Выль улон

Удмурт Дунне
By Удмурт Дунне Ноябрь 30, 2012 14:13
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Выль улон

Черламъёс уката трос уйпал ёросъёсын — Глазов, Яр, Балезино котырын

1-тӥ декабре быдэс дунне пусъе СПИД-эн нюръяськон нуналэз. Тани 30 арлэсь кема ни та чер кузёяськыны выре. Дуннеысь ог 7 сюрс пала адями арлы быдэ солэн вотэсаз шеде.

Шаерамы та вакытлы 5 но ӝыны сюрс ВИЧ-инфекция паласькемъёс. Трос-а со? Лыдэ басьтоно ке, та висёнлэн вотэсаз шедем адями быдэс улонзэ эмъясьёс дорын эскериськыса ортчытоз шуыса — ӧжыт ӧвӧл. Нош тазалыксэ чакласьтэм муртлэн висёнэз вакчи дыр куспын выжыны быгатэ СПИД-э, мугорызлэн висёнъёсын нюръяськон кужымез быре.

Кызьы вераз республикаысьтымы СПИД-эн нюръяськонъя центрлэн валтӥсь врачез Олег Горбунов, туннэ нуналлы шаерысьтымы 1 сюрс 287 мурт нуналлы быдэ эмъюмъёс, уколъёс басьяно луэ — антиретровирусной терапия ортчытӥське. Сотэк таослэн улонзы куспетӥ чигиськыны быгатоз. Ӵошатон понна: 2006-тӥ арын таӵеос 18 кузя вал.

Черламъёс уката трос уйпал ёросъёсын — Глазов, Яр, Балезино котырын. Специалистъёс тае герӟало со ёросъёстӥ паськыт чугун сюреслэн ортчеменыз. Берло дыре туж сюлмаськытэ Вотка ёросын югдур. Туэ 10 толэзь куспын гинэ тодмо луизы 54 выль висисьёс. Каракулино ёросын кылем арын одӥг мурт но ӧз черла ке, туэ 5-езлы кышкыт диагноз пуктэмын ни. Мукет ёросъёсын югдур огсыр. Но ВИЧ-инфекцитэм интыос республикаямы кыльымтэ ни.

Эшшо: вазен шуиськом вал, ВИЧ-инфекция чырмыт вӧлме наркотикъёс пыр. Угось ог 80-90 процентэз ВИЧ-инфицированнойёс шузимытӥсь суретъёсын кушласькылӥзы. Туннэ югдур тодмантэм воштӥське. Дуннеын ог 80-85 процентэз висёнзэс шедьто нылкышноослэн но воргоронъёслэн матысь кусыпъёссы пыр. Республикаямы та лыдпус ог 50 процент котырын возиське. Озьы шуге-леке вуо чик янгыштэм адямиос.

— Кунмы ӟеч вала: ВИЧ/СПИД-эн нюръяськон — огъя ужпум, — пусъе Олег Борисович. — Соин ик «Тазалык» нацпроект чотын арысь аре уногес коньдон висъяське та черен нюръяськонлы. Озьы туэ шаерамы ог 15 миллион манет лыктӥз пӧртэм тӥрлык басьтонлы. Эшшо 120 миллион манет тыр вуизы эмъюмъёс. Озьы ВИЧ-инфекциен черламъёсты кун дунтэк йӧнатэ.

Жаляса верано: адямиос пӧртэмесь. Одӥгъёссэ кышкыт диагноз но уг кышкаты. ВИЧ-инфекция паласькем сярысь тодыса но, соос асьсэды уг чаклало. Уг жаляло мукетъёссэ но: туннэ соиныз, ӵуказе мукетыныз дусымъясько — висёнэз вӧлмыто. Мукетъёсыз ас пушказы выё, кыре-буре потамысь дугдо. Соосызлы но, таосызлы но специалистъёс вазисько: эсэпсэ валано. ВИЧ-инфекциез улон быронэн ӵошатыны уг яра на.

Выль сямен улыны дышетсконо, котькуд нуналлэсь чеберзэ адӟоно! Медицина азьлань вамыштэ, тодосчиос вирусэз вормон амалъёс утчало. Дышимы ни ук: ВИЧ-инфекция паласькем анай таза нуны вайыны быгатэ. Шуом, республикаямы черлам нылкышноослэсь 817 пинал вордскиз, 102-ез туэ 10 толэзь куспын.

Нялтас вераса, алигес Санкт-Петербургын ортчиз ВИЧ/СПИД ужпумъёслы сӥзем калыккуспо конференция. Шаерысьтымы СПИД-эн нюръяськонъя центр отын нимысьтыз пусъемын «ВИЧ-инфекция но анай луыны дасяськон» программая тыро-пыдо ужамез понна.

Элина Кумачёва

Та нуналъёсы шаерысьтымы СПИД-эн нюръяськонъя центрысь специалистъёс егитъёсын пумиськонъёс ортчытъяло.
Соослэн сюлэмшугъясь-кытӥсь юанъёссылы валэктонъёс сётъяло. Кыӵеесь но соос ӧвӧл!

Сюлмаськытэ мукетыз: егитъёс пӧлысь тросэз малпало, мон наркотикъёсын уг кушласькиськы, дусым уг возиськы, иське, ВИЧ-инфекция мыным кышкыт ӧвӧл. Жаляса верано, улонын котьма но луэ.

Ку ӝегатскытэк эскериськоно ВИЧ-лы?
—  тодӥськоды ке, музиды черламын шуыса;
— ВИЧ-инфекция паласькем муртлы укол пуктӥды, вирзэ басьтӥды, асьтэос но бышкалскыны шедьтӥды ке;
—  наркоманэн жугиськиды, шуккиськыны шедиды ке;
— сантэмазы ке.

Туж умой луоз, СПИД-эн нюръяськонъя центре, кык час ортчытозь, вазиськиды ке.  Таӵе дыръя висёнэз каньылэн алыны луэ. Бен, юрттыны, оло, луоз на, куинь сутка ортчытозь но. Та дыр ортчиз ке, эмъюмъёслэн пайдазы уг луы ни.

Со сяна, сак кариськоно кык-куинь нунал мугорды ӟырда-куалекъя, тӧдьы вирсэръёсты (лимфоузел) тӧрнамын, кема дыр ӵоже кӧтты виямысь уг дугды ке — тазьы шӧдӥськыны быгатоз ВИЧ-инфекция.

СПИД центрын эскериськем понна дун уг басьто.

Удмурт Дунне
By Удмурт Дунне Ноябрь 30, 2012 14:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<