Туала вакытэ лыдӟисько… кочегаръёс

Удмурт Дунне
By Удмурт Дунне 21 ноября, 2012 17:42

Туала вакытэ лыдӟисько… кочегаръёс

Глазов ёросысь Люм черкогуртысь библиотекарь Р. Чупина

Глазов ёросысь Люм черкогуртысь библиотека интыяськемын культура юртлэн нырысетӥ этажаз. Татын лыдӟиськон залэз но вань, азьвыл со клублэн директорезлэн кабинетэз вылэм. Но культура юрт ворсаськемен, кабинет лыдӟисьёслы  но киужез яратӥсьёслы выжиз.  

Люмын библиотекарь луыса тырше Роза Чупина. Роза Геннадьевна татчы бускель Ворпӧчинкаысь 15 иськеме ветлэ. Толэзяз 1 сюрс 200 манетэз автобус билетлы быре ке но, кышномурт уг ӝожтӥськы. Роза Геннадьевна культурая училищеысь библиотекарьёсты дасянъя люкетсэ йылпумъяз но тани 20 арлэсь кема ини ужа яратоно удысаз.

— Библиотекаын 3 сюрс книга утиське, эшшо аслам гуртам Ворпќчинкаын одӥг сюрслэсь тросгес. Отын, вуж библиотекаын, мон мылкыд карисьёслы книгаос сётъясько на. Туннэ нуналлы 400 котыр лыдӟисьёсы. Люме книга-журналъёсты басьяны ветло бускель Шудӟа, Зарезь но Колевай гуртъёсысь.

Библиотекамы книгаослы сокем уг ёрмы. Национальной библиотека юрттэмен, историлы сӥзем но чеберлыко литература вуэ, толэзяз дас ке но выль книга басьтӥсько, алигес тани нылпи изданиос вуизы. Но каль (али) калык уг яраты ни лыдӟиськыны. Пичиос школа программаез юало, шоро-куспо арлыдъемъёс газет-журналъёслы лыкто. Дорам ӵем ветло арлыдоос гинэ. Тани Людмила Трефиловалы, Анатолий

Перевощиковлы но Алевтина Ушаковалы куддыръя мар ӵектыны паймисько, уго соос  ваньзэ кадь лыдӟемын ини. Выль книгаосты вутто гинэ, соос библиотекаын ини. Лыдӟисько кочегаръёс но сторожъёс, — шуэ Роза Геннадьевна.

Роза Чупина верамъя, удмурт кылын книгаосты, пе,  татын туж ик уг лыдӟо, ӵемгес усьяло газет-журналъёсты. Библиотекае вуо ёросын потӥсь «Красное знамя», «Иднакар», «Мой город», шаерамы печатласькись «Удмуртская правда», «Вордскем кыл», «Известия Удмуртской Республики», «Кенеш», «Ӟечбур!», «Кизили» изданиос. Но ӝӧк вылысьтызы ӧй адӟы «Удмурт дуннеез».

— «Удмурт дунеез» кӧня ке ар ум басьтӥське ини, коньдон ӧвӧл, вылды. Кыӵе газет-журналъёслы милемды ёрос библиотекаын ужасьёс гожто, сыӵеосыз ик татчы вуо. Ма, библиотекае лыктысал ке, «Удмурт дуннеез» лыдӟись-адӟисьёс луысалзы. Мон ачим ик магазинэ, фермае, стационаре книга-журналъёс нуллӥсько, калык мед лыдӟиськоз шуыса. Соку «Удмурт дуннеез» но возьматысал. Малпанэ вал ини, газетлы аслым  гожтӥськоно шуыса, вуоно арлы басьтыны тыршо, — шуэ Роза Чупина.

Галина Семёнова

Туспуктӥз Владимир Беломорских

Удмурт Дунне
By Удмурт Дунне 21 ноября, 2012 17:42