса инвалид кылиз. Трос нылпиё анайёс радын пенсие дырызлэсь вазьгес потыны быгатӥсько-а? Туэ сӥзьыл мыным тырмиз 50 арес.
Галина Домнина.
Пичи Пурга ёрос.
Валэктэ Россиысь Пенсиосъя фондлэн Удмурт ёзэзлэн кивалтӥсезлэн воштӥсез Светлана Адаева.

«Россия Федерациысь пенсиос сярысь» 2001-тӥ арын 17-тӥ декабре юнматэм 173 номеро федеральной законысь 28 номеро статьяя вить но солэсь тросгес нылпи вордэм но соосты 8 арескозь будэтэм нылкышноослэн, 50 арес тырмыса, луонлыксы вань дырызлэсь вазь пенсие потыны. Пенсия басьтон понна ужам стажзы 15 арлэсь ӧжыт луыны кулэ ӧвӧл.

Нош пиналысен инвалидъёслэн но пинал инвалидъёслэн опекунъёссылы, нылпиез 8 арескозь будэто ке, вылӥ верам законысь 7 номеро статьяя, ужъя пенсизэс лыдъяку, пенсие потон арлыдзы кулэстӥське: нылпиез котькуд одӥг ар но куать толэзь утялтэм-вордэм понна — одӥг арлы. Но вить арлэсь трослы кулэстыны уг луы. Со понна нылкышнолэн ужам стажез 15 арлэсь, пиосмуртлэн 20 арлэсь ӧжыт луыны кулэ ӧвӧл.

Вылӥ верам куронъёсты лыдэ басьтоно ке, Г. А. Домниналэн трос нылпиё анайёслэн музэн 50 арескысен пенсие потыны луонлыкез ӧвӧл. Соин ӵош ик, инвалид нылпилэн опекунэз луыса сое тямыс арескозь будэтӥз ке, озьы ик 15 ар ужам стажез вань ке, пенсие вазьгес потон сярысь юалляськыны быгатоз.

Пусйыны кулэ, мурт пиналъёсты тямыс арескозь будэтэм ӵоша ас вордэм нылпиосты утялтонэн, озьыен, куинь но солэсь трос пинал будэтӥсьёс трос нылпиё анайёс пӧлы пыро.

Инвалид пиналлэн опекунэз луыса дырызлэсь вазь пенсие потон ужпумъя Г. А. Домниналы вазиськоно Россиысь Пенсиосъя фондлэн Пичи Пурга ёросысь управленияз. Сьӧре кутоно опекун луэм сярысь документъёсты.

Удмурт Дунне
By Удмурт Дунне 27 ноября, 2012 08:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<