Вазь шуд?

Удмурт Дунне
By Удмурт Дунне 28 ноября, 2012 11:56

Вазь шуд?

Вазь кузпалъяськон. Умой-а со, урод-а? Психологъёс верамъя, котькуд учырлэн ӟеч но, урод палыз но луэ.

Куд-ог эшъёсы, школаын дышетскыкузы ик, бызизы. Табере соос кышноос, анайёс. Пумиськыкумы ӵош дышетскем эше серекъя: мон бызи, мынам ваньмыз вань ни — картэ, пие но нылы, уже, ӝоген вылӥ образование басьто. Ваньмыз усто. Анай капитал сётӥзы ке, машина басьтом.

Нош мон тодӥсько: 20 аресъем эше, картсэ алдаса, клубе поталля. Кузпалыз но озьы ик. Валамон, ог-огзылэсь ӝытъёсы пегамзы уродъяськонэ вуттэ. Но таиз сярысь эше уг вера. Малпа, вылды: котькуд семьяын ченгешонъёс кылдыло.

Но мон солы чик уг вожъяськиськы. Эше ӧз улы студентлэн улонэныз, ӧз тодматскы тунсыко адямиосын, кӧтыз тырымон ӧз ветлы позыръяськонъёсы, уй клубъёсы, ӧз пота кунгож сьӧры, ӧз пыриськы пӧртэм конференциосы, вунонтэм практикаосы… Озьыен, малпаськоно на, кин маин ушъяськыны кулэ…

* * *
Но ваньмызлэн улонэз огкадь уг мыны. Алигес тодматски Нижний Новгородысь Настя нимо нылашен. Анай-атаез сярысь веракуз, мон пайми, соос туж егитэсь на: 37 но 39 арес, Настялы — 20 арес. Нылаш верамъя, анай-атаез школаын ӵош дышетскемын. Анаез школазэ йылпумъям гинэ, гажанэныз соку ик загсэ вамыштӥллям. Огзылэн но анай-атайзы пумит луиллямтэ, асьтэлы улоно, шуиллям. Ар ортчыса, вордӥськем Настя, 3 арлы бергес — Вика сузэрез. Секыт ик вылэм егит семьялы: 19 аресъем атай огвакытэ кык интыын ужам, заочно амалэн дышетскем. Кузпалыз бергес вылӥ дышетсконние пырем. Шӧдӥське, та семьяын шуд пачыла, пӧяськонлы отын инты ӧвӧл. Настя шуэ: бызьыны малпай ке, алӥсь уз луы.

Школаын дышетскыкум ай, паймыса чаклай, кызьы одӥгез сьӧры мукетыз 10-тӥ-11-тӥ классъёсын дышетскись нылъёс семья кылдытъяны ӧдъязы. 16-17 аресын кузпалъяськон модае пыриз кадь. 11-тӥ классэз йылпумъякузы, куд-огезлэн нылпиоссылы ӝыны арес вал ни! Али кӧняез ке гинэ на картэныз улэ.

Тани одӥгез эше, педколледже пырыса вуттӥз-а, ӧз-а, синмаськиз, бызиз, анай-атаез туж пумит ке но вал. Ар ортчыса, пинал вайиз. Ярам ай, нылыныз анай-атаез пукизы — дышетсконзэ кызьы но озьы йылпумъяз. Нош собере люкиськон сярысь малпаськыны кутскиз. Картэз угось ӵем юэ, кизэ но вуттылэ. Но кытчы нылаш мыноз пичи нылпиен? Ужез но ӧвӧл, улон интыез но, дышетскемез но пичи. Анай-атаез доры бертысал, дыр, но, дӥсьтонэз уз тырмы, возьыт потэ. Отын но умой уже интыяськыны уз быгаты: гуртын сокем ёрмо шат кунсьӧр кылъя дышетӥсьёслы?

Психологъёс но дыше-тӥсьёс, егитъёслэсь вазь кузпалъяськемзэс санэ басьтыса, та ужпумез ӵемысь ӝутылыны кутскизы. Но нырысь ик валано, кыӵе кузпалъяськонэз вазь шуыны луэ. Азьвыл таӵеен нимазы 18 арессэс тырмытымтэ нылпиослэсь огазе кариськемзэс. Со понна одно ик пӧртэм документъёс бичано луылӥз. Али 18-20 аресын кузпалъяськемез но вазь шуо ни.

Куд-ог анай-атайёс быдэ вуэм нылпиоссэс но загсэ мынонлэсь ало. Пӧртэм мугъёс шедьто: дышетскондэ йылпумъяно, ӵош улонлы тон дась ӧвӧл на…

Социологъёс пусъё, туала егит семьяос лябесь. Тросэз семья кылдыто, анай-атайзылы ӧч карыса, бадӟымъёслэсь пегӟыса. Но та вамышлы дась уг луо на. Соин ик сюан ортчем бере люкиськон сярысь малпасько.

Вань сыӵе но егитъёс: азьвыл туганъёссэс вӧсь карон понна бызьыны дырто.

* * *
Наташа тодмое, школазэ йылпумъяса, университетэ пыриз. Нырысь семестрзэ но пумозяз ӧз вутты, бадӟым яратонэзлы луыса ваньзэ куштӥз но пияшез доры улыны кошкиз: таид гуртын ужа вал. Анай-атаез нылзэс отчислить каремзы сярысь телефон пыр гинэ тодӥзы. Со нуналэ ик нылзэс шедьтӥллям но доразы вайиллям. Но Наташа берен яратонэз доры пегӟем. Fнай-атаез нырысь керӟегъяськиллям, тышкаськиллям, собере «аслад улонэд, ачид ул» шуыса, киынызы шонтӥллям. Наташа бызиз, али гуртысьтызы магазинын ужа, заочно дышетске. Синъёсыз шудоесь кадь…

Нош мар ӵекто психологъёс анай-атайёслы, нылпиоссы вазь кузпалъяськыны малпазы ке:
— нырысь ик, шумпотоно, регистрация дорозь ваньзэ тодӥды шуыса;

— паспортсэс ватыса, пиналъёссэс китӥзы думылыса, анай-атайёс ваньзэ эшшо аламагес карозы. Егитъёслэн кузпалъяськон мылкыдзы уката но пуромоз;

— рос-прос вераськоно, нылпилэн семьяысьтыз пегӟемез, ас понназ улэмез потэ яке со зэмзэ ик вуоно кузпалзэ яратэ? Малы со та вамышсэ ӵапак али лэсьтыны ӧдъя?

— ӧч карыса семья кылдытыкуз, нылпиды валаны кулэ ни, та вамыш понна ачиз кыл кутэ шуыса! Кузпалэныз одӥг нунал улоно ӧвӧл ук — быдэс улонзэ! Валэктэ солы, кыӵе со — семьяен улон.

…Сюан — котьку шулдыр. Сяськаос, кузьымъёс, матысь адямиос… Но котькӧня аресын кузпалъяськы — пумозяз уд тоды на, кыӵе шуг-секытъёсын пумиськоно луоз семьяын. Котькуд адями ачиз тодэ та вамышлы ку дась луэмзэ.

Шудо студентка

Удмурт Дунне
By Удмурт Дунне 28 ноября, 2012 11:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<