Эшъёсыз удмурт мунёос

Удмурт Дунне
By Удмурт Дунне 14 ноября, 2012 10:26
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Эшъёсыз удмурт мунёос

Дэри черкогуртысь П. Знаменская

Туэ гужем Дэри черкогуртын ортчем Гурт шудонъёс дыръя куноослы удмурт мунёос кузьмазы.

Ваньзэ соосты дасязы ёросысь кибашлыослэн юртазы ужасьёс. Полина Знаменскаялэн 70 нылкышноосыз но воргоронъёсыз кошкизы шаермылэн пӧртэм сэрегъёсаз.

Подшивал гуртын будэм Полина Знаменская эшъёсызлэсь номырин ӧз висъяськылы. Басма юдэсъёс шедьтыкуз, пичи мунёос лэсьтылӥз. Ӧжытак бадӟымгес будэмез бере вень кутӥз но вуриськон машина сьӧры пуксиз. Со ик вуриськыны дышетскемез луиз. Со дырысен уно аръёс ортчизы. Вуриськисе дышетскемезлы Полина Владимировна пичи но уг ӧпкельы.

Секыт аръёсы, пе, шуг-секытысь потыны юрттылӥзы венен сӥньыс. Нылпиосызлы сяна, гуртын улӥсьёслы но дӥсь вурем. Трос аръёс ӵоже нылпиосты вуриськыны дышетэм, нош берло 8 арзэ ужа Дэриысь кибашлыослэн юртазы, удмурт мунёос лэсьтэ, лякиё шобретъёс вуре.

— Егит дыръям син-маськылӥ арлыдоослэн лякиё шобретъёссылы, — вера Полина Владимировна. — Соосты адӟыса, ачим но вуро кожай, нош та уж борды басьтӥськыны вазенгес ӧз кылдылы. Ма, собере басма юдэсъёсы но тырмыт ӧй вал. Кибашлыослэн юртазы вуыса гинэ, егит дыр малпанъёсме быдэстыны кылдӥз.

Удмуртъёслэн туж ӟеч сямзы — кузьмаськон. Бадӟым шобрет лэсьтэмезлэсь азьло Полина Знаменская пуконъёс вылэ шобретъёс дасяз. Кытчы ке куное мынэ, тодмоосызлы я ӵыжы-выжыосызлы соосты кузьма. Киыз волямез бере гинэ бадӟым шобретъёс кылдытон борды басьтӥськиз. Ужъёсыз туж чебересь пӧрмо ке но, лякиё шобрет вурон борды, ваньмон дыр шедьтыкуз гинэ, пуксьылэ. Учкыны гинэ, пе, капчи, нош выронэз вераса быдтонтэм. Соин ик асдуныз сярысь веракуз, киыныз гинэ шонтӥз кышномурт. Асьме шаерын улӥсьёс дышемын ӧвӧл на, пе, чеберез дунъяны.

Та вакытэ Полина Знаменская удмурт мунёос бордын тырше. Ачиз ик дӥсь вандэ, вуре, кулэ интыяз чильпа я бисер бырттэ. Тодон-валанъёссэ муромытэ, пӧртэм книга-журналъёс лыдӟыса, ёросын, шаерамы ортчылћсь адӟытонъёсы пыриське, мукет кибашлыослэсь адӟем каре.

— Мунёез быдэсак огнам уг лэсьтӥськы, мыным юрттӥсько столяркаын ужасьёс но суредасьёс, — шуэ кибашлы кышномурт. — Жаляса верано, пуэн вырисьёс ваньмыз пичи пуосты волятон борды уг басьтӥсько. Ужез пичи гинэ кадь, нош кыӵе чакласькемез кулэ каре. Дасям пуослы ымныр пуктэ суредасьмы, собере гинэ соос мон доры вуо. Асьме палась удмурт мунёос лэсьтӥсько, пу мугоръёс вылэ турлы басмаос вурыса. Чырты весьёс, уксё тӥрлыкъёс бырттӥсько. Кускерттонзэ пунӥсько, дукес вурисько.

Полина Знаменская куинь пумо мунёос дася. Толэзь куспын шоро-куспо мугоро мунёосты тямыссэ лэсьтыса вуттэ, нош пичиоссэгес — дасо. Ёросъёсысь усточиослы куронъёсын вазиське Ижысь кибашлыослэн юртсы. Угось Удмуртие вуылӥсь куноос ӵемысь, та юртэ пыраса, асьсэлы син-пель кузьым басьто. Соин ик котькуд ёрос ас киужъёссэ та юртын возьматыны но вузаны быгатэ. Дэриос отчы ар куспын 45 мунё сёто.

— Одӥг ласянь учконо ке, 45 мунё со туж ӧжыт, — вера Полина Владимировна. — Тани туэ гужем Гурт шудонъёслы быдэн 35 воргорон но нылкышно вурыса дасяй вал. Дэрие трос калык вуылӥз, спортсменъёс сяна, огшоры учкисьёс, кунгож сьӧрысь куноос ветлӥзы. Мунёосы ӧз тырме, ӝытъёсы но пуконо луылӥз, выльёссэ лэсьтыса. Асьме ёросысь удмуртъёсыз лэсьтӥсько бере, тросгес кутӥсько горд, пеймыт-лыз, пеймыт-вож буёло басмаосыз.

Ялан одӥг выллем вуриськон акыльтэ, дыр, шуыса юамысьтым, серемез потӥз. Вуриськон, машина сьӧрын пукон жадьытэ ке, ыж гон борды кутскисько, пе. Озьы со мунёосызлы гын шляпаос, син-пельлы пичи сапегъёс, телефон возён пуйыос гындэ. Нош таиз но акыльтэ ке, чильпаськон веньзэ басьтэ. Нылпиосын но ужаны вуттӥське: кускерттонъёс пуныны дышетэ.

Валентина Емельянова

Удмурт Дунне
By Удмурт Дунне 14 ноября, 2012 10:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<