Европа удмурт кырӟанэз яратӥз

Егит кырӟась Иван Белослудцев Испаниын «Пичи калыкъёслэн Евровидениязы» «Тау тыныд» кырӟанэныз пыриськоз.

Конкурсэ 18 кылын куамынлэсь трос ужъёс ыстэмын вал. Жюри соосты эскерем бере Ваняез «IB&4CP» группаеныз Испаниысь Гижон городэ ӧтизы. Удмурт кырӟан сяна, конкурсын гэл (Шотландия,) эускера (Испания, баскъёслэн кунзы), бретон (Франция), нижнесаксон (Германия) кылъёсын композициос чузъяськозы.

Конкурс 2-тӥ толсуре уйин 0.15 минутын кутскоз. Ӵошатсконэ пыриськись 5 кунъёсысь лыктэм экспертъёс вормисез быръёзы.

Удмуртиысь учкисьёс трансляциез Интернет пыр www.rtpa.es сайтысен учкыны но www.liet-asturies2012.com. вотэсбамын Иван понна куаразэс сётыны быгатозы.

Иван Белослудцев вордскемын Кез ёросысь Александрово гуртын, али удмурт кылосбур факультетын дышетске.

Туспуктэмез: izvestiaur.ru