Йыруллань лобан

Удмурт Дунне
By Удмурт Дунне 28 ноября, 2012 12:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Йыруллань лобан

Барселонаысь Мила корка

Выль арозь кема ик дыр ӧз кыльы. Котькуд адями ортчем арезлы йылпумъянъёс лэсьтэ, вунонтэм но тунсыко учыръёссэ тодаз вае. Тани, кылсярысь, «порозмафи» Дима Софронов котькуд ар пӧртэм шаеръёсын шутэтске. Туэ гужем Испание вуылӥз. Мае адӟиз, малы паймиз, пыр-почгес тодом.

— Кыӵе кунъёсы вуылыны кылдӥз ни?

— Ушъяськыны сокем уг быгатӥськы: Египет, Турция, Китай, Израиль, Куба но Испания. Котькудӥзлэн аслаз паймымон интыосыз. Китайын лулчеберет азинске, Турциын шутэтскыны умой, куноослы лумбыт пӧртэм ужрадъёс, шудонъёс ортчо. Китайын омырзы мускыт, ӵем зоре, нош Египетын зоръёс воксё ӧвӧл…

— Кунгож сьӧры ӵем потаськод бере, англи кылэз умой тодӥськод, дыр?

— Зэмзэ ке верано, англи кылэз ӟеч уг тодӥськы. Кунгож сьӧрын но удмурт сямен вераськисько, пӧлаз куд-ог кунгожсьќр кылъёс пыртылыса. Кылсярысь, Испаниын удмурт кылын вераськи, кӧня ке испан кылъёсты кутыса (англи кылэз отын умой уг тодо). Верамме уг ке валало, выросъёсын адӟытӥсько.

— Малы нош Испаниез бырйид?

— Семьяямы кивалтӥсь — выны Лёшик. Кытчы вералоз, отчы ик мынӥськом. Туэ солэн йыраз шуккиз: Испание вуоно. Выны футболэн тунсыкъяське. Дуннеысь футболъя чемпионатын Испания нырысетӥ интые потӥз. Лёшамылэн чемпионъёс доры вуылэмез потӥз.

— Мар Испаниын тужгес тунсыко потӥз?

— Испаниын вылысьтыз вылаз курорт городокъёс. Одӥгаз ми но интыяськимы. Ӵемысь соосты висъяны секыт, угось быдӟалазыя одӥг кадесьгес. Барселона город дорысь 50 иськемын улӥмы, экскурсиен городэ вуылӥмы.

Экскурсоводмы мултэс трос вераськиз. Зулемысьтыз ваньзэ пелям ӧй поны, йырам кылизы Антонио Гауди архитекторлэн ужъёсыз. Солэн пуктэм юртъёсыз аспӧртэмлыкоесь, паймымонэсь. Одӥгез соос пӧлысь — Мила корка, солэн одӥг сэрегез но ӧвӧл.

Авентура парке вуылӥм — та быдэс дуннеысь одӥгез бадӟым шулдыръяськон инты. Калыкез трос, улмолы но усьыны интыез ӧвӧл. Кудаз ке шулдыръяськонэ шедён понна кузь черодын сылоно. Парклэн быдӟалаез 117 иськем. Мыныса-мыныса пумозяз вуоно ӧвӧл. Со вить ёзлы люкемын: Мексика, Китай, Полинезия, Средиземноморье но Дикий Запад. Пӧртэм шаеръёсы, вакытъёсы вуылэм кадь потӥ. Покчиослы но, бадӟымъёслы но мӧзмыт ӧвӧл отын.

— Меӵ гурезьёс кузя бен ворттылӥд-а?

— Ӝыны минутлы аттракционэ шедён понна кык час черодын сылӥмы. Дырмес ӧм жалялэ — американской горкаостӥ ворттылон кемалы тодэ кылёз. Йыруллань лобамы. Быдэс улон син азьтӥ ортчиз кадь. Ӝытъёсы ты дорын чебер, яркыт адӟытонъёс: водопад, светомузыка, ву вылын ӝуась тылъёс, крезьгур, эктӥсьёс… Олимпиадае вуылэм кадь потӥ. Кемалы вунонтэм кылёзы та нуналъёс.

— Кыӵе синпель кузьымъёс вайид?

— Котькытысь вайисько… кружка. Таяз «Испания» гожтэмын. Быдэс ар мон со кружкаысь гинэ чай юисько. Сувениръёс но магнитикъёс вайи на.

— Вуоно аре кытысь кружка басьтод ни?

— Сое вынылэсь юано. Мынам аслам экзотической палъёсы, экваторлы матэгес ветлэме потэ. Европае вуылӥ, вуоноез пумиськон мукет шӧмо мед луысал, оло, Таиланд палъёсы шонтоно.

Мария Золотарёва

Удмурт Дунне
By Удмурт Дунне 28 ноября, 2012 12:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<